車仔麵 ( 外賣 ) @ 屋企 ( 2-jun-2010 )

( 2-jun-2010 wed   A/L )
呢日 OFF   因為陪媽咪去覆診   所以朝早陪埋里奧大人食早餐再上媽咪屋企呢 ~

坐 van 仔嘅時候   坐隔離單邊位嘅阿叔真係衰到無人有   點解咁講呢   佢無啦啦望一望我    我咪望一望番佢囉   之後見佢睇報紙   原來睇風月版   好心啦   都唔爭在果幾分鐘啦   不知所謂   同里奧大人講呢 d 人真係衰   點知佢話佢見過一個仲變態  話說佢有日同同事過馬路   見到有個的士司機   喺等客期間半個身伸咗出車黎睇本鹹書   里奧大人同同事同另一個過路男人都比佢嚇到目瞪口呆呀   唉   真係乜人都有呀 ~

同媽咪 10 點半出門口覆診   見醫生嘅時候係會睇到媽咪嘅傷口   醫生同護士問我驚唔驚   嘩   我話妳咁問係咪好恐怖架   佢話有 d 人會驚唔睇   所以同妳講聲   唔係一陣妳同媽咪一齊暈咗都唔知救邊過好喎   不過我都立咗一立啦   真係好恐怖呀   手掌咁大嘅 size 無咗塊皮喎   所以醫生都建議植皮手術喇 ~

後尾打埋比家姐同里奧大人   我地一致都認為植皮好 d   因為醫生話如果要等自己埋傷口    起碼個幾月   仲要日日洗傷口   兩星期覆診一次   同埋驚中途細菌感染   仲有就係傷口嘅皮會拉薄咗   郁嘅時候可能會痛   但做植皮都有風險   就係麻醉藥令到塊皮可能唔會再生   要再做   媽咪多病痛   所以上次做完個心口唔舒服   所以有 d 驚   但兩位醫生都不約而同話上次妳都做咗全身麻醉啦   同埋麻醉師會衡量過   如果唔得就肯定唔會做   所以唔駛驚   之後媽咪都決定做啦   洗傷口好痛   要食止痛藥架 ~
之後我就陪媽咪上病房   好感恩見到醫生   佢一見到媽咪就話妳做唔做呀   媽咪好驚   醫生話比妳諗一晚啦   最緊要妳意願   之後佢再解釋做手術嘅好處同風險   媽咪最後都決定做手術   始終紮住隻腳都好辛苦   同埋傷口仲痛嘛 ~

我買埋 lunch 比媽咪   靜靜雞陪埋佢食就走喇   費事比人趕啦   之後去買衫   再食埋麥記就番媽咪屋企休息 lu ~

同埋家姐姐夫一齊探媽咪   之後里奧大人都黎埋   好在媽咪有胃口食嘢   咁即係佢唔係咁驚囉   凡事要向好果邊諗嘛   做完之後可以周圍去玩   幾咁好呢 ~

落雨濕濕費事塞車趕唔到拎中藥   所以 7 點 45 分走喇   無乜胃口   所以買車仔麵番屋企食   食完沖涼   無耐就瞓喇   今日頻頻樸樸都好攰下呀 ~