Shakey's Pizza + 跑步機 ( JUN-2008 )

雖然星期六   但估唔下晝到要一個人喺屋企渡過 ~

無嘢做就去屋企附近商場買嘢   天氣勁熱   所以去買 1 包袪濕料 ($12) + 1 斤半冬瓜 ($4.5) 就番屋企喇 ~

番到屋企即刻煲冬瓜去濕水   其一消暑   其二係里奧大人成日話好攰   我覺得佢濕氣重   但里奧大人話佢係熱氣唔係濕重   話焗花旗參比佢清熱好喎 ~

谷鬼氣唔煮飯呀   去 Shakey's Pizza 食晚餐   食級脆雞 + caesar salad with smoked salmon + 9 " pizza (名叫 : 火星任務 - 辣肉腸 / 火腿 / 意式肉腸 / 燒烤醬)   唔知係咪肚餓   樣樣都勁好食   脆雞真係正到爆   熱辣辣脆卜卜   同埋啲雞肉好滑   Pizza 就薄到飛起   正呀   但覺得個 Saesar Salad 好細碟囉   不過美中不足係太嘈喇   嘈到酒樓咁   諗住食西餐唔會咁嘈   點知一樣咁嘈   全程食嘢唔想講嘢   因為好想食完快啲走呀   埋單 $197 OK 啦   好過食 Pizza Hut 嘛 ~

食到好熱氣咁   所以要去食麥記食新地解熱氣呀   當然又派里奧大人買多朱古力醬多花生新地啦   食完真係好飽呀   之後番到屋企坐多陣就同里奧大人一齊做機喇 ~

番到屋企都仲係好飽   生果都食唔落呀 ~

~~~~

今朝 11 點先起身   所以無番教會呀   又無得出街食早餐   所以又要我出手煮丁丁 + 咖啡   里奧大人就最開心   我懷疑佢係特登遲起身扮趕唔切出街食早餐 ~

難得有時間   所以可以一齊去做機   之後再去街市同超市買餸   熱辣辣好辛苦呀 ~

為咗要飲珍珠奶茶   所以晏晝去大家樂食 Tea   食燒鴨瀨 + 珍珠奶茶   里奧大人食叉燒瀨 + 可樂 ($43)   我覺得碗叉燒瀨比之前少咗好多呀   所以要再去食魚肉燒賣 + 粉果 ($10) ~

食完就去零食物語買零食   之後就番屋企喇 ~