潮州四寶河 + 鮮蝦韭菜餃粗麵 + 手打牛丸米粉 + 蠔油芥蘭 (外賣) @ 屋企 ( 12-DEC-2020 )

里奧大人本身係食牛丸+韭菜餃   家姐話做咩食雙拚呀   我食牛丸你食韭菜餃 Share 咪得囉   超搞笑   真係唔比里奧大人雙拼㗎   慘慘豬

( 12-DEC-2020  SAT )

今朝 9 點 50 分都起身 lu   不過其實我都校咗 10 點鬧鐘響 ~

梳洗之後就整早餐   10 點 10 分有得食 ~

食食下家姐打嚟   第一句就話尋晚差啲死咗呀   真係嚇到我即刻呆咗   之後話衰女包尋晚甩繩走咗呀   好在陳老二個仔幫手一齊追咋   咁衰女包好唔鍾意另外一隻柴柴   次次見到都係咁吠   所以家姐聽到吠聲就即刻抱起衰女包番屋企呀 ~

家姐話佢番到屋企要即坐低呀   個胃勁痛到想入醫院   之後仲要係咁搽白花油   姐夫話家姐塊臉係青哂添呀   之後姐夫鬧衰女包   佢頭 "dup dup" 仲慘慘眼   應該知衰啦 ~

原來家姐用咗新狗帶   Berry 好唔鍾意   我話即刻掉咗去啦   之後糟糟話有狗帶係索埋頸同腳嘅   正路就肯定唔會甩帶嘅   所以家姐叫佢即刻幫佢買呀 ~

都唔知衰女包做咩鬼咁野性   最搞笑街坊話 Berry 做咩咁唔識諗㗎   有瓦遮頭又有好嘢食   點解要走出去呀   但其實我同家姐都真係唔識教狗   只係寵佢   所以朱朱又係勁惡   蝦到我哋死死下 ~

一傾就傾咗半個鐘   真係食完要即大清潔屋企喇 ~

搞掂哂都已經 12 點 45 分   沖埋涼就抖陣 ~

1 點幾出發去里奧大人公司   去到見到榴槤   佢即刻過嚟話我比佢啲朱古力好好味   真係好搞笑   幾乎每個同事都同我講朱古力好食 ~

同里奧大人去食下午茶   之後諗下自己有咩地方去   因為我 5 點要到寶福山   但咁多時間唔知點打發好   始終唔想咁早到大酒店嘛   呢啲地方令人太傷感 ~

食完諗住走啦   周圍行下咁囉   點知里奧大人同事打嚟話有突發嘢要做   咁啱要人手   我就可以幫手喇   感恩感恩 ~

估唔到一做就做到 3 點半   做完要即走喇 ~

感恩車轉車嘅時間係啱啱好   因為去到已經 4 點 43 分喇   如果遲咗一班車就肯定遲到呢 ~

姑姐一見到我   對眼即刻紅哂   我都一樣啦   但都忍住無喊到   之後就傾偈 ~

因為我幫手收帛金   所以傾咗一陣就要出去坐喇   開始多人來呢 ~

我同大表哥個女一齊坐出面   之前見過一次㗎咋   不過佢真係斯文有禮   講嘢同做嘢動作都係慢嘅   之後佢話佢爸爸都係咁   我話姑丈講嘢都好慢   不過我話咁咪好囉   慢活嘛   好過樣樣都心心急急   真係血壓都高啲㗎   哈哈 ~

見無咩人就同家姐一齊陪姑姐傾偈   姑姐話姑丈傷口都好痛   姑姐話不如早啲走都好   等姑丈無咁辛苦   始終姑丈年紀非常大   唉 ~

傾傾下   有幾個男仔同姑姐打招呼   姑姐同我哋講   呢幾個係佢阿哥啲仔   家姐笑住話咪即係我阿叔個仔囉   堂阿哥呀   之後我話姑姐妳係咪玩搞笑呀 ?!   姑姐就大笑話真係玩搞笑   好開心姑姐笑得好開心   因為我嘅姑姐係一個非常開朗嘅人   見過我姑姐姑丈嘅親朋好友   都話佢哋兩個個樣係非常慈祥㗎 ~

7 點左右開始多人   我哋又出番去啦   同堂細佬傾偈   佢講嘢原來好鬼搞笑   但佢阿哥就唔出聲   係咁叫家姐同佢阿哥講嘢呀   仲話佢阿哥係一字值千金   幾鬼衰呀   哈哈 ~

佢同姑姐話要走喇   咁我叫家姐快啲問堂細佬拎手機號碼   佢話唔敢   我叫佢快呀   之後家姐都有問   嘻嘻 ~

之後大表哥個女對同我講話妳家姐好好   講咗兩次   好搞笑   唔知係咪覺得家姐好聽我話呢   哈哈 ~

我哋差唔多 8 點走喇   同家姐一齊搭的士番屋企 ~

里奧大人番屋企先   我同家姐就去買嘢食 ~

家姐 9 點幾都番屋企喇   要同 Berry 行街街 ~

我睇多陣電視   11 點幾都要瞓喇 ~