孜然焗雞扒 + 菠菜苗 + 蒜蓉包 ( 12-OCT-2023 )

( 12-OCT-2023  THU )

尋晚半夜起身去廁所   之後右手有啲痛   所以瞓得唔係咁好   本來想叫里奧大人買早餐   但尋晚買咗包   都係整早餐算喇 ~

早餐食芝士甜餐包   今次 2 個餐包夾 1 塊芝士   咁樣唔駛咁飽   哈哈 ~

菇場忙呀  做完都差唔多放飯了 ~

Lunch Time 行陣就去買雞翼酸辣米線   因為突然間超級肚餓呀   次次一忙就會咁 ~

因為保險 Agent 嚟   我要 Download Apps   但搞唔掂要 BG 幫手   不過都仲未搞掂   Agent 已經到咗   咁唔搞住喇 ~

聽到 3 點幾   之後再搞個 Apps 搞咗半個鐘   好在 BG 同我搞咋   我喺菇場做咁耐   呢個 Admin 係最好   一有咩事就第一時間幫忙   最開頭嗰個就因為同老闆 Friend 底   所以串串共   不過佢對我都無嘢嘅   但見佢對啲同事態度就唔好囉 ~

咁入咗好多次個人資料   入到連 BG 都記得我出生年月日   之後原來佢大仔同我同月同日生   哈哈 ~

咁今日有人嚟整窗簾   但就要搬開紙箱先整到   不過整完就唔會幫妳搬番紙箱去原位   阿後問 BG 點 ?!   BG 話梗係要整窗簾先啦   等佢整完再叫同事搬番原位咪得囉 ~

阿後又真係有問題   咩嘢係重要都唔知 ?!   同埋都只係搬開幾個紙箱喺隔離位置   仲要只係我平時 pack file 嘅紙箱   我一個女人仔都搬到啦   咁都要問點處理   唔怪得 BG 對住佢係勁勞氣 ~

放工即走   番到屋企即預備晚餐   因為里奧大人已經喺屋企等食   哈哈 ~

是日晚餐 - 孜然焗雞扒 + 菠菜苗 + 蒜蓉包

孜然焗雞扒 - 今次焗到有啲脆皮呀   勁開心   因為真係百年一遇   哈哈 ~

菠菜苗 - 半斤菠菜苗   煮埋都唔多   但咁樣都夠食   同埋菠菜苗無話 2 斤會平啲   所以我唔駛買咁多   呵呵 ~

蒜蓉包 - 之前食剩 5 塊芝麻包   今晚焗埋去喇 ~

洗埋碗就開機洗衫   之後沖涼喇 ~

今晚都好攰   所以都唔做家務   真係以前點攰都會做家務   依家年紀大   加上呢排身體狀況比較弱   我需要休息多啲咁囉 ~

迷你松子棗蓉   好大陣紅棗味呀   唔係咁啱我口味   哈哈

睇睇下 Youtube   其實 9 點幾已經瞓着   仲瞓到 10 點半   之後覺得仍然好眼瞓   所以即刻熄電視入房瞓喇 ~