臘味糯米飯 + 南瓜栗子粟米豬骨湯 + 跑步機 ( MAY-2008 )

尋日放工番到屋企已經 2 點幾   所以同里奧大人去食 Tea 喇   我就食紫菜魚片頭湯金邊粉   里奧大人就食豉油王炒麵 + 油醬多   之後去街市買餸   豬骨 ($26) + 1 個南瓜 ($8) + 半磅栗子 ($6) + 1 份粟米 ($5) + 3 個木瓜 ($12) 就番屋企喇 ~

番到屋企熨下衫   執下嘢就同里奧大人出去做機 lu ~

沖個靚涼之後再煲湯   搞掂就可以有時間睇下報紙 Relax 下喇   實在諗唔到煮咩   但又唔知出去食咩好   所以求其煮臘味糯米飯算喇 ~

是日晚餐 - 臘味糯米飯 + 南瓜栗子粟米豬骨湯

臘味糯米飯 - 諗住好簡單咁蒸臘味糯米飯   點知原來仲嘥時間   糯米浸咗 2 個鐘   再浸 3 隻冬菇 + 幾粒江瑤柱   唔想啲臘味 (臘腸 + 潤腸 + 臘鴨) 咁油膩   所以將臘味出出水再切粒   連同冬菇江瑤柱一齊放飯面蒸半個鐘   我驚啲糯米唔熟   所以又再炒一炒   唔知點解今次啲糯米飯唔煙韌嘅 ~

南瓜栗子粟米豬骨湯 - 豬骨出水   栗子滾 2 分鐘可以易啲去肉   最花時間係將啲粟米續粒拻   但又好好味喎   粒粒脹卜卜咁好正㗎   呢煲湯真係好甜好正   最正係可以留番啲粟米粒當聽晚嘅蔬菜   慳唔小錢㗎 ~

食完飯洗埋碗   個人散哂 lu ~

~~~~

今朝打的番教會期間   里奧大人先知道唔記得帶銀包   其實唔帶銀包唔係問題   我有帶咪得囉   但問題係里奧大人要去圖書館借書   要帶圖書館証同身份証嘛   所以我落車去餐廳食嘢先   佢就原車番屋企拎銀包喇   話過佢千千萬萬次   帶齊銀包 電話 工作証   但都會漏   仲次次都話因為換袋先唔記得帶嘢   呢個根本係籍口   換袋都係將成個袋啲嘢搬去另一個袋度啫   點會唔記得㗎 ?!   同埋啲咁緊要嘅嘢梗係會 Check 清楚啦   唔 Check 清楚就賴換袋呀眼瞓呀   呢啲嘢係臨瞓前 Check 清楚家嘛   嘥自己時間   我夠成日換袋啦   我都係 Check 清楚先拉鍊㗎 ~

已經時間唔係咁充裕   所以要邊食邊等   食炸菜肉絲米 + 熟蛋腸仔 + 奶茶   啲炸菜勁鹹   碗米粉勁油   點食呀 ?!   食咗一半咋   而里奧大人拿拿聲食丁麵 + 炒蛋腸仔 + 奶茶就番教會喇   係咪吖   搞到趕頭趕命咁 ~

番完祟拜就去圖書館借書   而我就睇烹飪書   本來我都有抄 Recipe   但抄唔到咁多 ~

借完書已經 2 點幾喇   所以又去食 Tea 喇   食鳳爪排骨飯 + 鹹魚肉餅飯 ($34)   講真   次次食啲飯都好腍劈劈咁   唔明點解飲食雜誌話係好出名嘅盅頭飯   肯定係 "線" 稿呀   食完 Tea 就同里奧大人慢慢行番屋企喇 ~