擔擔麵 + 粟米蛋花湯 ( 15-jun-2011 )

( 15-jun-2011 wed )
尋晚瞓得唔好呀   里奧大人將冷氣又教大又教細   郁黎郁去   我好醒瞓家嘛   所以起身嘅時候都話比佢累到我瞓唔到覺呀 ~ 
早餐又食粟米沙律包   覺得無肉好健康咁呢 ~

之前同新同事傾計   話菇場靜到一粒聲都無   係咁妖妖聲   又話講下 8 卦嘢   家常閒計   粗口都好丫   嘩   我好大反應話講粗口就唔好啦   佢咁講之後   佢都應該係可能係會講粗口嘅人   如果唔係無理由會接受到人講粗口囉   都係同佢保持距離好 d ~
菇場 9 點半就開始靜架喇   我都習慣 lu ~
晏晝有 lunch box   都係一路食一路上網睇嘢   一個人清清靜靜唔錯丫 ~
放工打比媽咪   佢又撞到隻腳   又有瘀血   我仲以為係啱啱整到   原來係朝早 10 點幾整到   唉   應該一早入院丫嘛   今日里奧大人上咗大陸   差唔多 8 點幾先番到屋企   我仲諗住行下買下嘢   依家無哂心機啦 ~ 
我番屋企等埋家姐電話先決定煮唔煮飯   家姐話媽咪應該入院囉   因為撞到嘅範圍大過之前果次   媽咪仲話唔入   想睇電視   嘩  嬲都我大聲鬧佢呀   好在喺屋企啫   唔係 d 人以為我發顛都似呀   好在佢最後都肯入院   有家姐陪   我先放心去煮飯 ~
是日懶餐 - 擔擔麵 + 粟米蛋花湯
擔擔麵 - 又係用担担麵醬撈上海麵呀   今次將里奧大人嘅辣度減半   好在佢話唔辣   又話好味   唔係我又發火架喇 ~ 
粟米蛋花湯 - 唉   尋晚特登買定 3 條節瓜   諗住滾湯   點知 d 節瓜有兩節顏色   所以我都唔要喇   咁唯有開粟米湯啦   今次又無睇包裝開咗粟米粒以為係粟米湯   好在開呢盒先咋   唔係開咗兩盒粟米粒都唔知點算 ~ 
食完飯搞掂哂所有嘢就打比家姐   佢話等緊照 x-ray   之後我再打去   話醫生幫媽咪抽 d 瘀血   但 d 瘀血已經凝固咗啦   好似 jelly 咁   所以應該又要植皮   之後終於上骨科   醫生都話 d 瘀血似豆腐   應該要植皮   兩個醫生都咁講   咁即係要啦   救護車人員都講話   如果撞到嘅時候   見到 d 皮膚係瘀黑色就應該即入院   咁樣就抽到 d 血   依家拖咁耐   想抽都難啦   明明無事變有事   真係自己攞黎   妳話我衰都咁話囉   好鬼慶呀 ~