蔥花燒肉粒炒飯 + 腐乳唐生菜 + 灌湯包 + 跑步機 ( MAY-2008 )

尋晚放工仲落雨   車程就梗要耐啲   落車第一時間去街市買餸   如果唔係驚收檔呀   同埋一早諗好咗煮炒飯   所以只需買 1 份唐生菜 ($5) 就可以番屋企換衫去做機 lu ~

做完機喇   里奧大人都未放工   所以去 Jusco 逛逛   突然好想食魚肉燒賣   所以買定 2 Pack 香港仔魚肉燒賣 ($12.9/2 Pack)   好抵呀   之後再買 Whipping Cream 就番屋企 Ready 晚飯喇 ~

是日懶餐 : 蔥花燒肉粒炒飯 + 腐乳唐生菜 + 灌湯包

蔥花燒肉粒炒飯 - 係用食剩嘅燒肉嚟切粒   再加蛋絲   蔥粒同老抽炒勻   不過覺得燒肉粒太多   飯太少喇 ~

腐乳唐生菜 - 只想用最方便嘅方法煮菜   所以就食唐生菜喇 ~

灌湯包 - 好想食醋   所以就開包灌湯包嚟點醋喇   不過唔知係咪擺咗成年   啲皮好硬呀 ~

食完飯唔洗碗就即刻整 Chesse Cake   原因係 24/ 5 到期   真係唔想嘥咗佢呀   里奧大人今次仲出手相助添   因為個打蛋器實在太強勁  一打就飛哂啲 Cream Cheese 出嚟   同埋個碗又係咁郁   所以佢唔幫唔得呀 ~

洗埋碗成 10 點先搞掂   真係超攰呀 ~

~~~~

今朝又落雨   勁 Down 呀   因為我實在太受天氣影響情緒喇 ~

都係嗰句啦   咁 Down 唔想咁快番公司   所以食埋芝腿菠蘿包 + 咖啡 ($17) 先番公司 ~

晏晝都係風雨不改咁同里奧大人食 Lunch   食醬爆牛丸米 + 切腩麵 ($36)   食完再迫里奧大人陪我去買餅乾   點知越行越大風大雨   雖然有各自擔遮   但見里奧大人件衫濕哂   我覺得自己好衰咁   早啲番公司咪唔會濕衫囉   係都要行 ~