唔知係咩嘢 + 核核突突芒果 Cheese Cake + 跑步機 ( MAY-2008 )

尋晚放工又大風又大雨   番到屋企里奧大人就話放工走人   仲話可以食完飯陪我做機添呀 ~

咁即係要喺里奧大人番屋企前要有飯開   如果唔係太夜食飯會做唔到機㗎 ~

拿拿聲去到街市買 3 個芒果 ($12) 再買 2 個大蕃茄 ($4) 同埋 1 個紫洋蔥 ($1) 就番屋企喇 ~

是日懶餐 : 肉醬天使麵 + 唐生菜

肉醬天使麵  - 原來我買錯咗天使麵   跟包裝做法   煮 3 分鐘就 OK   之後再煮蕃茄蓉再爆香洋蔥同豬肉碎   然後再加意粉一齊粉   越炒越心寒   因為炒到好似麵糊咁   睇見都唔想食   唯有拚命落芝士粉令到賣相好啲   食嘅時候   里奧大人都好厚道話好食   不過口感似糊仔喎    講真   我都唔係咁想食   所以落辣椒粉嚟刺激味雷   快快手手食埋去唔想眼冤呀 ~

唐生菜 - 其實又中又西好怪咁   但啲菜已經擺咗一晚   所以一定要煮嚟食囉   炒完個粉咩心機都無   所以連腐乳都懶得拎嚟點呀 ~

食完飯就即刻食 Cheese Cake 當甜品喇   因為好想做機前食   咁就可以跑哂啲脂肪出嘛 ~

對於呢個 Cheese Cake 唔會有太大期望   因為時間實在太傖咄喇...買相唔掂   其一係因為啲生果多得滯瀉哂出嚟   其二係好似唔夠實咁   我好想整到好似出面嗰啲 Cheese Cake 咁硬呀...但唔識點整   不過唔係讚自己   個 Cake 的確幾好味喎   但太漏喇   所以我都特登買啲唔熟嘅芒果   酸酸哋幫助消化呀 ~

~~~~

今朝 6 點 45 分起咗身   因為比賓姑打嚟嘈醒   搞到我之後瞓唔着   大佬呀   有咩事要晨咁早打嚟呢   原來係話份功課要聽日交   要里奧大人今晚搞掂   咁妳有無自私啲呀   咁早打嚟嘈住人   原來係為自己   妳起身啫   咁有無諗過人哋仲瞓緊覺㗎   妳認為咁早打嚟   里奧大人會即刻幫妳做到咩   就算做都要今晚放工番屋企先做到啦   妳認為咁早打嚟   咁里奧大人就會一路番工一路幫妳做功課呀 ?!   我平時 7 點半先起身   咁就無咗 45 分鐘休息時間呀  我咁慶係因為佢唔係第一次係咁   之前試過假期同星期日 9 點打嚟問功課   大佬   知唔知人哋難得可以瞓耐啲又比妳嘈醒呀 ?!   不知所謂   離哂大譜   假期都可以隨時瞓吖   但番緊工點可以隨時瞓呀 ~

咁早起身咪早咗出門口番工囉   所以去食麵   可以消磨時間嘛   食沙爹牛肉蛋麵 + 奶茶 ($18) ~

今朝都少少忙   .不過好眼瞓   個頭又重重咁   提唔起精神做嘢呀 ~

晏晝又同里奧大人一齊出去食   見佢好趕咁跑嚟   但其實無遲到   原來佢趕住落嚟而無帶電話   驚我搵佢唔到   所以就跑嚟   嗰刻好感動   覺得佢真係好緊張我   所以今朝雖然好慶   但見到里奧大人當堂開心番哂呀 ~

見天氣唔錯   所以同里奧大人慢慢行去食車仔麵   $18 (5 餸 + 豆漿) + $23 (8 餸 + 豆漿)   最正係又抵又好味嘛   食完又慢慢行番公司 lu ~