黑蒜蔥油拌麵配滷牛展 & 炸薯條 + 椒麻醬油拌麵配炭燒雞串 & 金黃粟米 (外賣) @ 屋企 ( 21-SEP-2022 )

黑蒜蔥油拌麵配滷牛展 & 炸薯條 - 我鍾意食乾撈   食完無咁熱嘛

椒麻醬油拌麵配炭燒雞串 & 金黃粟米 - 里奧大人話個麵好油   因為底部真係好油   佢又無撈勻食呢   哈哈 

( 21-SEP-2022  WED )

今朝瞓到 9 點左右自然醒   梳洗後就整早餐喇 ~

食完就開機洗衫   之後休息休息 ~

差唔多 1 點就食 Lunch   今日特登食飯   睇下食完會唔會眼瞓   咁我第時可以喺菇場食下飯嘛   點知食完半個鐘後就開始眼瞓   真係飯氣攻心呀   哈哈哈哈 ~

瞓咗半個鐘都醒喇   之後沖涼   抖多陣就去睇牙醫 ~

去到診所   姑娘話我個樣好熟面口   妳係邊個嘅老婆呀 ?!   我話我係阿邊個嘅老婆   之後佢即刻話上次得妳老公自己嚟睇   做咩唔陪佢呀 ?!?!?!   哈哈   估唔到佢咁好記性 ~

4 點唔夠就到我   咁我順便講埋   我上年 12 月補完隻牙又開始痺痺哋   之後醫生話我磨牙磨到蝕哂喇 ~

但我同醫生講話以前我做嘢有壓力   我夜晚磨牙直頭嘈醒咗里奧大人   但呢份工無壓力喎   之後佢睇我啲牙肉   就話其實我係全日都係磨緊牙   所以即刻教我點放鬆 ~

又發現咗個新牙窿   好在係好細咋   所以拿拿聲補咗去   之後再剥智慧牙   醫生話我智慧牙歪咗少少   咁樣反而唔駛開刀剥   實在太感恩呢 ~

約埋下個月嚟整牙套就搞掂    都已經接近 5 點   買埋包香印提子就去里奧大人公司等佢放工   之後買埋晚餐就番屋企喇 ~

沖埋涼先開餐   真係好鍾意咁呢   哈哈 ~

呢排鍾意食有水份嘅生果   但就唔敢食咁多涼嘅生果   我都鍾意食提子   不過唔可以成日食   始終糖份好高呢 ~

我真係覺得口感似波子提

睇下電視同 Youtube 又 11 點   係時候瞓覺喇 ~