2026年1月18日星期日

秘制烤鴨 (外賣) + 現拌豆干 + 寧夏菜心苗 ( 18-JAN-2026 )





( 18-JAN-2026  SUN )

今朝同里奧大人食早餐   我食完就去家姐屋企喇 ~


好多奶醬   里奧大人叫比啲佢   咁仲好   因為我食唔到咁多呀


我一開門   Berry 女就超興奮撲埋嚟   所以見到佢真係好鬼開心呢 ~

又係咁抓條頸


想逃走



極度不友善嘅眼神


眼瞓



我想貼住佢嘛   但佢對腳係咁撐我呀   搞到啲 Cushion 同公仔跌哂落嚟


家姐一入屋就好開心話今日唔駛出貨   可以坐定定傾偈   哈哈 ~

家姐有本光波爐食譜   咁我拎嚟睇下   佢話我好勁識得整   我話睇下咋喎   無話識得整噃   之後佢話我煮嘢都叻   我話叻鬼咩   我煮得嘅真係妳都煮得囉   同埋我多數用醬料   整邊個國家菜都得添   所以依家學煮嘢真係好方便   資訊多到睇唔切   點似我以前真係睇文字同相㗎咋 ~

我之前有好多食譜   依家全部掉哂 lu   只係留低 Jamie Oliver 本食譜咋   因為我覺得貴唔捨得掉   哈哈 ~

其實我覺得番工真係好好   因為真係留意到好多人生百態   家姐有個男同事又係好多嘢講   勁似 8 卦咁   問一樣嘢就可以傾成個鐘   但佢真係好好嘅   我問 8 卦間商業大廈點去   佢會 Cap 埋商業大廈張相再加箭咀指示方向點樣去   家姐個男同事又係咁   最邪係大家都同一個姓氏   哈哈 ~

頭大身細



啡色眼睫毛


傾呀傾   好快又到 11 點半   好在家姐望下幾點咋 ~

我哋走嘅時候   Berry 仍然唔落床


家姐要去何文田   所以一齊搭地鐵喇 ~

里奧大人同 HL 有 Urgent 嘢傾   所以要 Lunch Meeting   咁無問題呀   我仲多啲時間去買嘢 ~

我同家姐講話好肚餓   可能要去食碗粉先買嘢   佢話好少何聽我講肚餓   我話係啦   可能諗住  Shopping 太興奮   哈哈 ~

去 AEON 睇下嘢先   諗住買糖水   但醒起屋企有蕃薯同豆腐花就唔買 lu ~

越行越餓   所以食完午餐先再行 ~

艇仔粥+炸兩


食完好熱   所以都唔想行 DONKI   直接去買燒鴨就番屋企喇 ~

今晚同糟糟交收   所以買包薯圈比佢食   因為佢話唔食甜品呀


經過惠康同順興就買啲嘢啦   買完番屋企放低就去做 25 分鐘機   我突然之間覺得自己好勤力咁呀   哈哈 ~

制烤鴨半隻 ($70)


聖安娜今日快閃 ($20/4 個)   里奧大人鍾意食紙杯蛋糕   但我好少見到   所以今次見到都即買喇


煮埋蕃薯糖水就開機洗衫   之後熨衫再大清潔   搞掂又執下嘢   所以好快就已經 5 點半   咁要預備晚餐 lu ~

里奧大人 7 點番到嚟   可以即刻開餐喇 ~

是日晚餐 - 秘制烤鴨 (外賣) + 現拌豆干 + 寧夏菜心苗

秘制烤鴨 (外賣) - 只係焗一部份就夠   其他就留番聽晚食 ~

現拌豆干 - 之前喺薜記買㗎   都幾好味道   但豆干有啲硬   定係我擺得太耐呢   哈哈 ~

寧夏菜心苗 - 本來想買節瓜   但見到有寧夏菜心苗就買嚟食喇   我覺得比普通菜心甜好多㗎 ~

洗埋碗就抖下先   8 點 20 分同糟糟喺屋企樓下交收無煙燒烤爐   家姐話佢好好呀   居然揸車拎比我   因為我同家姐仲諗緊我哋點樣交收好   哈哈 ~

番到屋企即沖涼   再同里奧大人睇 "中年好聲音 4" ~

今次糖水係辣辣哋同少少甜   我就最鍾意呢


睇完再睇陣 Youtube   里奧大人10 點瞓   我就 10 點 50 分先瞓 ~

沒有留言:

發佈留言