自家制叉燒 + 黃金西蘭花 + 無花果蘋果瘦肉湯 + 自制光酥餅麵包

難得黑雨唔駛番工   但里奧大人又番咗工噃   得我一個係屋企   大把時間比我做家務   所以就拖地   洗衫   熨衫過日晨   之後再玩下焗麵包   等發酵過程都知唔掂㗎喇   因為一啲都唔發   仲係濕立立咁   我都無眼睇 ~

里奧大人 4 點幾先番到屋企呀   拿拿聲去大家樂食 Tea 喇   食雞翼配炒麵 + 燒鴨瀨 + 花生醬西多士   唔知係咪晏食嘢   所以覺得好好味呀 ~

番到屋企即刻睇下啲麵包發酵發到咩地步先   點知同頭先一樣   無發過同濕立立嘅   不過唔理照焗   焗出嚟好香喎   我覺得口感唔似麵包   里奧中人話似光酥餅咁   不過甜咗少少   但好鍾意食喎   焗完包又喺時間 Ready 晚餐喇 ~

是日晚餐 - 自家制叉燒 + 黃金西蘭花 + 無花果蘋果瘦肉湯

自家制叉燒  - Blog 友 亞 See 話焗叉燒好易   所以咪學焗囉   買 $12 梅頭   用 3 大湯匙叉燒醬醃咗 6 個鐘 (但無落酒)   焗出嚟樣衰到不得了   又唔燶又無味   最恐怖係反轉焗另一面時啲汁漏咗出嚟整燶咗個鐵盆..搞到個焗爐出哂煙   嚇死我呀 ~

黃金西蘭花 - 學人用鹹蛋黃碎嚟   但啲鹹蛋黃唔夠黃   肉酸到爆   我又唔識打茨更加肉酸   見到樣衰嘅嘢真係唔開胃   所以為咗增加食慾就加 XO 醬去炒   咁就惹味好多啦 ~

無花果蘋果瘦肉湯 - 無花果 8 粒 + 蘋果 3 個 + 陳皮 1 塊 + 瘦肉 ($20)   煲 2 個鐘   好在呢個湯都好飲   如果唔係真係會唔開心成晚㗎 ~

其實今餐晚餐同焗麵包都係第一次整   但就唔係咁掂  弱小心靈受到極大創傷呀 ~

~~~~

今朝瞓到 11 點 15 分   所以無番教會   咁晏連早餐都無出街食呀   所以就煮里奧大人最鍾意嘅丁丁 + 咖啡喇 ~

食完做下家務又已經到食 Tea 時間喇   唔知食咩好   所以決定一路行一路睇   想食越南嘢   但 3 點幾都要等 8 張枱   點等喎   所以最後都係去茶餐廳食 Tea   食炸豬扒麵 + 炸菜肉絲麵   再嘆杯涷奶茶   超正呀 ~