老干媽炒福花牛肉 + 香辣豬肉腸 ( 8-JAN-2026 )

( 8-JAN-2026  THU )

感恩一覺瞓天光呀   醒醒哋又懶下床   但應該都瞓着咗   之後鬧鐘 7 點 27 分響先起身   但我校嘅鬧鐘係 7 點 25 分㗎喎   唔通響咗唔知咁搞笑 ~

早餐食甜餐包搽花生醬   里奧大人話尋晚瞓得唔好   又凍又熱咁   所以晏啲先番工 ~

菇場唔忙又做下 Filing   我多數儲埋一次過做   因為唔想成日行嚟行去呀 ~

Lunch Time 蒸完飯就出去陣   買泥薑再買埋麵包做聽朝早餐就番菇場開餐 lu ~

好奇怪點解屈臣氏會送高達   我仲好開心即刻按入去睇係啲咩   因為里奧大人鍾意高達嘛   所以有時都頂自己唔順   睇啲又唔睇啲   哈哈

忙咗一陣就做自己嘢   所以好快放工 ~

打比里奧大人公司   但阿妹話佢開緊會   咁同佢傾陣啦   佢話今日無咁凍   我話唔係喎   可能我着圓領啦   之後佢講開樽領   我話咩年代呀   仲着樽領 ?!   其實係旨在話佢   哈哈   我覺得近呢 20 年真係無咗冬天咁   同埋依家一凍只係凍幾日   真係連厚褸都唔駛着添呀 ~

番到屋企都預備晚餐   里奧大人 6 點 40 分先番到屋企   但要等埋佢先可以煮河粉   所以差唔多 6 點 50 分先開餐呢 ~

是日晚餐 - 老干媽炒福花牛肉 + 香辣豬肉腸

老干媽炒福花牛肉 - 突然醒起有老干媽香辣脆油辣椒   咁用嚟炒菜都唔錯 ~

香辣豬肉腸 - 辣辣哋幾好味   但又唔係太辣嗰隻喎   我覺得好食過 Johnsonville 呢個牌子呀   起碼食完唔會口渴呢 ~

洗埋碗就煮蕃薯糖水   抖陣就同里奧大人去做機喇   今晚可以做 25 分鐘   好似郁下又無咁痛咁 ~

又要開機洗衫喇   一着厚衫就幾乎成日開機   因為幾件衫又已經一機   好在天氣乾燥啲衫好快乾 ~

沖埋涼就休息   等埋里奧大人沖完涼就食蕃薯糖水喇 ~

睇陣 Youtube 又 10 點 45 分   係時候瞓覺喇   但入到房又同里奧大人傾到 11 點先瞓呢 ~