xo 醬西蘭花炒帶子 + 蝦仁燒肉粒炒飯 + 冬蟲草燉雞湯 ( 24-nov-2009 )

( 24-nov-2009 tue )
今朝又暖番    時冷時熱真係好辛苦   最麻煩係要拎 d 衫出黎  又要收番 d 衫入去囉

哎呀   今朝又遲咗   好在早一晚拎定 d 衫出黎    唔係更遲 

un un 腳又等 lunch   又同媽咪飲茶   因為媽咪煲咗兩大樽豬腳薑醋比我呀     唔拎唔得啦   希望我唔會咁快食厭啦     其實我之前貪得意食   本身都鍾意食嘅   但小食多滋味嘛    無意間同媽咪講下咁啦   點知佢又整    我係唔想佢辛苦整咋   但媽咪話出面用 " 哥士的 " 整架   所以整比我囉 

un un 腳又等放工   一早諗好整咩   所以唔駛咁趕喇 

是日晚餐  - xo 醬西蘭花炒帶子 + 蝦仁燒肉粒炒飯 + 冬蟲草燉雞湯
xo 醬西蘭花炒帶子 -  今次味道唔錯  煮嘢真係要煮得多先好味   但成日食又驚悶喎  噢 

蝦仁燒肉粒炒飯 -  將尋晚剩咗嘅燒腩粒粒  再整多幾隻蝦  又係切粒  加 d 蔥花 蒜粒同黃薑粉  簡簡單單已經好好味 lu   ( 我覺得 ) 

冬蟲草燉雞湯 - 里奧大人家姐特登黎教里奧大人燉架   勁感動  雖然一番到屋企有得飲   但一入廚房就要洗到暈呢   佢地一個 " 撈教 " 一個粗心大意    整到個煲蓋全部都係油    爐邊又係    又唔即刻洗同抹喎   抹手巾又唔知放喺邊   明明有個勾可以掛家嘛    妳知啦   入廚房如同入戰場家嘛    要果樣無果樣  一係唔知比佢放咗邊   激到我火都黎   面都黑哂   語氣重哂   真係好掹好掹     咁下次點敢要你燉呀    樣樣要我執手尾   我真係覺得好討厭超討厭勁討厭    我話下次唔好整   我唔飲好過   大佬   飲完都補唔番呀  

又同里奧大人出去散步喇   但佢行得好急咁囉   佢腳長行得快嘛    一步等如我兩步    都唔理人感受嘅  唉