甘味讚岐手打烏冬 @ APM ( 10-jun-2010 )

七味粉魷魚鬚 - $12 / 4 條   得果 d d 七味粉
雞軟骨餃子捧 - 個皮脆卜卜   不過好小料囉 鐵板牛柳粒蕃茄湯底烏冬 - 估唔到有十幾粒牛柳咁多   好似食極都有咁   但個湯底唔熱架喎   上次食又係咁   但最奇怪的事就係里奧大人碗蕃茄湯底係熱架喎 oh
照燒雞扒 - 個皮燒到脆卜卜   超好味呀 

椰汁涼粉冰 - 我無飲呀
( 10-jun-2010 thu )
呢朝心情好好啦   食早餐都食得開心過人呀 ~  

我連續 3 日見到 Partner 都係瞓醒頭   即係有頭髮後面豎起咗咁呀   核突到呢   好心啦   雖則結咗婚   生埋仔   但都唔可以唔理儀容家嘛   里奧大人頭髮好硬   起身 d 頭髮實會彈出黎   所以實會沖濕個頭   再整番好去   落一陣街都會咁做   何況係番工呢   大佬   好鬼失禮人囉   上次仲核突   記得果日係落雨   佢着對粉藍色大碼膠拖鞋出街食飯 ( 好似着咗佢老公對拖鞋咁 )   果對真係屋企拖鞋   我望完都呆咗啦   仲要得兩隻腳指公搽咗棗紅色甲油   唉   點搞呀   買對涼鞋嘛   真係好鬼肉酸囉 ~    
呢日又落毛毛雨呀   本來想出街食   不過都係唔好喇   一陣落大雨仲煩   所以買車仔麵番菇場食算 lu ~


今晚又探媽咪   買埋飯比佢食   見佢好開胃   我都好開心呢   因為之前做完手術之後個心口唔多舒服   條氣又唔多好   但今次好好多呀   做完無咁辛苦   同埋第日已經有胃口   感謝神保守帶領呢 ~

唔好講笑   呢一個多月真係超攰   一星期探媽咪  一星期每月一到   一星期煮飯   一星期又再探媽咪   我覺得真係未停過咁架   晚晚一覺瞓天光添喎   但都係唔夠精神囉   擔心一個人真係好攰   同埋擔心到有 d 燥   好在我都忍到   無乜點發脾氣   算係咁啦 ~ 

其實我探媽咪好趕架   因為我驚媽咪餓呀   佢唔鍾意食醫院嘅飯   所以我放工買完再打的   D 時間都係啱啱好咋   可以 6 點開飯   如果又 MTR 又 van 仔   會遲 15-20 分鐘   我想媽咪可以快 d 食飯   又想多 d 時間陪媽咪   始終一個人喺醫院真係好悶好驚   自己趕小小就算啦 ~

里奧大人同姐夫成日叫我同家姐隔晚探媽咪   但我地又唔想喎   可能習慣做乜都一齊   同埋媽咪見到我地會開心 d 同定 d   咁自己辛苦 d 都無所謂   媽咪湊到我地咁大   真係唔想媽咪有事瞓醫院唔晚晚睇佢囉   除非自己真係超唔舒服   唔係都會心掛掛   但話比媽咪聽唔舒服呢   佢又心掛掛番妳喎   上次頭暈無睇佢真係覺得自己好衰咁   個心好唔安樂   所以盡量都會去睇佢呢 ~
同里奧大人 7 點 50 分走   咁就唔駛一堆人喺哂 8 點走   搭 Lift 同坐車無咁多人架   如果 8 點走呢   等 Lift 又耐   等車又耐呢   真係唔好睇小呢 10 分鐘呀 ~

諗住去沙爹王   點知超多人等位   即閃啦   再諗住去 APM 嘅赤丸   點知又執埋   最後去甘味讚岐手打烏冬食蕃茄烏冬   里奧大人未食過   等佢可以試下   最感恩係等咗 7 分鐘就有位呢   快過等 Food Court 呀 ~