檸檬牛油蛋糕 + 杏仁餅 (炭燒版) ( 8-AUG-2009 )

杏仁餅 - 個面好靚 (我覺得)
個樣勁似雞仔餅 (我覺得)   個底又變黑炭   批哂啲黑炭   食落唔錯㗎 (我覺得)   比咗一粒里奧大人食   都唔記得佢 Comment 係乜   只係用好愛莫能助嘅眼神望住我   話點解個底成日都會黑炭嘅
檸檬牛油蛋糕 - 真係好香好靚咁 (我覺得)
其實再翻焗之後   成個面都黑炭   無哂心機   所以無影相   呢幅係批哂先影相   所以蛋糕面嘅黑炭碎都無掃走就照影相   最後批哂啲黑炭   得番半個可以入口   好在都好香檸檬味   都 OK 咁啦

( 8-AUG-2009  SAT )

心情靚又有 Mood   所以又試焗杏仁餅   今次糖嘅份量係正確嘅   因為里奧大人話要比佢 Look Look   費事又計錯喎 ~

今次唔用完粒 Hazelnut   焗熱之後再整碎   覺得成塊有 Hazelnut 會好食啲 ~

但係點解又係咁嘅   點解又會個底一樣係黑炭嘅   我已經用牛油紙墊底啦   唔通要用網先唔變炭   但點解個面又唔黑炭嘅   好煩呀   唔整喇   浪費哂我啲心機 ~

雖然失敗 Again   但焗開又幾好玩喎   所以焗埋檸檬牛油蛋糕喇 ~

焗出嚟個樣好靚呀   滿心歡喜切第一件嘅時候   上層有啲濕軟   以為自己咁醒焗到外脆內軟   超開心   但直覺話我知我唔會咁醒   再切第二件覺得可能因為係檸檬液關係   所以會濕濕哋   但切第五六件時覺得都係唔對路   試下口感   應該係仲未熟   係蛋漿咁款   所以又要再焗 ~

食譜焗 40-50 分鐘   話如果用竹簽桔入蛋糕內收放自如就得嘅   咁我真係好驚又變黑炭   所以見 30分鐘已經好金黃色就桔一桔   好收放自如   以為搞掂添   但點解會唔熟㗎 ~

之後再用 180 度焗 10 分鐘   搞錯呀   咁快變黑炭嘅   嚇到我呢   但再切個心都係未熟   再用 120 度焗 10 分鐘   但焗完先知原來個焗爐唔熱嘅   就嚟顛啦   又要轉番 180度喎   焗咗 10 分鐘   之後見焗爐出哂煙   嚇到即刻熄爐   好在今次熟哂咋   唔係真係以後都唔再焗蛋糕同曲奇呀     

蛋糕面同邊都係黑祟   點搞呀   批埋哂啲黑炭   得番半個蛋糕咋 ~

依家啲牛油咁貴喎   仲有我啲心機呢   究竟係咪因為焗爐問題   還是係我問題呢   衰心急 ?!   點都好啦   幾難食都要食啦    救命呀 ~