營火燒烤純豬肉腸拚竹輪卷 + 柳州螺絲粉 + 昆明生菜 ( 15-JUN-2022 )

( 15-JUN-2022  WED )

今朝又係瞓到 9 點半自然醒   咁都即刻整早餐喇 ~

MUJI 買嘅芝士法包   我以為得面喺芝士   所以諗住整芝蛋包啦   但原來係有芝士粒   所以就咁焗熱算喇 ~

11 點幾出發去淘大   咁就可以買 Lunch 番屋企食   好過特登坐到 1 點幾食完 Lunch 先出發   同埋難得無落雨呢 ~

去完 Donki 買咗包綠茶同 2 盒朱古力就去藥房買藥   感恩 1 盒 $570   因為我去診所配要 $730 呀 ~

之後去買風扇   但我哋仲想行陣   所以職員叫我哋行完先再去買 ~

買咗微力達嘅手壓式平板旋風地拖   本身尋日想買腳踏嘅   但里奧大人話插口好難插   咁我話買最傳統嘅地拖啦   但地拖盤+地拖都接近 $130   所以里奧大人話買呢個試下   如果真係用一年玩完   就唔再買呢類型地拖好了 ~

佢成日驚我扭地拖用力   所以佢唔想我買傳統地拖 ~

買完地拖就我去買午餐   里奧大人就去買風扇   佢話職員已經將把風扇包裝好   我話佢真係好信我哋喎   哈哈 ~

喺 Jollybee 買嘅樂脆雞套餐 + 夏威夷堡 

食完午餐就去超市買 8424 西瓜   難得 $65 嘛   更加難得里奧大人幫我拎   哈哈 ~

最後買埋生菜同青瓜就走人   咁我用家姐比我嘅 $100 E-Coupon   職員話有 $9.9 多咗   所以叫我買多 $9.9   今次我真係好論盡   以為自己已經買夠 $100   所以即買 2 盒涼粉再補錢呢 ~

番到屋企都即刻沖涼   之後休息休息 ~

我同里奧大人講話放假攰過番工   佢話妳都覺呢   哈哈哈哈 ~

里奧大人 4 點半都要瞓晏覺   我就 5 點瞓到 5 點半呀   本來都已經忍住唔瞓   但最後頂唔住瞓咗   哈哈 ~

今晚我真係想煮晚餐   因為諗唔到食乜好 ~

是日懶餐 - 營火燒烤純豬肉腸拚竹輪卷 + 柳州螺絲粉 + 昆明生菜

營火燒烤純豬肉腸 - 喺 759 買㗎   今次做特價 2 包好似 $48   呢個韓國牌子 Sajo 都唔錯   等雪櫃有空位同埋特價會再去買   用嚟煮螺絲粉都好 ~

柳州螺絲粉 - 今次試好歡螺牌子   好似 $19/包   係一人份量咋   好似上次另一個牌子多份量啲   同樣我都係會走醋走筍   我覺得就咁落辣油已經好重口味   同埋都好辣下   我都只落咗半包辣油咋 ~

昆明生菜 - 1 Pack 有 3 棵   今晚只食 1 棵   因為我仲好飽 ~

沖埋涼就食哈蜜瓜   我可以食到半個   所以鍾意買細細隻嘅哈蜜瓜呢   可以快啲食完   哈哈 ~

差唔多 9 點就睇 "盡情愛 大力吃"   睇哂 2 集啱啱好 11 點   我都即刻瞓覺喇   真係唔知係咪太耐無去街   個人覺得好攰咁 ~