咖哩豬扒拚司華力腸 + 油麥菜 ( 30-JUN-2022 )

( 30-JUN-2022  THU )

感恩一覺瞓天光呀   里奧大人話尋晚都瞓得好   但如果唔去咗廁所更好   我直頭唔知佢去廁所添呀   如果晚晚瞓到咁深層熟睡就好了 ~

今朝落大雨   所以涼咗好多呀 ~

早餐食奶醬多   落雨唔想行咁遠   如果唔係本身想食麥記呢   哈哈 ~

菇場唔忙呀   又做下自己嘢 ~

坐坐下都覺得凍   同埋好多同事都着咗外套   希望冷氣日日咁凍就好啦   真係好怕焗熱嘅感覺 ~

Lunch Time 出去買薯仔同粟米   之後再買麵包   全程 45 分鐘   大雨又停雨   停雨又大雨咁   不過我不嬲都會有把遮喺袋嘅   嗰次肥仔豪聽到我話把遮係放喺公司用   佢個樣好愕然   可能佢番工同 Lunch Time 用同一把遮   我就唔會咁   因為我驚自己唔記得收遮呀   咁放工就無遮用了 ~

買埋水餃河都番菇場喇   得番半個鐘頭食嘢咋 ~

仍然唔忙呀   可以準時放工~

同里奧大人同一班車番屋企   所以番到去都要即預備晚餐 lu ~

是日晚餐 - 咖哩豬扒拚司華力腸 + 油麥菜

咖哩豬扒拚司華力腸 - 今次個咖哩汁係中辛   本身醃咗 4 塊豬扒   但我想食司華力腸   所以只煮 1 塊豬扒   哈哈 ~ 

油麥菜 - 終於食埋喇   依家雪櫃好凍   好易雪到啲菜爛哂呀   唉 ~

洗埋碗就抖下   再同里奧大人跳 1.5 Part 舞 ~

開機洗衫就沖涼   之後就睇電視 ~

呢排睇韓劇同 Binne 都用 Samsung 摺機   搞到我都好想買   我同里奧大人講話: 我想買   你同家姐送比我嘅生日禮物   里奧大人笑出嚟   話無諗過我咁講   仲講得咁順口   哈哈 ~

今晚 11 點 45 分都瞓覺   里奧大人就仍然睇 Youtube ~