小草屋 @ 將軍澳中心 ( MAY-2008 )

尋日食完晏就去水姑屋企打牌 lu    不過同里奧大人行咗一陣 $10 店先上佢屋企   因為好難見到有 $10 店嘛 ~

去到水姑屋企   見到個罐頭山已經 O 哂咀   佢仲話之前仲多   同埋仲有啲未攞出嚟喎   點解咁多係因為唔知自己買咗又買囉   最高記錄係 70 支細蠔油   佢一鍾意食就狂買   對上一次見到有 10盒大嘅粟米片   但咁多又真係食得哂喎   我覺得食唔厭先好嘢   水姑話佢同事好驚雞扎   係因為水姑連續食咗兩年   佢聞到都好想嘔呀   兩年可以食同一樣早餐   咁專一真係好難搵㗎 ~

佢屋企養咗隻波斯貓   好似 BB 仔咁任妳抱   啲毛又滑嘟嘟咁   勁得意呀 ~

差唔多成 5 點先開枱   打到 7 點幾就去小草屋食飯喇   好在水姑識人   可以喺食飯時間有位咋   如果唔係就要 9 點先有得食呀   去到只係有 1 張 Menu + 母親節套餐   所以散叫算喇   食鵝片 + 紅燒豆腐 + 炸雙棗 + 欖菜炒四季豆 + 蜜餞牛肉粒 + 什菜煲 + 蠔仔粥   去小草屋必食蠔仔粥   因為好多料同埋無咩味精咁   正呀 ~

食完又係再打   打到成 12 點   今次又係我嬴   又係嬴哂里奧大人啲錢   好在坐對家   唔係以為我哋打龍通添呀 ~

太夜喇   所以打的再轉小巴   番到屋企沖埋涼成 2 點先瞓呀 ~

~~~~

今日放假   但瞓到 9 點幾已經醒咗   咁唯有同里奧大人去太興食早餐啦   食火腿絲通粉餐 + 餐肉蛋出前一丁   水準差咗好多喇 ~

食完再同里奧大人去買餸   豬展 ($20) + 豬扒 ($17) 紅青蘿蔔 ($10) + 3 條粟米 ($7) + 西瓜 ($21) 就番屋企喇 ~