沙茶醬炒火腿絲米粉 + 牛油炒粟米 + 蕃茄薯仔魚湯 + 芝麻糊 + 跑步機 ( JUN-2008 )

終於無落雨喇   真係買餸都買得開心啲呀 ~

買咗 1 條大眼雞魚 ($21) + 1 份蕃茄 ($5) + 1 個薯仔 ($3) 就番屋企...之後換衫做機喇 ~

是日懶餐 - 沙茶醬炒火腿絲米粉 + 牛油炒粟米 +  蕃茄薯仔魚湯

沙茶醬炒火腿絲米粉 - 牛頭牌沙茶醬真係好正   唔怪得之通少成日極力推介沙茶醬啦   唔想出街食   所以用火腿絲炒米粉   又方便又好味 ~

牛油炒粟米 - 勁 Easy   又勁好味 ~

蕃茄薯仔魚湯 - 我鍾意用大眼雞魚滾湯   因為好似無咁多骨咁   紅衫魚太多骨喇   咁即係唔駛食   好浪費啫   唔知係咪好耐無飲湯   所以覺得啲湯超甜超好味呀 ~

唔係自己讚自己   我真係覺得 3 樣都整得好好味 ~

沖埋涼之後做 Mask   再食生果同即沖芝麻糊   食咁多嘢係因為想抵抗力強啲   無咁易病 ~

~~~~

今朝天氣好好   再加上星期五   所以仲更加開心   連個胃口都大啲呀   所以食咗丁腸麵 + 熱央 ($19)   食飽個人都精神百倍呀 ~

番到菇場有嘢做   所以時間過得好快 ~

晏晝帶飯   因為里奧大人同同事去飲茶   一路食一路同卡姑 MSN   啲時間過得特別快   如果 Office Hour 係咁就好喇   唔駛成日等到頸都長先放工嘛 ~