蒜泥白肉 + 炒菜心 + 淮山圓肉杞子瘦肉湯 ( 3-apr-2011 )

( 3-apr-2011 sun )
超好瞓呀   所以晏咗起身無到番教會呢   又去大快活食早餐   無計啦   佢到 11 點半都仲有早餐食嘛 ~

3 年前覺得床褥太硬   瞓到腰骨痛   要里奧大人換張比較 "林" 身嘅   依家又覺得張床褥好似好 "林"   瞓到腰骨痛   所以又要里奧大人買番張 "硬" 嘅   好在佢肯買咋   今次買嘅係五段式床褥   希望舒服啦 ~
番到屋企就煲雪梨茶   之後就熨衫   洗衫   做家務   執屋   無停過呀   屋企乾淨整齊就最舒服   不過唔知點解執極都唔完咁   實在太多嘢啦 ~
差唔多 3 點就出發食 tea 喇   今次我想食餃子   真係非常感恩喇   因為下午茶原來係 3 點先開始呢 ~
( 左上 ) 泰式甜辣汁煎餃子 $17  / ( 右上 ) 韭菜煎餃子 $17 / ( 下 ) 辣韓式煎餃子 $17

有個小朋友唔小心倒瀉杯水   個大人叫個待應比塊布   佢就即刻幫個小朋友抹呀抹   嘩   我覺得超嘔心囉   塊千年抹枱布黎架   真係抹完仲污糟過唔抹呢 ~
買完茶包再去買相機電池   首先去百老滙睇   原裝電池 $300  備用電 $100   中原話呢個電池唔會再出   通行都無   豐澤話得備用電 $180   最後去番百老滙買原裝電池啦   都係百老滙穩陣 d   其實我最憎豐澤   因為之前里奧大人趕住買 Laptop   咁得佢地有   所以買啦   又話送電腦袋   點知拎完部 Laptop 之後   又話電腦袋未有貨   話一星期後有   之後又無   差唔多個幾月先有   對佢無哂誠信啦 ~

買完嘢就去超市買餸   撞正九五折   又買咗 6 罐粟米番屋企   之後乜都買 d 咁   重到呢   個 Cashier 都話好重   叫我小心 d ~
抖多陣就要 ready 煮飯喇   呢排對煮飯好有興趣呢   哈哈 ~

是日懶餐 - 蒜泥白肉 + 炒菜心 + 淮山圓肉杞子瘦肉湯
蒜泥白肉 - 問里奧大人想食清淡嘅梅菜蒸鯇魚定係惹味嘅蒜泥白肉   佢話要惹味喎   咁就整啦   唔係一陣又話我又比佢揀   但最後都係無得揀 ~
炒菜心 - 本來想買唐生菜架   不過唔靚   所以唔買 lu ~
淮山圓肉杞子瘦肉湯 - 醫師叫我滾呢個湯   咁面色都會好 d 呢  希望如此 ~