蒸臘味 + 蒸節瓜粒 ( 6-JAN-2026 )

( 6-JAN-2026  TUE )

感恩一覺瞓天光呀   但應該 7 點都醒醒哋   不過我無望鐘繼續瞓   瞓到鬧鐘響為止呢 ~

早餐仍然食肉桂黑芝麻包   尋日里奧大人已經話好甜   所以我都唔會再買 lu   因為我都覺得係甜咗啲呀   不過唔講咋   哈哈 ~

今朝唔想咁早番工   所以食完就去里奧大人公司坐陣先番工喇   出門口嘅時候   里奧大人居然唔記得拎背囊   好在我提佢咋 ~

菇場唔忙   又做自己嘢   呢半個月 3D 真係好爽 ~

喺洗手間見到隔離公司阿隱   佢話我仲着短袖 ?!   我話捲咗袖啫   同埋覺得今朝都凍呀   因為佢又係怕熱   所以今朝凍凍哋   大家都覺得好舒服   話哂咁先似冬天嘛 ~

Lunch Time 蒸完飯就去 Mikiki 行下   去 A1 買芝士卷再去買話梅薑比里奧大人就番菇場開餐 lu ~

唔忙繼續做自己嘢   咁好快就到 5 點半㗎喇 ~

放工即走   經過樹下面   有嘢跌落我頭頂   勁驚係白鴿屎呀   好在照鏡睇到唔係咋 ~

買埋麵包就番屋企   我將麵包放喺枱面   之後再放包話梅薑   我叫里奧大人可以食呀   佢話留番做早餐得唔得 ?!   我心諗食薑做早餐咁特別 ?!   咁我再望張枱   佢再指住麵包話想聽日做早餐   我都忍唔住笑呀   我話其實我係叫你食薑   哈哈 ~

是日晚餐 - 蒸臘味 + 蒸節瓜粒

蒸臘味 - 天氣凍就食臘味啦   其實真係好鬼方便   但呢啲真係唔可以成日食呢 ~

蒸節瓜粒 - 尋晚食剩滷水雞翼   今晚用啲汁嚟燜節瓜   真係好食好多呀 ~

洗埋碗就整蕃薯糖水   抖陣就同里奧大人去做機   不過我只係做 20 分鐘單車機   我驚做太耐又膝頭哥痛呀 ~

咁我做完都番屋企先   里奧大人就繼續做機 ~

開機洗衫就沖涼   等埋里奧大人沖完涼   就一齊睇 "沖遊泰國 11" 同食蕃薯糖水喇 ~

今次味道又辣又甜甜哋   咁凍天時食就最啱

睇下 Youtube   但今晚凍咗好多呀   所以 10 點半都瞓覺 lu ~