柱候煎雞翼 + 節瓜雲腿粉絲煲 + 跑步機 ( MAY-2008 )

尋晚好他條   因為里奧大人要開 OT   同埋我又已經醃好雞翼   所以只喺去街市買節瓜 ($5/4 條) 就得 lu ~

番到屋企又係換衫再去做機喇   唔知點解膝蓋有啲痛   所以依家只做 15 分鐘跑步機再加 15 分鐘 Stepper   里奧大人話做 Stepper 無咁傷膝蓋喎   不過再加多句話我係因為肥   所以膝蓋痛喎 ~

呢排里奧大人開始忙喇   要 9 點幾先可以番到屋企食飯   所以依家會煮多啲菜   唔係驚太多肉好難消化呀   因為我 11 點要瞓嘛 ~

是日懶餐 : 柱候煎雞翼 + 節瓜雲腿粉絲煲

柱候煎雞翼 - 用柱候醬醃咗兩晚   再慢火煎   香到不得了呀   里奧大人話我從煮以嚟   煎得最好食係今次喎   雖然個樣黑咗啲 ~

節瓜雲腿粉絲煲 - 呢個餸係抄噹媽㗎   不過我唔鍾意蝦米   所以改用雲腿 (因為 Expiry Date : 30-6-08)   好在味道都幾夾咋 ~

洗埋碗沖埋涼已經 10 點半   睇咗陣電視就要去瞓覺喇   啲時間好似好唔夠用咁 ~

~~~~

今朝勁塞車   所以不斷祈禱   求神保守車程順暢   感謝神聽我急切禱告   不消一分鐘車程做暢通無阻   感謝神嘅保守帶領 ~

眼瞓無咩胃口   所以食奶油多 + 咖啡 ($13) ~

番到菇場有得種菇   所以要拿拿聲遊哂所有 Blog 先種菇 ~

里奧大人突然要上廠   所以 12 點已經去赤丸食 Lunch   食食下公司打嚟話遲啲先上   所以里奧大人可以齋陪我食嘢喇   去 KFC 食巴辣雞腿包套餐 ($25)   之後再行一陣就各自走 lu ~