做節住家飯 @ 媽咪屋企 ( JUN-2008 )

尋日超開心   因為番媽咪屋企食飯做節呀 ~

放工即走啦   好想快啲見到媽咪呀   番到屋企門都未開   深愛嘅朱朱已經熱烈咁歡迎我喇 ~

因為要等埋家姐同里奧大人先開飯   又無嘢好做   所以我就飲兩大碗湯同食啲自家糉先 ~

當工人 "北" 湯時   媽咪話 "北" 多啲龍眼肉同當參比我   我扮嘢問媽咪做咩 "北" 多啲比我嘅 ?!   媽咪話知妳好鍾意食咪 "北" 多啲囉   真係好感動呀   因為媽咪時時刻刻都會記住我鍾意食啲咩   我一去媽咪屋企就會可以一次過食哂自己鍾意食嘅嘢   世上只有媽媽好是真的   不過爸爸都好好㗎   不過無懷胎十月之苦之嘛   總之爸爸媽咪都係好好啦 ~

是日晚餐餸菜好似係蒸花蟹  + 蒸石斑仔 + 蒸鮑魚 + 豆角炒豬潤  + 清炒菜心 + 自家糭 + 清保涼當參豬骨湯   食到好飽   飽到有啲暈暈哋   係真㗎   唔知點解次次好飽就真係有啲頭暈嘅感覺㗎 ~

9 點就同埋家姐一齊走喇   仲係落雨   好煩呀 ~

~~~~

 

今朝里奧大人 7 點 15 分出門口時同我講話依家黑雨   但佢就照番工囉   因為好多 Urgent 嘢要搞呀   而我都唔敢瞓啦   因為唔知黑雨幾時會除下嘛 ~

咁咪睇電視囉   睇到 9 點幾就他他條條去 KFC 食牛角包 + 咖啡 ($12)   之後就去百佳入貨   行行下   差唔多 9 點 50 分   同事打嚟話 10 點仲係黑雨就唔駛番喇   咁即係唔駛番啦   所以就用超 Relax 嘅心情環繞一周喇 ~