( 8-may-2010 sat )
今朝要番工啦 但好似好攰咁 不過算啦 番半日好快過嘅啫 ~
晏晝同里奧大人去將軍澳搵姑奶飲茶 之後再去拜爸爸 ~
5 點左右諗住買 Hard Disk 點知收到家姐電話 話媽咪比車撞到 嚇到我呢 即刻打 999 要登記好多資料 但我話唔知當時發生乜事 唔喺現場 而家姐只係講咗地點比我知 依家趕緊去 麻煩盡快叫救護車到現場 ~
噢 原來媽咪係 "喺上旅遊車梯級時 隻腳無力 所以右腳嘅上 5 吋下 5 吋撞咗落樓梯 " 坐喺車度已經痛痛地 但估唔到番到屋企咁嚴重囉 隻腳瘀腫 手掌咁大嘅瘀血泡 ( 救護員話應該撞爆條微絲血管 問題唔大 ) 我就跟車 里奧大人就自己坐的士去急症室等我地 因為媽咪血壓 & 心跳比較快 所以停留咗一陣再量過 確保正常先開車 ~
去到 A & E 就即幫媽咪登記 但我頭先嚇一嚇 肯定聽嘢聽到唔清唔楚 所以叫里奧大人喺 A & E 入面陪媽咪 感恩醫生話媽咪無問題 又唔想放血 因為可以自然咁等自己吸收 又話媽咪一個人喺屋企 痛到都係行唔到 留喺醫院觀察仲好啦 之後就陪媽咪上病房 lu ~
上到房之後 d 護士又係超級好人 我同里奧大人講唔該 佢話 " 唔駛唔該 唔該妳 " 之後另一個護士又超級好人 見我地無坐椅 即刻拎張坐椅比我 真係好感動架 因為 QE d 護士唔係咁架 唔理妳呢 ~
諗住都 7 點 應該等唔到醫生 因為唔係緊急病情 但好感謝神保守 兩位醫生 7 點 8 到咗 都話媽咪隻腳無乜事 因為食咗薄血丸 所以先腫到咁 留院等到自己吸收哂 d 血就可以出院架喇 ~
好感謝天父同里奧大人 因為今日如果唔係約里奧大人家姐飲茶 再去拜爸爸 之後等咗 45 分鐘的士 再要去官塘廣場買嘢 根本我同里奧大人就唔會喺官塘 咁就陪唔到媽咪 家姐又要特登喺屋企出黎 咁都需要 1 個鐘啦 同埋好在里奧大人喺我身邊 好冷靜咁幫我手 如果唔係真係連我都入埋去 A & E 架喇 ~
本來今晚係同里奧大人屋企聚餐 但無計啦 我同里奧大人都好攰 去觀塘食粉麵算喇 ~
番到屋企再問家姐點解妳話媽咪比車撞 原來家姐話媽咪上旅遊車唔小心撞到梯級 隻腳痛到行唔到 所以自己打唔到 999 喎 哎呀 點解我會聽到比車撞架 真係個人緊張聽乜都唔知 得個驚字 自己嚇親自己添 噢 ~
沒有留言:
發佈留言