焗豬扒飯 + 金銀蛋莧菜 + 蘋果無花果粟米瘦肉湯 + 跑步機 + blog 友 (噹媽) 聚頭 ( JUN-2008 )

天氣太熱   番到屋企個人好似散哂咁 ~

喺屋企整呢樣嗰樣   好快又 4 點幾   係時候 Ready 煲湯喇 ~

是日晚餐  - 焗豬扒飯 + 金銀蛋莧菜 + 蘋果無花果粟米瘦肉湯

焗豬扒飯 - 其實唔想開焗爐   但為咗要用埋支差少少就過期嘅芝士粉先整焗豬扒飯咋   不過整得太多   所以要留番第晚食 ~

金銀蛋莧菜 - 又係要清過過咗期一日嘅雞湯   又要清埋皮蛋   所以就整呢個菜喇 ~

蘋果無花果粟米瘦肉湯 - 清清哋   我覺得好好飲呀 ~

食完洗完沖埋涼就同里奧大人一齊睇獎門人   笑到標眼水呀   真係好似好耐未咁笑過呀   除咗同冰姑卡姑 MSN 之外   哈哈 ~

~~~~

今朝勁熱   所以食芝腿菠蘿包 + 涷奶茶小甜   勁好味呀 ~

番到菇場無咩 Mood   只係好期待食 Lunch ~

晏晝同里奧大人同 Blog 友 噹媽 去茜廊食 Lunch 呀   好開心噹媽特登嚟搵我食 Lunch 呀   第一次見到噹媽啲感覺好得意   因為真係估唔到係網絡世界識到朋友   睇 Blog 覺得噹媽係細細粒   瘦瘦同聲沙沙嘅   但原來噹媽把聲好清好甜好高音㗎   同埋真人靚過相好多呀   皮膚白白咁   又瘦喎   我已經特登着黑衫黑褲啦   但企喺噹媽隔離   顯得自己成隻企鵝咁呀 ~

 

一路食一路傾   好開心呀   但噹媽食好少嘢咋   唔通唔好食 ?!   等我仲成日同里奧大人講話噹媽好食得添   第一次見   我當然要扮斯斯文文啦   用刀叉切春雞真係好煩   但又唔好意思第一次見人就用手扯開嚟食   唔想嚇親人嘛   哈哈 ~

仲有一樣勁窩心嘅事   就係噹媽知我星期六煲咗冬瓜水   所以朝早特登整咗支愛心酸梅湯   再買咗罐濕疹藥膏比我呀   好感動呀   我一早都估到噹媽會比嘢我   所以星期六我都特登買少少禮物比噹媽做見面禮呀   噹媽   辛苦哂妳喇   下次唔駛咁客氣呀   唔係 Bad List 妳㗎 ~

  
最可惜係 Lunch 時間有限   希望下次見噹媽嘅時間可以耐啲啦   女人多嘢傾嘛 ~