蠔油燜節瓜雞肶 ( 22-JUN-2019 )

麵都懶煮   所以我話 1 個杯麵 Share 食算喇   我頭痛先飲可樂咋   但今次唔太 Work

( 22-JUN-2019  SAT )

今朝瞓到 10 點半都自然醒喇   一覺瞓天光真係好好 ~

天氣咁熱就一定行商場架喇   如果無地方行就喺屋企休息 ~

咁里奧大人一開電話   咁見到姑奶話新電話有啲嘢無咗   咁要同佢整   咁都好   反正我哋有嘢拎去舖頭 ~

打的去舖頭   之後搞埋啲嘢就去飲茶 ~

藍天白雲   但超級焗熱

無諗過姑奶叫㗎   因為佢唔食層皮家嘛   但其實佢都係唔食層皮嘅   但好在佢無浸   不過就吐囉   真係問妳死未 ?!   咁佢因為整牙所以要食啲軟身嘢   佢話自己忙喎   攰到瞓覺前無刷牙   之後我話其實食完飲啖水漱漱口就可以   佢又繼續話忙喎   水都唔得閒飲   我想話都黐黐哋   飲啖水真係 3 秒唔駛   又唔係飲 3 年   里奧大人之後同我講   話同佢講都嘥氣   都費事理佢   哈哈

飲完就同里奧大人行 mega BOX   好似好耐無去咁   哈哈 ~

周圍行啦   行到 3 點幾就去 Starbucks 飲咖啡   飲完就去 AEON 買嘢   買咗二百幾蚊   我話依家啲嘢真係好貴囉   只係買杯麵咖啡汽水咋   好在呢啲無益嘢唔係成日買   最後去埋 Ikea 買急凍食物就番屋企喇 ~

焦糖咖啡 (大 $47) - 又貴又唔好飲   好在我係用 Cash Coupon

唉   個頭痛咗成個鐘   所以最後都係食粒 Panadol 頂住先 ~

差唔多 6 點幾就燜餸   好在里奧大人話唔餓咋   哈哈 ~

是日懶餐 - 蠔油燜節瓜雞肶

蠔油燜節瓜雞肶 - 呢 3 條已經放咗 6 日   再唔煮就應該可能會壞嘛   本來我想煮蕃茄雞肶意粉 + 鹹蛋節瓜湯   但頭痛所以唔想洗咁多嘢   所以一鑊煮哂兩樣嘢   我覺得自己好勁㗎   咁都諗到   因為我煮嘢唔叻   成日死咕咕   依家會轉下個腦   同埋真係唔想浪費囉 ~

洗埋碗真係休息喇   今晚到我要 Relex   叫里奧大人整套港產片比我睇   哈哈 ~

里奧大人 11 點瞓   我又未眼瞓   所以睇淘寶   又淘咗啲家用嘅健身運動用品   咁無得徑步   喺屋企做下運動都好啦 ~

一淘就淘到 12 點半呀   係時間瞓喇 ~