招牌正宗上海粢飯 ($20) - 里奧大人必食 我話食 1 啖就夠 我要留肚食雪糕呢
以前里奧大人一定要薄粢 依家唔駛啦 再薄真係好難包啲餡㗎喇 哈哈
酸辣雲吞麵 ($44) - 第一次飲到係熱辣辣呀 因為之前成日都只係暖㗎咋 希望下次都係熱辣辣啦
( 3-JAN-2026 SAT )
感恩瞓得唔錯呀 臨醒之前個夢係我哋同 CC 兩公婆去旅行 仲要係坐咗一日船添呀 CC 問我 2026 年 1 月 1 日未 ?! 我叫佢睇下 Whatsapp 咪知囉 佢話原來已經係 6 點添喇 講完又再同佢揀遊戲玩 玩完又一齊食蛋撻同餅乾 之後鬧鐘響 lu ~
諗住今朝出去食早餐 但里奧大人話買三文治 因為佢唔係咁餓唔想食麵 我話咁仲好 我唔駛落街 哈哈 ~
里奧大人食完就番工 佢揹完背囊話我番工喇喎 我話知啦 佢嘅語氣係有啲唔好意思唔陪我咁 好搞笑㗎 ~
今朝真係的起心肝執文件 有啲唔要就即刻掉哂 真係清咗好多嘢呀 ~
搞掂又已經 10 點 沖埋涼就出去買伊瑪牌電陶爐比 Y 姑 不過無貨 咁我都訂咗先 我同里奧大人講話我送比 Y 姑嘅 叫 Y 姑唔好自己買呀 ~
我今朝好開心自己真係變咗 平時放假我只會做自己屋企同自己屋企人嘅嘢 估唔到我會特登行到老遠買電陶爐比 Y 姑 咁其實愛多一個人都好過恨多一個人嘅 對人對自己都好啦 同埋老公屋企人根本就係我嘅屋企人 正如里奧大人對我家姐都好好 家姐有咩手機電腦問題都會直接打比里奧大人問 里奧大人會即刻幫佢解決問題 見到紫色嘢又會問家姐啱唔啱 ?! 有時係佢講我知有紫色添㗎 所以真係好感激佢都好錫家姐呢 ~
訂完貨就去樓上買嘢 估唔到 11 點半都咁多人 諗住買完快啲走 點知有十幾個人排隊比錢 仲要買到一車嘢呀 哈哈 ~
急凍泰國天然雞中翼 ($68) / 急凍越南紅樹林虎蝦仁 ($63)
原色茯苓粒 ($14) / 急凍加拿大天然豬排骨粒 ($34)
買完即番屋企 因為要整沙律呀 搞掂又已經 1 點 15 分 真係要抖下 ~
材料係 3 個細蘋果 + 5 條即食蟹柳 + 1 罐粟米 因為蟹柳係上年 12 月底到期 所以今日要一次過整哂喇
里奧大人放工番嚟放低嘢先去食午餐 食完又要番公司做啲嘢 咁我陪下佢先再去 LA 活動喇 ~
蘿蔔牛腩湯好飲呀 同埋夠哂熱 所以飲完成個身暖哂
砂鍋牛肉飯+湯 ($58) - 里奧大人本身話 Share 食 但又話想戒牛 咁我話我食牛都無所謂 不過今次啲牛肉就乾咗啲
砂鍋辣豬肉飯+湯 ($58) - 依家我覺得辣豬肉好味啲
里奧大人話唔食飯焦 我叫佢比哂我食呀
LA 活動完畢都 4 點半 諗住番屋企抖下 不過石頭想我陪佢買懷舊糕點 咁陪佢啦 不過佢又搵唔到間舖頭喺邊 但我話我要番屋企喇 因為里奧大人起身等緊我出發去教會 今晚我有事奉呀 ~
番到屋企抖咗陣都出發 因為要去日本城買燈膽 買完就即番教會喇 ~
散會之後要整啲嘢先走得 里奧大人話食台灣嘢 我話唔想食飯 之後我諗到豆漿大王 里奧大人即刻話咁仲好呀 ~
食完去德福行陣再去 Haagen Dazs 食雪糕 食完又再行一陣都搭車番屋企 lu ~
雙球華芙筒 (意大利芝士蛋糕雪糕 & 芒果紅桑子) - 我睇到價錢係 $85 真係以為睇錯 依家食雪糕都好貴下喎 所以我真係有 Coupon 先食㗎咋
士多啤梨+士多啤梨醬+果仁碎 我鍾意食華芙筒㗎 但食完就真係好飽
雪糕甜品杯 (士多啤梨紅桑子馬卡龍 & 曲奇抹茶雪糕) - 呢杯係里奧大人嘅 我覺得Brownies 好味呀
番到屋企開埋機洗衫就沖涼休息 雖然今日 Off 但全日未停過 真係有啲攰 哈哈 ~
榴槤比我嘅自家制洛神花醬 真係好感激佢成日記得我 阿妹又係一有嘢食就第一時間比里奧大人 所以好肯定里奧大人同佢所有同事講我好為食呢
今晚明珠台做 "The Matrix" 里奧大人最鍾意奇洛李維斯㗎 有佢做嘅戲就一定睇 仲唔止睇一次添 不過我睇到 11 點都瞓喇 里奧大人就繼續睇呢 ~
沒有留言:
發佈留言