茄汁洋蔥豬扒 + 蒜蓉炒菜心 by 鐘點 ( 14-jul-2011 )

( 14-jul-2011 thu )
今朝早餐食菠蘿油   不過食咗手指尾指甲 size 嘅牛油咋   因為覺得就咁食個包已經好飽咁 ~


嘩   世界變喇   我居然覺得開冷氣好凍   唔通做完手術真係元氣大傷   個人會好虛   開咗一個鐘頭冷氣就要關喇   覺得好鬼凍   同埋呢日有風   自然風好舒服呢 ~
我之前一個星期驚有汗醃住傷口   所以基本上真係 24 小時開住冷氣   但唔開又焗喎   不過唔知係咪得一個人喺屋企   又唔駛點郁   所以覺得好凍咁呀   但已經開最細架喇 ~
諗住打比鐘點問佢黎唔黎   諗諗下都係唔打   無理由我打囉   但估唔到 12 點佢打黎問今晚買乜嘢 ~
晏晝食辛辣麵   不過只係落咗 1/3 包辣粉   其實都唔辣   不過算啦   要錫住個 body 嘛 ~


食麵唔開冷氣唔得架嘛   不過又係開咗個幾鐘就熄 lu ~
鐘點 5 點到   之後就話做嘢比較慢   一快就會好亂   話如果兩個鐘頭做唔哂   過咗時間唔駛比   我話唔好   話哂妳都係做嘢   我好肯定第一個鐘點講咗我要求嘅嘢囉 ~ 
佢今日用咗一個鐘熨咗 9 件衫   再用個半鐘拖地   煮飯   不過算啦   用埋聽日都唔再用佢   都唔好要求咁多喇 ~
今晚問里奧大人個豬扒汁好唔好味   佢話好味   梗係啦   又係我調味架   哈哈   無得煮就想煮   有得煮又唔想煮   女人   真係好煩呢 ~