韓式醬焗豬肋骨 + 蒜蓉蒸脆肉瓜 ( 5-JUN-2019 )

( 5-JUN-2019  WED )

好焗熱呀   好在我慣咗預早時間食早餐   咁就唔駛咁趕   唔係一定流哂汗都似 ~

早餐仍然食奶醬多   唔駛咬咁耐 ~

菇場忙呀   勁開心   時間過得勁快架 ~

Lunch Time 出去買脆肉瓜   實在太熱都唔想行咁耐   所以買埋魚皮餃河就即番菇場喇 ~

仍然忙   眨眼又放工 ~

番到屋企即預備   里奧大人 7 點幾番到屋企   佢話番到嚟有得食真係好   我話邊晚你番到嚟唔係有新鮮熱辣嘅飯餸食呀 ?!   講完之後佢係咁笑   我都覺得自己好搞笑   懶叻 ~

是日懶餐 - 韓式醬焗豬肋骨 + 蒜蓉蒸脆肉瓜  

韓式醬焗豬肋骨 - 今次勁有心機焗啦   所以啲肉都唔乾   里奧大人都話好食   幾咁比面 ~

蒜蓉蒸脆肉瓜 - $6.5 咋   同埋最緊要簡單   就咁加啲蒜蓉已經好好味 ~  

8 點 15 分同里奧大人一齊出去徑步   頭先已經出咗一身汗   勁想唔去   但里奧大人話都係郁下啫   咁我去啦   呢排膊頭同膝頭哥超級痛   所以都係郁下 ~

徑咗 25 分鐘   夠皮喇   已經成身汗   不過出汗感到真係勁正   但只限於出汗之後可以即刻沖涼   哈哈 ~

今晚沖涼最後係用凍水   真係出嚟無咁熱   以前後生真係朝早就沖凍水涼㗎   依家要開到最熱再暖水   所以唔認老都唔得 lu ~

尋晚 Whatsapp 大食   問佢收工未 ?!   因為次次佢 Whatsapp 我   我都要 What 下佢嘛   點知佢即打電話比我   好緊張問我咩事 ?!   笑死我   但當中又好感動   因為佢驚我有事呀   好日唔 What 佢喎   同佢傾咗半個鐘就收線   我要做 Mask 呀   呢排皮膚勁乾   最慘又有啲敏感喎   但唔理喇   照敷 ~

我 11 點唔夠都瞓   呢排堅攰   個人又比較熱   手腳又痛   都唔知係咪發炎添 ~