滷水豬手肉燥飯 & 鹽酥雞粒肉燥飯 (外賣) @ 屋企 ( 4-OCT-2023 )

我要熱飲   仲將啲辣醬比埋里奧大人   呢排要聽聽話話先   哈哈    

因為我比半盒飯比里奧大人帶飯   所以叫佢追加花枝丸做餸 

突然間好想食甜嘢   所以食個迷你蛋黃純白蓬蓉   係家姐之前比㗎   係時候要食埋去   因為無放入雪櫃呢

( 4-OCT-2023  WED )

感恩瞓得都唔錯   不過起身其實都有啲攰   始終食咗藥   個人係比較散啲 ~

叫里奧大人去買腿蛋治   因為我唔想整早餐呀 ~

菇場勁忙呀   不過真係要慢慢做 ~

幾快又到 10 月呀

做完哂嘢就打比家姐   同佢講番我尋日暈咗   佢勁驚呀   話休克失救死咗咁點 ?!   之後係咁叫我有事記得打比佢呀下 ~

我聽得出佢把聲好激氣   因為今次佢知道成件事發生嘅過程   佢應該覺得好恐怖   所以真係講又死唔講又死   哈哈 ~

Lunch Time 出去行陣   之後買皮蛋艇仔粥番菇場喇 ~

8 卦問我有無落辣椒油 ?!   我話食粥點會落呀 ?!?!   佢話點知妳   因為我喺佢心目中   真係乜嘢都要辣㗎   哈哈 ~

忙下停下   好快放工 ~

今晚都唔煮喇   叫里奧大人買外賣   買佢最鍾意食嘅台灣嘢 ~

里奧大人話本來叫椒香雞扒   但叫錯咗鹽酥雞粒   因為滿腦子係要記住加辣加辣   真係比佢笑死 ~

食完抖陣就開機洗衫   之後沖涼休息喇 ~

家姐 9 點打嚟   我都估到佢擔心我㗎喇   佢同糟糟講番我暈咗單嘢   佢哋怕我心臟病同中風   不過我話之前睇過醫生都話係腸胃敏感   同埋糟糟話我應該啲血上唔到腦   所以暈   我上網睇都係咁講   都係話咁情況係好 Common 呢 ~

我都真係要戒口㗎喇   咁等我身體回復番就去做運動   家姐係咁叫我唔好再食口水雞同麻辣烤魚呢啲呀   我話我會食清啲㗎喇 ~

今晚同里奧大人一齊睇 Youtube   睇啲泰國啲沙雕真係好好笑   所以睇到 11 點幾先瞓呀 ~