味千拉麵 + 麥當勞新地 + 跑步機 ( JUN-2008 )

尋日放咗工去睇醫生   因為鬼剃頭嘅範圍好似五蚊咁大呀   肉酸到爆   所以都係睇醫生好啲   其實睇都無用   因為係無得醫   只需要保持心情開朗就會自自然然痊癒   但我心理上覺得有啲藥膏查下係會好啲   所以咪睇醫生囉   臨走時   醫生笑笑口話明唔好期望太大喎   當然明啦 ~

睇完醫生就做機喇   因為唔駛煮飯 ~

其實煮飯都會比自己壓力㗎   因為我好緊張   唔想煮餸過程中有任何出錯   所以次次煮完飯都好似打完仗咁好攰好攰 ~

雖然出街食係好方便   但超級無益囉   煮又煩唔煮又煩 ~

天氣悶熱   最好食麵   所以里奧大人又話要去味千食拉麵喇   食炸福袋年糕 + 餃子 + 日式炒雜菜 + 豬軟骨拉麵   埋單 $130 ~

食完同里奧大人行 Jusco   因為做台灣節食品呀   買咗芝麻糊同蕃薯麻薯   之後好想食雪糕   所以去麥當勞食朱古力新地   咁 Cashier 多數係女仔   所以派里奧大人去買多朱古力醬多花生朱古力新地   飽到呢 ~

番到屋企即沖涼   再麻煩里奧大人切個橙比我食幫忙消化呀   我好怕拻橙   因為會拻到手指甲頭流血㗎   .所以一定要里奧大人幫手先得 ~

依家覺得 "亮相" 好好睇   因為估下啲人做咩都幾好玩   順便用下個腦   但有啲真係好難估   最搞笑係估邊個做過 "430 穿梭機童星"   廿年前喎   咩樣都變哂啦   真係咩都有   好搞笑 ~

~~~~

今朝吽雨   非常焗呀 ~

想食米粉但無位   所以去食磨菇腸片蛋三文治烘底 + 熱央 ($15)   食完拿拿聲番公司   因為驚落大雨呀 ~

晏晝同里奧大人去麥記   食兩個至尊漢堡餐   因為有 $10 Cash Coupon 所以好抵   呢餐好飽好熱氣呀 ~

行到半路落好大雨   搞到褲腳濕哂   麻鬼煩   我覺得落雨真係好煩   唔明點解啲人會覺得雨中漫步好浪漫嘅呢 ?!   不過可能係我老餅啦 ~