香煎鯰魚柳 + 什豆肉碎炒飯 + 南瓜粟米栗子紅蘿蔔豬展湯 ( 16-may-2010 ) + 跑步

( 16-may-2010 sun )
今朝 9 點半同里奧大人一齊自然醒咗 lu   所以去食早餐   早 d 食   早 d 去跑步仲好 ~

跑完步番屋企梳洗   再抖半個鐘就番教會   時間安排得非常之好呀 ~
里奧大人突然好想食炸兩   所以去熟食中心睇下   見到魚蛋麵居然未收檔   所以即去食啦   平時兩點已經賣哂架喇   感恩 ~

之前喺教會   里奧大人借我部電話查英文字   之後佢幫我袋住   點知到我要用電話嘅時候   發覺仲喺字典嘅版面   我同里奧大人話要 close   如果唔係好易 hang 機   佢話佢諗住一陣再用   我話到依家你都無用   乜一陣呀   之後佢發脾氣話都話一陣用咯   我咪話乜一陣呀   又唔見你用   你無 close 就無 close   唔好話一陣用   之後佢話我成日嘮嘮嘈嘈   我話唔係你成日用完無手尾   我駛咁呀 ( 其實好想大聲鬧佢頂你個肺   自己無手尾仲話人   不知所謂   不過喺街嘛   費事做戲比人睇咁 ) ~

番到屋企各自為政   見到佢背影都憎呀   所以去廚房煲湯   大大力冚煲蓋   睇煲蓋嘈定我嘈   哼 ~
雖然我好掹   但呢   佢個人格係咁無手尾   都幾難會改   倒不如我改啦   就係唔會再執佢手尾   佢鍾意開燈唔熄燈   開冷氣唔關門   飲完 d 杯唔洗   d 嘢周圍放   我唔出聲話啦   電費比多 d   冷氣開大 d   大小強多 d   唔見嘢多 d   我無問題架   我做嘢不嬲好有手尾   到時搵唔到嘢   千其千其咪搵我就得喇   心淡喇 ~
是日晚餐 - 什豆肉碎炒飯 + 南瓜粟米栗子紅蘿蔔豬展湯 + 香煎鯰魚柳
香煎鯰魚柳 - 用胡椒粉 & 蒜鹽醃咗一個鐘   味道唔錯   最緊要唔好腥就得喇 ~
什豆肉碎炒飯 - 個飯晏晝先煲架咋   諗住自己帶什豆腸仔炒飯做 lunch box   不過突然諗起有豬展   所以即刻切絲黎整炒飯   好過浪費 d 豬展   因為我唔食呢 ~

南瓜粟米栗子紅蘿蔔豬展湯 - 好想飲呢個湯   所以煲喇   超甜呀 ~

今日又買咗大樹菠蘿   但好淺色   不過都幾好味   同埋幾爽口 唔錯呢 ~