泡菜炒牛肉 + 麻油海蜇皮 + 粟米蛋花湯 ( 30-JAN-2020 )

牛骨湯麥麵   個湯超級濃味   我都有啲頂唔順陣味   但我買咗兩包   仲要頂多一次   嗚嗚

( 30-JAN-2020  THU )

尋晚瞓得唔好呀   好似好熱咁   唔知係咪打邊爐關係呢 ?!   但里奧大人話瞓得好   話無咁凍喎   咁搞笑嘅   一個凍一個熱 ~

早餐食芝腿治烘底   又係唔知食咩好 ~

菇場忙呀   想清埋啲煩嘢 ~

12 點 45 分食開年乳豬   影下相又傾下偈   食完再做下嘢   1 點半可以放工喇 ~

西瓜話今星期都唔駛番工   直到下星期一先番工   無計啦   有好多同事新年期間同大陸番嚟嘅親友食飯   包括我   所以隔離下係好嘅 ~

其實之前喺群組已經問有無同事離港 ?!   我哋有 2 個同事離港   其中一個去廣東呀   咁再問有無同由內地回港嘅人食飯   差唔多 1/3 同事都有囉 ~

難得咁早放工   所以去超市買嘢   估唔到真係無哂米   得番 5 公斤嘅櫻城牌珍珠米   咁就啱我喇   正想買好耐   同埋最吸引係全部都係真空包裝   我買一包就夠   我見好多人係買四包 8 公斤嘅米   同埋一箱出前一丁咁買   我就唔會喇   其一屋企好多糧食   其二香港根本唔會無糧食供應囉 ~

番到屋企就熨兩機衫   之後就抖喇 ~

里奧大人 6 點幾放工   咁我都要預備晚餐喇 ~

是日晚餐 - 泡菜炒牛肉 + 麻油海蜇皮 + 粟米蛋花湯

泡菜炒牛肉 - 牛肉係尋晚喺家姐屋企打邊爐食剩   諗住用燒肉汁炒兩炒   之後我記得有泡菜   所以整呢個餸喇 ~

麻油海蜇皮 - 過期 2 個星期   味粉都硬埋   但麻油又無變味   不過麻油味好淡啦   所以呢個小食係無咩味   哈哈 ~

粟米蛋花湯 - 菜貴   飲粟米湯算喇 ~

洗埋碗就休息   里奧大人 8 點要同同事 Conf Call   一傾就傾咗接近 2 個鐘 ~

聽日唔駛番工   所以睇 Youtube 睇到 12 點幾先瞓 ~