咖哩三寶 + 椰菜 + 開胃三寶 ( 14-SEP-2022 )

炒麵係里奧大人聽日嘅午餐   拉麵就係今晚食嘅   因為唔想特登煮飯   順便煮多過麵好過 

( 14-SEP-2022  WED )

尋晚瞓得勁差呀   可能轉天氣呢 ~

今朝瞓到 8 點先起身   咁樣先精神好多咋 ~

早餐食醬占多   仍然覺得好味道 ~

菇場忙咗陣就 Skype   呢排啲日子都係咁過 ~

Lunch Time 出去買無味粉拉麵同咖啡   職員話咖啡特價做埋聽日   所以我買夠 4 Pack 喇 ~

又係好想食雞翼酸辣米線   不過就一定要扣定   始終又唔係太餓   我最想食都係酸菜同芽菜   但唔想叫餸叫呢啲囉   所以買酸辣米線喇   哈哈 ~

仍然唔忙   仍然繼續 Skype ~

放工即走   里奧大人今日番半日   所以我番到屋企都要即刻預備晚餐喇 ~

今晚只係翻熱咖哩   同埋灼菜同煮麵   我最鍾意咁樣   因為唔鍾意開鑊炒嘢   要大清潔好煩   哈哈 ~

是日懶餐 - 咖哩三寶 + 椰菜 + 開胃三寶

咖哩三寶 - 之前喺 Taste 買咗陳皮魚蛋同魚腐   嗰時已經想整咖哩㗎喇   不過拖到依家先整   所以尋晚特登去買水魷同牛柏葉   我再加多條豬肉腸   咁里奧大人可以多樣餸帶飯呢 ~

椰菜 - 一個份量都好多   同埋我食椰菜係比較脹胃   所以今晚都只係食咗半個咋   又要留番聽晚食呢 ~

開胃三寶 - 想清埋隻皮蛋   咁整呢個開胃小食啦 ~

洗埋碗就即刻開機洗衫   之後沖涼喇 ~

今晚特登留肚食月餅  因為我驚壞呀   幾十蚊一個太貴喇   所以想快啲食埋去呢 ~

和記隆買嘅蛋黃綠豆   我覺得好味過香芋綠豆呢

家姐喺冠環球買嘅魚皮花生   真係好新鮮脆卜卜   唔怪得家姐係都要買比我食啦   真係好好味呀

都係家姐買㗎   又係好味   因為係新鮮整呢   連里奧大人都忍唔住要食   真係無咩幾何㗎

睇下 Youtube 又 11 點   我都瞓覺先喇 ~