蝦醬玉子豆腐火腩煲 + 豉油蛋絲炒飯 + 老黃瓜赤小豆扁豆粟米豬骨湯 ( MAY-2008 )

尋日番到屋企都成 3 點半   所以同里奧大人拿拿聲買嘢預備晚餐喇   去超市買豬骨 ($33)   再去藥房買赤小豆扁豆 ($12)   再去街市買韮菜 ($3) + 燒肉 ($30) + 2 條玉子豆腐 ($2) + 富士蘋果 ($12) 就番屋企喇 ~

換好哂衫 Ready 煲湯先記得無買老黃瓜   又要再落街市買   買咗 1 個 斤半嘅老黃瓜 ($6)   又幾抵喎 ~

預備哂湯   又煲埋中藥   所以又去執櫃桶喇   里奧大人就主動話幫手熨衫   實在太感動喇 ~

是日懶餐 - 蝦醬玉子豆腐火腩煲 + 豉油蛋絲炒飯 + 老黃瓜赤小豆扁豆粟米豬骨湯

蝦醬玉子豆腐火腩煲 - 里奧大人唔鍾意食布包豆腐   所以要求用玉子豆腐代替   但其實買完都好驚   因為 1 蚊條實在太平喇   下次都係去 Jusco 買穩陣啲   今次去街市入面啲燒味檔買燒肉喇   $30 都幾多下   不過當我煮嘅時候發現係有部份係生嘅   所以又要花時間煮熟   來諗住用雞粉加水做汁   點知無雞粉   所以用蝦醬代替   估唔到又幾好味喎 ~

老黃瓜赤小豆扁豆粟米豬骨湯 - 媽咪話呢個湯係去濕湯   所以煲嚟飲下   唔係自己讚自己   煲湯真係好好飲喎   依家我真係唔想再浪費任何食物   所以我就食湯渣做晚飯   同埋啲豬骨好鬼貴   真係唔想浪費 ~

豉油蛋絲炒飯 - 我就話食湯渣啫   無理由里奧大人無飯落肚家嘛   我覺得啲男人好快肚餓㗎   所以就求其用豉油蛋絲炒碗飯比佢食就算喇 ~

食完洗完沖埋涼   諗住做賑災籌款無得睇獎門人   好在無轉台咋   原來改咗 9 點半做   呢排周遭事情實在令人太沉重   所以真係好想笑下放鬆下~

~~~~

今朝天陰陰又落雨   加上又係星期一   個人真係有啲 Down 呀 ~

雖然遲到   但實在唔想咁快番公司   所以趕頭趕命都去食埋早餐先番去   食芝蛋治烘底 + 奶茶 ($15) ~

番到公司忙到顛   連遊 Blog 都無時間呀   真係估佢唔到 ~

晏晝又係同里奧大人食   去餐廳 Share 食什扒飯 (洋蔥汁)餐   份量啱啱好   因為我減肥進行中   同埋如果叫兩碟就真係食唔哂   無謂浪費嘛 ~