芝士焗香草蜜糖豬肘骨 + 油麥菜苗 ( 15-OCT-2023 )

( 15-OCT-2023  SUN )

今朝起身有啲攰   但沖完涼就醒神哂喇 ~

同里奧大人去食早餐   係我星期日最期待   因為唔駛整同執同埋洗   咁食嘅時候   心情真係放鬆好多㗎 ~

食完就去里奧大人公司幫手   之後就陪阿妹去 Pantry 食早餐   食完就再去做嘢   勁哥見到我哋   話我哋由 8 點半開始傾   傾咗 45 分都未傾完 ?!   估唔到佢真係睇住時間   哈哈 ~

阿妹無啦啦講啲見鬼真人真事比我聽   話有對母子搭 Lift   個小朋友係 4-5歲左右   話部 lift 一開   小朋友就話好多人呀   但媽咪係見唔到有人囉 ~

另一個係有個小朋友同爸爸講話間屋成日有個男仔   仲畫埋出嚟係點樣   呢個先恐怖 ~

傾多陣就去番學   之後再去事奉   依家好開心可以嘗試唔同嘅事奉崗位   真係喺當中學到唔少嘢㗎 ~

今日差唔多 1 點先走得   所以要快快腳去買飯   因為里奧大人今日要開會呢 ~

食完諗住即買餸就番屋企休息   但臨走時見到皇太后   佢話教我拉筋   咁唔去唔得啦   里奧大人話佢開班都要限制人數   依家一對一教學呀   所以非常感恩呢 ~

皇太后咁我啲筋都算 OK   之後我話可能我都有郁下   又成日去買餸   佢話我都無煮飯嘅   我話妳做咩咁講呀 ?!   佢話前兩日見到里奧大人中午買飯呀   我話咁唔代表我唔煮飯喎   我係咁話我真係成日煮飯㗎喎   但佢唔彩我   哈哈 ~

真係搞笑   里奧大人真係無咩幾何去買午餐   點知一買就比人見到   嗰日應該係星期四啦   因為星期三係一日遊   邊會有時間煮飯喎 ~

話咁快又一個鐘   咁再去買餸   4 點先番到屋企 ~

沖埋涼就開機洗衫   之後大清潔屋企   做到 5 點幾都要抖喇 ~

我 6 點都預備晚餐   里奧大人差唔多 6 點半先番到屋企   佢又買咗紅豆燒餅   話我鍾意食喎   又話燒餅都唔肥   呢句好假   哈哈 ~

是日懶餐 - 芝士焗香草蜜糖豬肘骨 + 油麥菜苗

芝士焗香草蜜糖豬肘骨 - 呢 6 件都要 $56   不過都幾好味   有時唔想出去食又難得醃肉   買呢啲醃好咗嘅就最好   方便嘛 ~

油麥菜苗 - 里奧大人話做咩唔整豆豉鯪魚油麥菜   我話估唔到佢識呢碟叫油麥菜   哈哈   同埋我話今日好攰呀   唔想開鑊炒嘢囉 ~

洗埋碗就沖涼   之後同里奧大人睇 "思家大戰" ~

我睇完再睇 Youtube   里奧大人就做功課 ~

今晚 10 點半都瞓覺喇   算係正常時間   哈哈 ~