珊瑚堡 + 跑步機 ( MAY-2008 )

尋晚好開心呀   因為里奧大人晏晝北上完就同我差唔多時間番到屋企   所以可以一齊食晚飯同做機呀 ~

今晚唔煮啦   唔想比人笑喇 ~

由於仲有珊瑚堡 $50 Cash Coupon   而呢間 Cafe 啲服務水準極差   食物又一般   怕佢遲早執呀   所以就去食埋先喇 ~

去到發達啦   因為珊瑚堡有新分店開張   所以食指定套餐就會送相同價錢嘅 Coupon   同里奧大人 Share 紐西蘭肉眼牛扒 + 芝士蒜蓉煙肉焗紐西蘭青口意粉 ($116)   因為扣埋 $50 Cash Coupon 所以咁平   但無得送 Coupon   因為用咗 $50 Cash Coupon   真係比佢啲 Waiter 激到嘔血   事緣我 Order 之前已經問咗用 Cash Coupon 仲會唔會有呢個優惠嘅 Coupon   佢話有我先會叫   點知最後埋單係無嘅   之後個 Waiter 話: 算啦   今次比 Coupon 你   佢無 Say Sorry   我咪話咩嘢算呀 ?!   係你搞錯先呀   之後無幾耐有個 Manager 過嚟話公司規定用咗 Cash Coupon 就唔可以送㗎   咁我咪話咁就叫妳哋啲同事講清楚啲啦   問得咁清楚都仲要搞錯   最後個 Manager 話會比 $150 Coupon   但點知原來係張 $50 Coupon   消費滿 $100 先可以用   咁就叫 $150 ?!   妳話係咪顛㗎   不過我都唔要求比 $150   因為 Eexpiry Date 係 30-Jun-2008 ~

條氣仲係谷住谷住   係嬲點解啲人會咁唔用心做嘢嘅   做錯唔認錯   唔識就問啦   問完就記住啦   咁做嘢點得㗎   仲要係服務性行業添 ~

食完抖一陣就同里奧大人一齊去做機 lu   兩個人做機真係無咁悶 ~

~~~~

今朝天氣非常差   大雨到不得了   驚塞車   所以早啲出門口 ~

早咗番到公司附近   所以可以嘆個沙爹牛肉蛋公仔麵 + 奶茶 ($13)   影完相放番相機落袋   心血來潮 Check 下個 Key Holder   點知無咗   摷咗 3 次都無   嚇到標冷汗   因為驚鎖門之後唔記得拎番出嚟   拿拿聲打比里奧大人叫佢搵賓細姑幫手睇睇係咪真係漏咗無拎   點知話無 Key 喎   咁我好快咁食完番公司倒哂所以嘢再摷兩次   原來係因為個暗袋爛咗   所以跌咗落底   好在搵到咋   如果唔係就要換鎖㗎喇   同埋最唔好意思係搞到人嘛 ~

番到菇場比較忙   所以要尊心種菇   種完先認真巡 Blog ~

晏晝同里奧大人去食水餃河 + 切腩麵套餐 ($49)   食完又兜個大運就各自番公司喇 ~