煎香茅豬扒 + 煎三文魚扒 + 炒三色粒 + 翻炒糯米飯 ( DEC-2007 )

祝各位 2008 年快快樂樂 健健康康

今朝 10 點起身   梳洗後就去太興食早餐   我食人氣早餐 (火腿生菜絲通粉拚滑蛋多士配即磨咖啡)   里奧大人食千年不變嘅早餐 (頂級午餐肉煎蛋出前一丁)   埋單 $41   唔係賣廣告   太興啲早餐真係好好食   之後番屋企沖涼洗頭就打的出發去教會 lu ~

崇拜完差唔多 1 點   里奧大人好想食 "阿婆豆腐花"   所以就食咗一碗熱嘅超級滑豆腐花   只係 $5 咋   真係好抵又好食 ~

行到 Boutique 見到我心愛嘅格仔褸   問里奧大人可唔可以買先 ?!   里奧大人好無奈咁叫我試囉   我同 Sales 講我有驕人嘅魔鬼身材驚唔啱   Sales 話我實啱嘅   咁我就試下啦   當我除外套試上身時   真係穿唔上呀   個 Sales 一路笑一路係咁釘住我驕人嘅魔鬼身材   話睇妳唔出妳咁 "旺" 喎   着咗外套真係唔覺妳咁 "旺" 噃   我心諗咩嘢 "旺" 呀 ?!   係咪勁呀 ?!   旺係鄉音呀?!   之後里奧大人就好大聲成個 8 婆咁笑住話妳 "旺" 咪即係話妳 "肥" 囉   因為有啲人係覺得肥嘅人就係旺夫   Sales 狂話妳 "旺"   妳咁醒都知點解啦   比里奧大人笑咗成 20 分鐘呀   黐鬼線 ~

之前 7-11 出咗細盒嘅 After-Eight Mint Chocolate   見過一次咁多   之後行過好多間 7-11 都無   點知比我喺另一個商場 7-11 買報紙時見到   所以即刻買番盒   因為我覺得好好食   同埋個包裝好神秘咁   其實百佳都有得買   但係一大條點食喎   真係食到死囉   買盒細細嘅過口癮就算喇 ~

由於里奧大人要去大眾買養身書籍同換証   所以要去大眾一轉   所以又可以屈里奧大人送個 Little Twin Stars 袋仔比我裝日記薄   自從我睇中醫之後   里奧大人對啲中藥醫書   調理身體嘅書籍好有科學精神   日睇夜睇   食啲咩飲啲咩都喺度講   食呢樣對啲咩好   飲依樣有啲咩好   真係以為自己係醫師上身咁 ~

行過路經 izzue   里奧大人話好想買啲 Casual 褸   所以分頭行事   佢睇佢嘅   我睇我嘅   太好喇   好短時間內比我睇中件短 Tee 做大特價   原價 $199 (50% Off) 即係 $100   所以即刻比里奧大人   好在里奧大人都有收穫   買咗 2 件褸   埋單九百幾真係好抵   因為可以買到啱心水嘅嘢 ~

行到肚餓   所以就同里奧大人去極之好食車仔麵   我食豬腸 + 鯪魚肉 + 豆卜幼麵   里奧大人食千年不變嘅牛腩 + 雞翼 + 魚蛋 + 生菜幼麵   餸就一般   但個辣汁就真係好正   再加杯涷豆漿 $37   抵到呢   之後去街市買三色椒 ($17) 就番屋企 lu ~

番到屋企里奧大人又要趕功課   我就忙整理 Recipe   其實係屋企見里奧大人嘅時間真係唔多   所以一有時間我就會裝佢   咁又可以見到佢而又騷擾唔到佢   太好喇 ~

是日晚餐 - 煎香茅豬扒 + 煎三文魚扒 + 炒三色粒 +  翻炒糯米飯

煎香茅豬扒 - 買咗 $10 豬扒   薄片有 4 塊   用香茅醃一晚   但太多香茅味   我覺得好難食  ~

煎三文魚扒 - N 年前買嘅   解涷後再用大量黑椒 + 鹽醃   但我都覺得好腥 ~

炒三色粒 - 紅黃綠椒切粗粒   再加幾條菜脯一齊炒   好清甜好好味 ~

翻炒糯米飯 - 隔夜糯米飯再翻炒   一樣好好味 ~

沖埋涼就即係敷 Mask   因為未來幾日會係非常乾燥 ~

~~~~

今朝里奧大人要北上   所以一個人搭車   今朝食咗 KFC 芝士雞腿包 + 咖啡 ($15) ~

晏晝又係食糯米飯   用微波爐唔記得加水   所以食嘅時候硬到食石頭咁 ~

今日好開心   因為放 4 點 ~

生炒糯米飯 + 腐乳唐生菜 + 冬蟲草花膠湯 ( DEC-2007 )

尋日晏晝同里奧大人食粉麵   我食牛丸米   里奧大人食牛腩雲吞麵 + 熱檸蜜 ($46)   我碗牛丸米真係難食到爆   牛丸又無味..我唔知係咩米粉   總之就係最憎食嗰隻款嘅米粉   所以呢餐 Lunch 食到好無心機   唯一令我開心係里奧大人可以陪我食 ~

食完就逛百佳   買咗豬𦟌 + 豬扒 + 雞蛋 + 豆漿 + 炸紫菜 + 湯圓 + 香蕉 + 廁所香薰...9 折後 $124.6   好開心咁啱有 9 折   可以慳番十幾蚊   之後再去街市買斤唐生菜 ($7) 就番屋企 lu ~

番到屋企又有人裝修   好嘈   里奧大人好攰要休息   照瞓可也   我就煲藥煲湯熨衫洗衫執櫃   再浸冬菇同瑤柱   醃豬扒   之後睇電視   但唔咁開咁大聲   .所以聽到好鬼辛苦   之後好好奇咁望吓里奧大人點解咁裝修咁嘈都瞓得着   原來係用廁紙塞住對耳嚟瞓覺   之後望完里奧大人先睇電視啦   唔駛自己聽得咁辛苦啦 ~

6 點半開始預備晚餐   里奧大人好開心咁問係咪好快有得食   答案係錯   因為係第一次整生炒糯米飯   所以要預多啲時間擺陣 ~

是日飯餐 - 生炒糯米飯 + 腐乳唐生菜 + 冬蟲草花膠湯

生炒糯米飯 (集合 3 份 Recipe 嚟整) - 1 條臘腸 + 1 條潤腸 + 1 件細臘肉 + 4 粒細瑤柱 + 10 隻細冬菇 + 10 隻蝦米仔 + 1 隻雞蛋 + 1 碗上湯 + 2 個量杯嘅白糯米   將所有臘味全部切粒再爆香   將蛋切絲   之後中火炒飯 +上湯   我無雞湯   就將雞粉加瑤柱水蓋 3 分鐘   聞到燶味   嚇死   即刻開蓋轉細火   再重覆炒飯 + 上湯   我唔知咩叫熟透   所以一路炒一路試   覺得啲飯腍劈劈   一啲都唔似糯米   個人好 Down   不過我都要繼續炒   終於炒到似糯米飯嘅口感喇   之後再加臘味   臘味炒嘅時候覺得唔夠   當我拎啲飯出廳嗰陣   都仲係覺得啲飯好少材料   再入廚房時見到櫃上面有瑤柱絲同冬菇粒   激死   要再兜過   將所有材料加埋一齊就非常好喇   覺得比例啱啱好   炒咗成半個鐘   真係炒到手都痛   好在里奧大人讚不絕口啫 ~

腐乳唐生菜 - 係跟傻媽嘅   但我只用咗 3 磚腐乳 + 2 湯匙糖加啲水   所以好稀   當然無傻媽咁好睇好食啦 ~

冬蟲草花膠湯 - 覺得花膠唔夠多   所以浸多條花膠就 Perfect 喇   其實冬蟲同冬蟲草係咪有分別嘅呢 ?!   點解湯包唔 Show 冬蟲草嘅 ?!   但嗰啲真係好似冬蟲草喎   不過算啦   三十幾蚊個湯包有當參+杞子+北芪+花生等等材料仲想點喎   所謂嘅冬蟲草   煲起嚟成條手指尾咁粗就好鬼恐怖   同埋啲湯好大陣藥材味   唔係咁啱我 ~

總括嚟講   呢餐晚飯都好好食   只係煮完攰啲咁啫 ~

小菜館 ( DEC-2007 )

尋日個心口有啲痛   唔知係咪做嘢緊張得滯   真係要學吓放鬆慢慢做先得   咁啱日里奧大人突然被急召北上   唔知幾時番   所以我索性唔煮飯   抖下先 ~

幸好同里奧大人差唔多時間番到屋企   可以一齊去食晚飯   今次去遠屋企少少嘅地方   試下其中一間嘅小菜館   叫咗涼瓜燜排骨 + 古法蒸桂花魚 + 生炒牛肉飯 ($109)  估唔到啲份量都幾大   涼瓜燜排骨比例一比一   桂花魚好新鮮   冬菇都好入味   但個豉油唔掂   無味嘅   里奧大人話碟炒飯好好食   講咗成百次   話啲飯係一粒粒喎   唔係一劈劈咁喎   即係暗示我平時炒飯係唔掂   一劈劈咁話囉   雖然無直接講   但讚咗成百次都知咩事啦 ~

由於啲份量真係太大   食到我同里奧大人眼癱癱   一定要兜大圈消化一下先番屋企   突然好想食金莎   想買又唔買咁   里奧大人話想食就買囉   仲話請我食添呀   所以我真係好開心   番到屋企頸渴到爆   所以呢間小菜館都未必會再去   太多味精喇 ~

是日甜品 - 非食不可嘅不倫不類芒果啫喱糖   因為整咗幾日   再唔食就掉㗎喇   不過最後我都係食咗一粒咁多   所以基本上會係掉咗去居多 ~

尋晚同里奧大人講晏晝心口痛   之後問里奧大人如果我死咗咁你會點   會唔會再婚   里奧大人話佢唔會喎   聽住先啦   再問多次如果我死咗你會點   里奧大人好不屑咁話嘥哂啲錢睇中醫   衰到佢吖   呢啲真係真心話喇 ~

~~~~

今朝發惡夢   咁啱鬧鐘響   所以醒咗   發夢見到成個雪櫃都係片裝芝士   望下 Expiry Date 已經係半年前   仲要係全部芝士都係過期   一路掉一路驚   嚇到我吖   個夢好真實   因為我成日買買買   買完又唔用   到過期就掉   試過一次過掉咗 8 包過期嘅出前一丁   真係心都痛埋   加上之前我掉咗啲買咗但無食到嘅甜麵豉 紅蔥頭.火龍果   覺得自己真係好嘥嘢   所以發埋啲咁嘅夢   新年願望係戒狂買嘢   只可以用咁多買咁多 ~

今朝起身煲熱啲中藥   點知尋晚扭得太實個保溫壺   開極都開唔到   里奧大人今朝要見客   可以瞓耐啲   我真係無辦法開到個蓋   所以好溫柔咁叫醒里奧大人幫手開   好在開到咋   唔係都唔知點算好呀 ~

諗住星期六可以同里奧大人輕輕鬆鬆食早餐   點知里奧大人要見客   得我孤零零一個人食早餐   我星期六多數食飽啲   因為平時 12 點半食 Lunch   星期六要成 2 點先番到屋企食 Lunch   所以今朝食咗餐蛋出前一丁 + 熱朱朱力 ($18)   其實我係叫熱 Horlick   點知佢聽錯咗係熱朱古力 ~

番到公司慢慢做嘢   因為有強烈嘅 Holiday Mood ~

肉醬意粉 + 磨菇粟米湯 ( DEC-2007 )

尋日仲有 Holiday Mood   個人仲係懶洋洋咁   好在幾日前已經諗好食咩嘢   如果唔係又會係無 Mood 煮出街食 ~

放工即走喇   落車就去惠康買嘢...買咗免治豬肉 + 4 罐細磨菇粒 + 1 大包珍珠米 + 1 支芝士粉 + 1 個細洋蔥 ($84)   本來想等里奧大人一齊先買米   但難得惠康有珍珠米   所以拼老命嚟拎都要買   加埋自己個袋又超級重   真係辛苦到死喇 ~

是日晚餐 - 肉醬意粉 + 磨菇粟米湯

肉醬意粉 - 將免治豬肉醃一陣   再切洋蔥粒   我多數先爆香洋蔥後加免治豬肉   再加罐細蕃茄膏 / 茄汁 / 喼汁 / 水同意粉兜勻   之後放落焗爐盆再加芝士粉放入焗爐   焗到聞到芝士味就搞掂   其實今餐煮肉醬意粉最大目的係用埋樽芝士粉   因為已然過咗期 10 日   但聞落仲有好香芝士味   唔想掉咗去   所以就用黎煮意粉喇   好彩終於都用得哂 ~

磨菇粟米湯 - 將罐細磨菇粒切片   因為買唔到切片磨菇粒   磨菇同埋粟米湯一齊滾   最後加埋雞蛋即成   非常簡單又好味又飽肚 ~

食完飯就同里奧人去買相機   本來想唔去㗎   但里奧大人係都要我陪...所以碗都唔洗就一齊出去買嘢喇   當散下步咁囉   買咗差唔多成個鐘   番到屋企仲要洗碗   無哂啲時間呀   嗚嗚 ~

~~~~

今朝食芝蛋治烘底 + 熱朱古力 ($15)   呢排飲慣咖啡   再飲番朱朱力有啲反胃感覺 ~

諗住番到公司無咩嘢做   點知忙到死   真係估唔到估唔到 ~

晏晝帶飯   啲意粉一樣咁好味   好彩我同里奧大人都無肚屙 ~

打牌 (外賣篇) ( DEC-2007 )

尋日約咗朋友亞勝同翠兒兩公婆 12 點半嚟我屋企打牌   所以教定鬧鐘起身   因為要再仔細打掃同執靚間屋   原本校咗 10 點半鬧鐘   但里奧大人 9 點半就醒咗   所以出廳睇書   享受一人世界   .而我就好努力咁瞓到十點半   之後梳洗就同里奧大人去太興食早餐 Share 芝士煙肉脆包配即磨咖啡 + 雞扒火腿多士配檸茶 ($41)   諗住食個包餐無咁飽   點知原來好鬼漏 ~

食完番屋企執屋 掃地 沖涼   搞都差唔多 12 點半   時間啱啱好   之後同朋友去餐廳食 Lunch   我食咗紫菜四寶湯粉絲配可樂   之後就上我屋企打牌喇 ~

好開心可以一連兩日都有我好喜歡嘅活動   又係好似尋日咁   食完 Lunch 打牌再叫下午茶   食吉列可斑沙律 + 司華力腸沙律 + 西多士 + 沙爹牛肉飽 ($76)   食完又再打   之後叫外賣   酸辣無骨鳳爪 + 串燒沙爹雞肉 + 清炒雜菜 + 鹹魚雞粒炒飯 + 泰式炒河 + 2 杯椰汁紅豆冰 + 2 杯青檸梳打 ($200)   方便快捷 ~

填飽肚有氣力又再打   打到 10 點半就完 lu   打咗 16 圈   差唔多 8 個鐘   好滿足喇   今次係我同里奧做大嬴家   大家都嬴咗百幾蚊   好開心呀 ~

連續兩日咁打   一停落嚟真係有啲攰   所以即刻沖涼上床瞓覺喇 ~

~~~~

今朝真係太好喇   因為好少人排隊搭車   而車程又快   比平時早成 20 分鐘   所以我今朝真係可以好他條食早餐   難得咁早   難得美心無人排隊   所以就去美心食吉列魚柳配腸仔 + 多士配即磨咖啡 ($21)   慢慢嘆   又有聖誕音樂播放   真係好正呀   我估好多人都去哂旅行   因為條街都好少人 ~

番到公司要重拾心情做嘢 lu   橫掂好朋友 CC 無番工無得 MSN ~

晏晝食菜肉餃生菜米線 ($13)   清清哋唔錯 ~

住家飯 @ 家姐屋企 ( DEC-2007 )

尋朝 10 點半一定要起身梳洗   因為要去家姐屋企食飯打牌再食飯呀   雖然係家姐   但都要買少少嘢嘅   所以買咗脆豬肉乾 + 肉鬆蛋卷 + 檸檬 + 八仙果比家姐 ~

12 點半去到家姐屋企附近嘅海港酒家飲茶   食咗竹笙上素餃 + 奶皇包 + 鹹魚肉片飯 + 芝麻糊 + 藥膳雞腳 + 椰皇燉雪烚 + 蝦餃 + 炸雲吞 + 叉燒腸 + 濃湯芥蘭 + 例牌燒鵝 + 薄撐 + 濃湯鮮竹卷 ($260)   燒鵝正到不得了   諗住例牌 $50 會好少   但估唔到都幾多件   我都係第一次早餐就食燒鵝   勁呀   今餐家姐同里奧大人搶住請   但最後都係家姐爭嬴呀 ~

之後就上家姐屋企 lu   家姐送咗聖誕禮物比我同里奧大人   我嘅禮物係 PM 鹽/胡椒粉樽   而里奧大人係 Esprit 毛巾   家姐啲禮物好啱用   因為里奧大人正想買毛巾出 Trip 用   太好喇 ~

2 點幾開始打牌喇   打到 4 點幾好鬼肚餓   所以叫工人買下午茶   油醬多 + 奶油多 + 西多士 + 麥樂雞   我已經好穩陣寫低   點知原來果間餐廳嘅多士係有厚同薄之分   工人唔識   所以買咗厚   諗住過吓口癮   點知食到好飽 ~

食完再打   打到 8 點幾就食飯 lu   今次 6 個鐘打咗 12 圈   真係末夠喉   里奧大人慘咯   因為一家輸三家   不過我仲慘   我嬴得最多   嬴咗二百幾蚊   所以我要嘔番百五蚊比里奧大人   因為我曾經講過話我羸咗會 Share 比里奧大人  嗚嗚 ~

又有住家飯食喇   青紅蘿蔔豬筒骨湯 + 白切雞 (沙薑辣椒紅蔥粒) + 美極煎蝦碌 + 蠔油冬菇豬手 + 蕃茄紅衫魚 + 炒菜心   原來呢餐飯要成五百幾蚊㗎   真係估唔到    出街食都得喇   不過同出面食係一樣價錢   但唔駛自己煮嘅無味精住家飯總好過出面食嘅味道飯嘅 ~

真係唔明我家姐點解由細到大都好鍾意八哥   但我覺得八哥真係好肉酸   最慘係家姐養到佢哋成隻豬咁   我要出盡九牛二虎之力先可以抱到佢   抱得耐都腰骨手腳都痛呀 ~

9 點幾食完飯   同媽咪一齊走 lu   呢日真係好好好好好好好好好好好好開心呀 ~

Pizza Hut @ 大埔 ( DEC-2007 )

眼見人家嘅公司開 X'mas Party 同放早真係幾無 Mood   有嘢都無 Mood 做   但低處未算低   因為好朋友 CC 都係無得放早   而佢仲係 6 點 15 分放工   咁我都安慰啲 ~

放工即走喇   因為里奧大人已經喺屋企睇緊我   所以我唔會比佢咁嘆   即刻命令幫我煲中藥 ~

同里奧大人相處咗唔少日子   我覺得里奧大人都幾了解我   我話晚餐想食其他嘢   里奧大人話去 Pizza Hut   好驚呀   我正想講話去 N 年都無去過嘅 Pizza Hut   問番里奧大人點解會去 Pizza Hut ?!   話因為知我想咗好耐喎   都唔知係咪 ~

食咗至尊細薄批 + 三文魚鮮果沙律 + 魚圈拼墨魚塊 + 石板街黑牛 ($121)   我真係恨食好耐 Pizza 喇   啲餅邊脆卜卜   6 件我食咗 4 件呀   加埋其他嘢   食完之後有極重罪惡感   今次真係好抵   因為之前姑奶比咗張 Coupon ($75)   再加埋有 9 折   $200 折埋減埋最後 $121 埋單   開心到爆呀 ~

食完 Pizza 就番屋企 Hea 下就去聽大埔浸信會音樂佈導晚會   詩班員真係好勁   唱得好好好好聽   所以啲時間過得好快 ~

番到屋企即刻沖涼   之後同里奧大人睇 "Keroro 電影" DVD   一路睇里奧大人一路讚自己好聰明好醒   話好在無喺戲院睇喎   咁悶   無 d 童真就真啦

青紅蘿蔔粟米栗子豬骨湯 ( DEC-2007 )

尋朝 9 點要起身喇   因為阿 Jack 受浸呀 ~

去到教會附近餐廳食早餐   食牛肉米線配煎蛋 + 熱好立克   而里奧大人食炸菜肉絲腸仔配煎蛋 + 多士 + 熱華田 ($41)   本來好想食牛肉腸   .但食完個米線已經飽到呢   好立克都飲唔落呀   嘥哂 ~

去到自己教會啲感覺真係唔同   好 Warm 唔似過客   但要等里奧大人下年底完成 MBA 課程先可以番自己教會祟拜   都幾耐下 ~

祟拜完之後要番屋企喇   因為里奧大人要趕功課   如果唔係 25 號 26 號 31 號都要番喺屋企做功課   要取消所有約會   我唔想呀 ~

落車去超市買咗 $24 豬骨再買 Cream Cheese + 益力多   番到屋企放低嘢就去大家樂食下午茶   食油占厚多士配奶茶 + 燒鴨瀨配咖啡 + 叉燒瀨配檸樂   勁飽   所以奶茶要拎走   不過最後都唔記得飲 ~

之後里奧大人陪我去街市買重型物品  就係 2 條紅蘿蔔 + 1 條青蘿蔔 +  3 條粟米 + 半磅栗子 ($30) + 1 份木瓜 ($12)   之後歸家 ~

是日晚餐 - 青紅蘿蔔粟米栗子豬骨湯

番到屋企即刻預備煲湯   青紅蘿蔔係咁劈   粟米栗子係咁拻   豬肉係咁飛水   之後煲 2 個半鐘就搞掂 ~

之後忙煲藥 忙洗衫 忙抹窗 忙執廚櫃 忙執 CD 櫃   攰到呢   6 點半先可以睇下報紙咋   睇到昂平 360 又無端端會停   好驚呀   幾時先會正正常常運作㗎   因為我好想去坐下呀   其實我坐摩天輪同纜車都會好驚   我會雙手捉實條柱唔敢郁   所以次次落車對手都會作抽筋   以前都可以玩下機動遊戲嘅   但個人越嚟越成熟就越嚟越唔敢玩   今年同里奧大人去 Ocean Park   除咗玩 3 歲小朋友都可以玩嘅旋轉遷秋同摩天輛外   坐遷秋驚飛咗出嚟   坐摩天輛驚跌咗落嚟   玩完已經嚇到半死   所以之後所有機動遊戲一律免問   仍都唔準里奧大人玩   去 Ocean Park 純粹係影相同睇 Show   睇海豚海獅表演   睇水族館   所以里奧大人喺果日講咗九十幾次話係觀光團   下次唔會同我去喎   好巴閉咩 ~

開飯喇   應里奧大人強烈要求   今晚就咁湯 + 渣就當晚飯   唔飽食生果喎   清清哋咁話喎   唔係講笑   真係飲湯食渣都飽到上心口 ~

之後就忙洗碗 忙熨衫 忙拖地   攰到連敷 Mask 都無力呀 ~

~~~~

今朝食開早餐嘅餐廳無開   所以買咗炒米粉 + 燒賣 ($8) 番公司食   份早餐抵到笑   因為原來仲有條腸仔   之後再飲公司免費供應嘅 Nescafe   好滿足呢 ~

晏晝同媽咪 婆婆 工人去食元氣壽司 4 個人 $153 找數又係抵   所以我請啦 ~

番到公司好無 Mood   因為應該無得放早   家姐公司有 Party 同放 2 點半   里奧大人公司又有 Party   CC 公司又有 Party   不過我公司做冬就有 Party   但我覆診無去到   所以都叫做有 Party ~

但公司有好消息   就係 2008 年全年有長短週   一大喜訊呀 ~

做冬 @ 醉福樓 ( DEC-2007 )

尋日放工即走 lu   因為趕住番屋企食晏同攻打四方城呀 ~

又要等 20 分鐘車   真係等到人都顛   次次星期六都係咁 ~

番到屋企附近就約埋里奧大人同水公 兒甥生女一齊去餐廳仔食經濟實惠下午茶   我食咗醒胃嘅廈門炒米 + 可樂 ($18)   食完再約埋奶奶 姑奶齊齊上屋企打牌 lu ~

由於屋企係用長方型餐枱做麻雀枱   所以里奧大人同姐夫就坐長嗰邊 (高大型專用)   而我同姑奶就坐短嗰邊 (嬌小玲瓏型專用)   好在我坐里奧大人上家   唔係會比水公由頭 "諸" 到尾   今次好開心   因為食咗舖小三元   諗住會旺啲啦   點知都要輸 $100 大元   仲要係輸比里奧大人添   講開其實里奧大人同我打牌都好慘   因為次次我出沖都會口數   最後如果里奧大人嬴咗我就唔會比   仲要佢比番我輸嗰啲比我   如果里奧大人輸呢   我都係唔會比   因為輸嗰個係我   我嘅錢即係佢嘅錢   比嚟比去好煩呀   所以今次里奧大人又要比番 $100 大元我喇   話時話   其實我可能有賺添呀 ~

之後同埋其他姑奶一齊去醉福樓做冬 lu   食家常小菜   20人埋單 $1,200 抵到爛   但啲食物同服務質數就真係差到不得了   所以我最憎正日做節 ~

番到屋企真係要認真執嘢喇   因為 26 號朋友上我屋企開枱   唔想失禮人呀 ~

差唔多 10 點就比自己休息   里奧大人又話想 Relax 喎   所以一齊睇 "變形金剛"   其實至從里奧大人讀 MBA 之後   真係好耐無試過一齊睇 DVD   真係好難得 ~

睇到 11 點幾突然好眼瞓.   所以一齊唔可以睇   要一齊瞓覺 ~

家傳滬曉 @ APM ( DEC-2007 )

尋日晏晝即走   因為趕住同媽咪飲茶   之後去覆診 ~

去酒樓飲茶   食咗咸肉糉 + 豬腳薑 + 羅漢齋粉包 + 排骨腸粉 + 鴛鴦燒賣 + 炒米粉 ($84)   做冬當然係我請啦   食飽之後就走人 lu ~

唔知點解次次飲完茶都會肚屙   我估應該係啲嘢食比較油膩   所以先會咁 ~

好樣衰呀   去到醫院等覆診期間就去洗手間   點知一出洗手間就有位派宣傳單張嘅阿姐向我走埋嚟   笑笑問我係咪有 BB   我估佢哋可能係 Sell 陪月   我去到邊都有人覺得我有 BB   唔通我真係咁似  ~

今次等咗 1 個鐘頭就到我   又唔駛食藥只係要驗血   因為醫生話我塊臉好青喎   梗係青啦   因為眼瞓到不得了呀   我最怕抽血   因為十次有九次都係好痛   我最記得第一次去抽血   抽完都唔知   等我以為抽血係唔痛嘅   原來唔係囉   有次個新丁拮住我隻手好耐   因為另一個護士已經拮第二個   然後好驚咁同隔離個護士講話唔得喇唔得喇   嚇到我吖   又唔敢望喎   幾驚係流血不止呀   原來係新丁搵唔到血管   所以另一個護士叫我拮另一隻手   搵唔到就即刻睇另一隻嘛   拮咗先話搵唔到   又唔知道自己手勢唔好   搞到我好痛喎   諗起都痛呀 ~

覆診完就番媽咪屋企 Hea 咗陣   飲下湯   6 點半就出發去 APM 家傳滬曉 lu ~

點知家姐話無訂枱好難有位   所以家姐即打比家傳滬曉   話 Walk in 仲有少量位剩   如果 10 分鐘內到都無問題嘅   搞到我即刻開行 Turbo 飛去攞位   好在都有位   但 8 點 15 分要交枱   好過無啦   之後等埋家姐同里奧大人就 Order 小籠包 + 饅頭宮保雞丁 + 家鄉燻魚 + 鐵板蔥爆牛肉跟薄餅 + 五香牛肉麵 + 麻辣雞絲粉皮 + 高力芒果奶黃 ($380)   尋晚最正係小籠包   因為好多肉汁好好食   其他都 OK   可能之前食過   無咩特別   里奧大人仲自備牛扒同漢堡包   好在無比人鬧咋 ~

同自己屋企人食飯最最最開心   所以食物質素係其次   因為我次次都係講多過食  哈哈   不過啲嘢都係油膩   因為食到一半又搞肚痛   辛苦到吖 ~

尋晚又發顛   因為係都要陪埋里奧大人睇完電視先瞓   所以又 12 點幾瞓   又唔夠瞓啦 ~

~~~~

今朝非常開心   因為同里奧大人食早餐   去赤丸食腸仔蛋出前一丁 + 熱華田   里奧大人跟風同我一樣 ($40)   本來想食烏冬   但個胃唔舒服   食烏冬好脹胃   所以食丁   唔知係咪太耐無食丁   所以覺得好好味 ~

對眼好澀   又有 Holiday Mood   所以罷工 ~

大家樂 @ 大埔 ( DEC-2007 )

今次真係自打咀巴添   尋日先話自己係一個賢妻   點辛苦都煮飯   但尋晚真係好攰唔係咁舒服   所以都係出街食   無得做賢妻喇   嗚嗚 ~

雖然唔駛煮飯   但要煲藥呢   仲論盡到以為教咗鬧鐘   點知心血來潮睇吓煲藥   點知已經煲到無哂水   好在睇吓   唔係煲都爆埋 ~

原來唔駛煮飯等里奧大人番屋企都幾悶下   喺大陸番嚟香港啲時間係好難預計   所以只有等   個人又唔想郁   所以又 "灘" 喺梳化整理 Recipe   因為成屋都係 Recipe   加加埋埋成尺厚   但唔明點解自己煮黎煮去都係嗰啲 ?! 我真係要好好作出檢討及加以反醒呀 ~

終於等到里奧大人電話   之後就出發去大家樂食晚飯 lu   其實唔想去大家樂   但咁啱收到之前換嘅大家樂 Cash Coupon $20   所以先去   如果唔係攝下攝下就唔記得用㗎喇 ~

同里奧大人 Share 西冷牛扒餐 (酥皮湯 + 焗薯) + 西蘭花炒斑片套餐 (白飯 + 例湯 + $4.5 轉花旗參蜜) ($59)   因為聽日我唔會帶飯   所以一定要食哂去   真係食到反胃 ~

番到屋企 9 點幾   所以即刻再翻煲藥   之後沖涼再敷 Mask   天氣涷敷 Mask 都幾攞命   唔敷又唔   做靚太真煩 ~

本來想瞓   但睇 Cable TV 嘅 Tattoo 節目又幾好睇   紋身好痛   但真係唔明啲人仲紋到成身都係   啲人都幾抵得痛下 ~

~~~~

今朝搭車突然好肚餓   所以喺車度諗好咗早餐食吞拿魚治烘底 + 熱朱朱奶 ($15)   見到份三文治突然有啲想嘔嘅感覺   不過最後都食哂件三文治同飲咗半杯朱朱奶 ~

番到公司第一件事係狂搽平安膏   因為實在太想嘔又頭痛   睇嚟都係作感冒   好在晏晝覆診   覆完可以去媽咪屋企抖抖   今晚會同媽咪 家姐 里奧大人做冬   所以就算唔舒服都好開心呀   因為屋企人係我嘅良藥 ~

晏晝會同媽咪飲茶   之後就覆診 lu ~

3 炒 (炒韓國年糕 + 炒牛油粟米 + 炒回鍋雞柳) ( DEC-2007 )

哈哈哈哈   真係不得不承認我係一位賢妻 ~

尋日真係攰到甩轆   而里奧大人又話好多嘢做要遲啲番到屋企   所以就算我一早已經醃好咗啲雞柳   都話出去食算喇 ~

真係母親的抉擇呀   因為里奧大人遲番   即係代表我大把時間煮飯   但就要好遲食飯同洗碗   不過出去食可慳番大把時間   但係又無益又嘥錢   點好呢 ~

終於都係覺得煮飯好啲   因為覺得里奧大人咁辛苦   都係唔好出去食咁多味精   算啦   唯有犧牲自己嘅休息時間啦   唔想受到良心責備呀   所以一落車就去街市買 3 條粟米 ($7.5) + 1 梳蕉 ($5) ~

是日晚餐 Choi 過妳   因為係 3 炒 (環保 3 炒) - 炒韓國年糕 + 炒牛油粟米 + 炒回鍋雞柳

炒韓國年糕 - 第一次煮   因為之前買咗韓國年糕同韓國辣椒醬   再唔煮就會無咗件事   所以即刻 Search 點煮   年糕要解涷   用 200ml 水 + 1 湯匙辣椒醬去煮   要不停搞   如果唔係會黐埋一堆   年糕好煙韌   但里奧大人話太辣   我食緊中藥唔食得喎   用水過哂啲辣椒先可以食   所以咩味都無   不過都好過我一路食一路哦嘅 ~

炒牛油粟米 - 有時間   所以續粒拻   用牛油炒   上碟前灑啲香草   搞掂   續粒拻嘅粟米真係好有口感   正正正   真係辛苦都值得 ~

炒回鍋雞柳 - 用埋僅餘嘅回鍋醬嚟炒   但倉存仲有 2 樽   所以呢味餸係會不斷出現   本來想用京蔥或者洋蔥   但唔想切   所以齋炒雞柳   但都好好味 ~

洗埋碗都 9 點幾   所以即刻沖涼   但見到堆衫又唔抵得   所以熨埋先休息睇電視   真係好攰   所以 11 點半就要瞓喇 ~

~~~~

今朝見到飯盒喺餐枱度   原來唔記得放入雪櫃   因為平時我會將飯盒放喺餐枱當眼處   涷咗先會放入雪櫃   但尋晚里奧大人要喺餐枱做嘢   .所以順理成章將我飯盒推到隱閉處   搞到我睇唔到飯盒   到我唔記得放入雪櫃   搞到我勁掹   非丙不可呀   雖然我都係論盡   但都係唔多唔少係里奧大人做成嘅 ~

今朝里奧大人又要北上   所以得我一個人搭車   悶死 ~

都係好攰   所以食吞拿魚治烘底 + 熱咖啡 ($15)   好想飲咖啡   但唔想飲咁多   所以飲半杯就算喇   如果將飲咖啡嘅態度用作我買嘢嘅態度   里奧大人肯定愛死我呀  哈哈哈哈 ~

番到公司又忙到爆炸   好在上咗電   唔係唔知點捱 ~

晏晝帶飯   好在無壞   如果唔係會再隔空丙多次里奧大人   食完就同 3B 去馬莎逛逛   買咗 Hand  Cream (Waterillly) ($45)   好香呀 ~

番到公司又係做做做   因為聽日晏晝覆診   唔想堆哂喺枱面   好礙眼呢 ~

雲吞生麵 + 雜丸 + 節瓜紅衫魚湯 ( DEC-2007 )

尋日晏晝終於都有啲 Mood 做嘢   所以時間都好快過  放工遲咗走   所以等車等咗 20 分鐘   激死 ~

好耐無飲湯   好耐無煮飯   一定要煮簡易嘅嘢嚟 Warm Up 吓...所以買咗 1 份節瓜 ($5) + 2 條紅衫魚湯 ($15) 就番屋企喇 ~

是日晚餐 - 節瓜紅衫魚湯 + 雲吞生麵 + 雜丸

真係吖   個心諗住掛住滾湯滾湯   所以淨係記得買瓜同魚   番到屋企放低嘢   先知道唔記得買雲吞   咁即刻睇雪櫃有無水餃   又無喎   又要再落街買半打雲吞 ($11.5)   下次都係買定 10 包 8 包水餃儲糧   唔係下下落街都幾煩 ~

節瓜紅衫魚湯 - 煲咗 35 分鐘   所以無咩味   但勝在有瓜有魚食囉 ~

雲吞生麵 - 超簡易   無難度 ~

雜丸 - 我想打邊爐   但自己整嫌煩   出面食嫌貴   所以就食雜丸止癮 ~

尋晚發咗顛   因為煮埋白汁磨菇吞拿魚意粉比自己聽日 Lunch   原來易煮過肉醬意粉幾十萬倍   但最慘係里奧大人唔 Like 食白汁呢   嗚嗚 ~

陪下里奧大人睇電視   自己又整理啲 Recipe   又成 12 點先瞓   係咪又顛咗呀   扮後生咩 ~

~~~~

今朝個鬧鐘打孖嚟響   真係人都顛呀   好在我番工就唔會懶床   可能我又要整熱啲中藥   所以遲一陣起身就會嘥咗好多時間   但假期就唔同   因為我唔鍾意日日都做同一樣嘢   所以我假期就會懶床   等里奧大人整埋牙膏牙刷比我   我先會起身   好舒服呢 ~

今朝里奧大人見客   所以我自己搭車   天陰陰再加上毛毛雨   搞到個人超級眼瞓呀 ~

今朝食咗芝蛋治烘底 + 熱朱朱力 ($15)   好眼瞓   好想好想飲咖啡   但最後都忍忍忍   所以今朝 Eyelid 跌到落心口 ~

晏晝帶意粉   食唔哂   因為太多喇   少意粉啲汁又多得滯   多意粉又食唔哂   好嘥嘢呀   食完瞓咗 10 分鐘   但都一樣咁攰嘅 ?!   老喇老喇 ~

唔知點解   覺得呢幾年過得好快   點解呢點解呢 ~

蒸三(失)色蛋 + 罐頭台灣魯肉 + 外賣酸甜齋 + 粟米湯 ( DEC-2007 )

尋日個人好攰又有嘢做   但個人真係好無 Mood   所以一定要慢慢做   費事出錯 ~

里奧大人話突然想食齋叉燒   所以放工就即走 lu ~

成個星期無煮飯   生疏哂 ~

蒸三色蛋 - 1 隻鹹蛋蛋 + 1 隻皮蛋 + 4 隻雞蛋 + 1 盒細清雞湯   唔記得用咩火蒸   所以用大火蒸10分鐘   樣衰到不得了   無哂心機   所以無蔥花無豉油熟油   就咁淋豉油喺面就算   費事影相添呀 ~

台灣魯肉 - 稀亨亨   難食到不得了   永遠唔會再買嚟食 ~

酸甜齋 - 里奧大人命令買嘅   無得反抗 ~

粟米湯 - 覺得煲出嚟同以前唔同   稀到呢   原來無落蛋花   咩味都無 ~

煮完飯就例牌動作   做家務   嫌自己未夠辛苦   所以再加洗衫同熨衫 ~

女人唔補好易老   咩都要補   所以即刻敷 Mask 狂搽 Cream ~

里奧大人呢排雖然辛苦   但值得   因為瘦咗 5 磅   身型 Fit 到吖   Fit 到近乎完美呀   難得咁 Fit   所以叫里奧大人即刻除衫擺 Post 影相留念 ~

~~~~

今朝勁眼瞓.   以又要再飲咖啡   食咗芝士火腿菠蘿包 + 涷咖啡 ($15)   真係好提神呢   番到公司又多嘢做   又要 MSN   忙到吖 ~

晏晝帶飯   之後同 3B 傾偈又要開工 lu...

朋友婚宴 @ 金煌庭 ( DEC-2007 )

尋朝里奧大人又要 6 點 45 分起身   因為菜菜仔結婚要做兄弟呀 ~

我瞓到 9 點半就瞓唔着 lu   所以起身拖地   做少少家務咁   之後就同媽味家姐去 APM 和民食嘢 ~

11 點  10 分去到 APM   原來好多商店都係啱啱開咋   好在 Biotherm 開咗啫   所以拿拿聲去買 Aqua Soure X'mas Gift 比媽咪   今次好抵   $315 嘅禮物可以 3 個人分   因為我要咗 Mask + 洗臉霜 + 收縮水   家姐要咗潤唇膏   媽咪要主角 Aqua Soure   一舉三得   最搞笑係人家啱啱開舖   電腦都未 Run 到   要用手寫單   可能佢哋心諗   駛唔駛買得咁急呀   其實可以食完先買嘅   但驚食完唔記得就唔好啦   做嘢穩陣啲好嘅 ~

去和民食咗軟殼蟹沙律 + 串燒盛合 + 和風 Pizza + 二色飯團 + 辛辣蕃茄年糕 ($199)   今餐一定要我請   因為我有 9 折   一早可以見到屋企人真係食咩都好食過人   之後就一齊行一陣   然後我就去鰂魚涌金煌庭 Join 里奧大人lu ~

里奧大人同媚媚去咗 Oliver's 傾下功課...我又唔係咁識路   咁家姐陪我搭車過去   因為家姐喺嗰邊番工   好熟啲路   太好喇   其實家姐好眼瞓㗎   所以搞到我都唔好意思同好心痛添 ~

去到佢哋傾咗陣功課   我就一路嘆 Mocha 玩咗陣 NDS   之後佢哋傾完功課就一齊傾偈 lu ~

佢哋個樣勁攰   又成日講好攰好眼瞓   咁又係嘅   星期日又點會咁早起身   但好朋友結婚   幾早起身都要幫手啦 ~

其實幫手做兄弟姊妹   最悶係晏晝到酒樓嘅時候   因為係無咩嘢可以幫到手   所以去到酒樓都係傾下偈喺度等開席   今次好好呀   因為真係 8 點 20 分開席   比我想像中好好多   菜菜仔真係好擺心機喺婚宴度   又特登拍幾段片喺婚宴度播比賓客睇   真係好正好感動   一啲都唔悶   啲時間仲過得好快添 ~

差唔多 11 點結束   多謝媚媚車我哋到火車站   令我哋慳番唔少時間   不過我番到屋企都成 12 點幾   好眼瞓呀 ~

再此希望菜菜仔婚姻愉快   菜菜子店鋪分佈港九新界 ~

~~~~

頭重重又好眼瞓呀   所以又要飲咖啡提神   今朝食咗芝腿治烘底 + 咖啡 ($15) ~

番到公司有啲嘢做   都好   唔係真係會瞓着 ~

晏晝同新同事 3B 去食牛筋米 ($18)   終於又有新朋友喇 ~

婆婆生日飯 @ 紅磡美心酒樓 ( DEC-2007 )

尋晚又係要食麥當勞   因為要換 Keroro   又係食咗兒童套餐 (芝士漢堡 + 粟米 + 可樂)    $18 好抵 ~

尋晚勁緊張   因為要考試   我又無認真溫過   只係喺咁易 "立" 吓   好在喺神嘅保守帶領下   我考試 Pass   因為 25 題答啱 20 題   真的要感謝神呀 ~

最開心嘅係考完試之後可以走得   但里奧大人就慘喇   路大塞車   喺韶關坐大巴足足坐咗 7 個鐘先到深圳   再要打的去火車站   加加埋埋成 8 個鐘先番到屋企   超可憐呀 ~

終於見到里奧大人喇   但一見到我就苦瓜乾口臉   怨氣極重咁話其他啲同事喺度玩   我一個人

搭車就好慘   講咗幾百次呀   之後陪里奧大人食嘢   佢食嘢先唔講咋   但一食完又講 ~

執埋嘢整呢樣嗰粄   成 12 點幾先瞓添 ~

~~~~

今朝 6 點 45 分起身   因為要北上睇中醫呢   今次 No. 2   但醫師今次 8 點半先到呢   如果 8 點到就好啦   可以快啲睇完嘛   但今次睇咗好耐   因為要照埋 B 超   所以由 No. 2 等等等   等到變 Number 尾   搞到里奧大人又怨聲載道   今次又睇咗 $2,100   仲有唔小日子要睇   真係非慳不可呀 ~

睇到 11 點幾   博下丹桂軒有無位   但佢話要半個鐘頭後再番嚟 Check 下有無位喎   咁梗係唔等啦   所以就去咗隔離嘅小桃源酒樓   里奧大人話諧音好似 "遲早完"   真係幾驚比人打呀   成 11 點幾先食早餐   所以一坐得即 Order 蝦腸 + 竹笙素粉果 + 炸雲吞 + 番薯糯米餅 + 印度蔥油餅 + 生菜   埋單 $94   都 OK 啦   水準又唔錯   但我都係比較鍾意丹桂軒多啲 ~

樣衰到不得了不得了   我以後都唔咁再着娃娃裝北上喇   因為當我喺羅湖準備出香港關時   掛住同里奧大人傾偈   差啲入咗 "內地人入香港" 條隊   點知個女海關一路行一路望住我個肚想欄住我呀   天呀   佢肯定以為我係大肚婆落嚟香港生仔啦   天呀   快啲拎走我個大肚腩啦 ~

番到屋企都成 1 點   里奧大人真係好攰   所以即刻換衫瞓覺   我就做下家務   熨熨衫又睇下報紙   再煲菊花茶比里奧大人   5 點幾先再食小食做午餐   食燒賣 + 腸粉 + 粉果 + 生菜魚肉  ($25)   又好味又飽肚 ~

之後我就自己出發去美心酒樓同婆婆慶祝生日   如果里奧大人一齊去就好啦   但功課未做   Email 未覆   所以無辦法去 ~

7 點幾去到   喺度等等等   等到 9 點 20 分先食   咁就唔好話 8 點食得啦   我最唔鍾意咁樣等   覺得好嘥時間   淨一味喺度等   次次食完都要成 11 點半   我又要轉車先番到屋企   成 1 個鐘㗎   沖埋涼成點先瞓   我年紀大喇   好難 Recover 㗎   不過諗起婆婆會好開心就算啦 ~

住家飯 @ 媽咪屋企 ( DEC-2007 )

里奧大人要喺韶關開會同過夜   所以就去媽咪屋企食飯同瞓覺   嘆下先 ~

放工即走喇   一番到去見到深愛嘅朱朱係咁撲係咁撲   真係開心到暈呀 ~

之後家姐又番埋屋企   真係好開心呢   又有住家飯食   又可以傾下偈   真係不知幾好呀   尋晚有淮山茨實花膠豬骨湯 + 梅菜蒸鯇魚 + 炒菜心 + 甜麵豉蒸排骨 + 花膠燜雞腳排骨 + 叉燒   真係食餸都飽   最嘆係食完唔駛做仲有生果食   之後一齊睇電視   真係好鬼嘆呀 ~

雖然唔駛做   但都好鬼攰   所以 10 點 45 分就瞓喇 ~

~~~~

今朝雖然 7 點要起身...但都好開心   因為係同媽咪 家姐 深愛嘅朱朱食早餐   講真   7 點幾真係未餓   叫咗個麵餐 (火腿麵 + 炸雞翼 + 熱啡)   好在同媽咪 share 雞翼   同深愛嘅朱朱 Share 火腿   唔係真係飽到喉嚨呀 ~

之後再番屋企沖涼   坐陣就番工 lu ~

晏晝帶飯   正呀 ~

今日好開心   因為里奧大人番香港   唔駛我咁擔心   不過里奧大人就辛苦喇   .因為要搭 7 個鐘頭車到深圳   之後打的士去深圳火車站   再搭火車轉巴士先可以番到屋企   坐成 8 個鐘頭車   聽見到辛苦呀   真係心痛死我喇 ~

鯪魚球 + 雲吞 + 炸醬麵 + 菜心 ( DEC-2007 )

尋日都忙   但都係慢慢做為妙   因為個人攰好易會做錯嘢呀 ~

尋晚突然好想食鯪魚球...所以同里奧大人去食咗淨鯪魚球 + 淨雲吞 + 炸醬麵 + 菜心 + 忌廉 ($48)   之後再買份木瓜 ($10) 就走 lu ~

番到屋企好在有里奧大人幫手煲藥   而我就拚命熨衫   幾日無做家務   熨完兩機嘅衫成個人就散哂   抖一抖之後就沖涼睇電視   又係 11 點前瞓   太好喇 ~

功課做哂   星期五考試   之後就唔駛番 lu   可以抖下   可以執下屋   可以焗下嘢   可以去下街   但里奧大人仲要讀成年呢 ~

尋晚里奧大人 3 點幾起咗身   話瞓唔着喎   所以出咗廳睇書   搞到我都醒咗   我係一個好難入睡嘅人   咁搞一搞又成個鐘先瞓得着 ~

里奧大人今朝要見客   所以得我一個人搭車   真係幾悶下 ~

~~~~

今朝好鬼肚餓   所以食咗腿蛋治烘底 + 熱朱古力 ($15)   飽到呢 ~

番到公司都仲係忙   但今朝好開心   因為 CC 提早番工   所以可以同佢 MSN   我覺得有 MSN 真係好好   因為有咩都可以第一時間話比對方知   唔駛下下傾電話咁煩   又可以練下字   幾好呀 ~

晏晝好想食包   所以去蛋撻王買咗個叉燒包 + 花生醬包 ($9.5)   諗住唔飽買 2 個包   點知飽到震 ~

太興 @ 大埔 ( DEC-2007 )

尋日真係好想請假番屋企休息   但諗諗下星期六又要請假   所以都係唔好喇   唯有慢慢慢慢做啦 ~

差唔多番到屋企時接到里奧大人電話  話已經差唔多到屋企   所以就約去太興食晚飯喇.   里奧大人 Share 食燒味八寶飯套餐 ($50)   我次次唔舒服都好想飲太興啲例湯   因為有好多渣   同埋飲完唔多口渴 ~

今次番到屋企係里奧大人最忙   因為要幫我煲藥   又要覆 Email 又要做功課   真係忙到七彩   好慘呢 ~

而我就 "灘" 喺梳化休息   睇下電視   10 點半瞓覺 ~

~~~~

真係慘   瞓到半夜個頭痛到爆   我估係洗完頭無即刻吹頭   因為我當時都覺得個頭有少少痛   但懶唔願走去吹頭   點知半放就痛到黐肺 ~

今朝有番啲精神...所以又可以去嘆 KFC 食牛角包 + 咖啡 ($12)   杯咖啡飲咗少少就拎走喇   因為唔係咁想飲   但無理由唔要家嘛   不過番到公司都唔係咁想飲   飲咗兩啖就掉喇   真係嘥哂 ~

晏晝食什菜炒米粉 + 粉果 ($11)   米粉 OK 因為真係有唔少什菜   個粉果就唔多掂   個皮太厚喇 ~

全日瞓 ( DEC-2007 )

真係好攰   瞓極都唔夠   兼且唔係咁舒服   所以都無番教會   一路瞓到 1 點   腰骨痛先起身 ~

個人一啲胃口都無   連水都唔想飲   淨係飲碗中藥   之後 "灘" 喺梳化睇咗兩個鐘頭電視   又睇下又瞓下咁 ~

4 點幾突然好鬼想食多士   所以就叫里奧大人買嘢食   食咗半件油醬多已經頂住個胃   好在里奧大人都鍾意食多士啫   唔係又嘥哂喇 ~

6 點幾里奧大人約咗奶奶配眼鏡   順便食埋飯   而我就喺屋企繼續瞓覺 ~

不過尋晚雖然唔係咁舒服   但都好開心   因為有線有好多旅遊節目   我次次睇親旅遊節目就好開心   因為真係好 Relax   好似自己都去咗咁 ~

~~~~

今朝里奧大人北上   所以我晏少少先起身番工   真係無胃口   所以就咁喺 7-11 買支熱麥精 ($5.5) 番公司飲就算喇 ~

番到公司真係唔想做嘢   因為實在太攰喇 ~

家姐今日放假   所以晏晝就約埋媽咪 婆婆 工人一齊去翠園飲茶   食咗迷你桶飯 + 香煎韭菜粿 + 甫魚蒸燒賣 + (小心) 流沙包 + 鮮菌牛肉腸粉 + 桂花龍鬚蛋散 + 豉汁蒸鳳爪 + 竹笙素粉果 + 蜆芥鯪魚球   難得咁多人食咁多點心   點知自己又唔係咁舒服   食唔到嘢   可惜可惜 ~

晏晝都係坐喺度等放工   因為無力做嘢呀 ~

可怕的麥當勞兒童套餐 ( DEC-2007 )

尋晚要番學   又咁啱麥當勞換新 Keroro   所以喺好唔願意食之下都要去麥當勞食我嘅晚餐 ~

去到九龍城都係 6 點仲未餓   所以行一陣先去食嘢   一行就行到 6 點半   嚇到我即刻標去麥當勞食嘢   今次食兒童套餐嘅芝士漢堡 + 粟米 + 熱朱古力 ($18)   個人又唔係咁舒服   所以一定要飲熱嘢   但麥當勞無咩熱飲選擇   所以只好飲熱朱古力   又係熱朱古力又係有芝士   真係有啲驚呀   好在 Keroro 係換埋下星期就唔駛換   唔係我真係死㗎喇 ~

一路上堂一路都唔係咁舒服   所以早咗半個鐘頭走   因為真係頂唔順呀 ~

番到屋企 Hea 一陣   睇陣電視就瞓喇 ~

~~~~

終於等到星期六喇   .因為我好鍾意星期六嘅感覺   特別係可以同里奧大人食早餐呢   今次去赤丸食烏冬   Order 咗兩個餐肉蛋湯烏冬 + 熱好立克同熱檸茶 ($36) 抵呀   因為好飽肚下   一早食烏冬就諗起同里奧大人去韓國嘅時候   由於搭早機又要用埋啲韓圜   所以喺機場食咗個好難食嘅烏冬呢啲真係貼錢買難受   難忘嘅回憶呀 ~

番到公司先記得漏咗放中藥袋嘅袋喺赤丸   又要拿拿聲去拎番   攰死呀 ~

Holiday Mood   根本無心機做嘢添 ~

放工上咗里奧大人公司一陣   之後就去平靚正大家樂食 Tea   我食雞翼紅腸瀨粉 + 熱華田   里奧大人就食永遠食唔厭嘅叉燒瀨 + 熱檸薑蜜   食完就即刻出發去尖沙咀   向我個 LV 袋出發喇 ~

次次去親 LV 都要排隊   好在今次唔係等好耐   因為好驚里奧大人無耐性話走呀   一去到就見到我想買嘅 Speedy 30   所以一試即買   如果唔係好快無   因為依家啲自由行出手好狠   慢少少都無㗎   又一次好多謝里奧大人喇   因為又係里奧大人送比我嘅   盛惠 $5,150   我真係好開心   因為係我人生第一個 LV   我會好好珍惜   不過我仍會再買其他袋的 ~

買完袋要即刻番屋企喇...因為里奧大人真係趕住做功課   我覺得自己好衰咁   係都要今日買   搞到里奧大人無哂時間咁 ~

每月一到令到個人唔係咁舒服   所以夜晚要買外賣   無咩胃口   所以食生滾艇仔粥   而里奧大人就食牛腩麵   今日成日都食出面嘢   真係勁無益 ~

個人唔願郁   所以食完睇陣電視就瞓喇 ~

元綠壽司 + 糖水 @ 大埔 ( DEC-2007 )

做呀做呀做呀   做到個人超級攰   無 Mood 呀   所以要同里奧大人出街食嚟平衡 一下心情   其實係我突然好想食拉麵   但味千要等好耐   又去咗元祿喇 ~

同里奧大人合力叫咗三文魚 / 天婦羅蟹柳 / 天婦羅軟殼蟹 / 帆立貝 / 吞拿魚 / 螺肉壽司 + 原味日式叉燒拉麵   88 折後合共 $129   一心諗住食拉麵   點知個拉麵唔係咁好食   好在同里奧大人 Share 啫 ~

又係突然間好想食傳統嘅糖水   因為心理上覺得好瞓啲   所以就去咗食合桃糊同芝麻糊   又滑又唔甜   其實食糖水係咪應該要甜先好食嘅呢   唔甜又點會叫糖水呢 ?!   但唔甜又真係好好味㗎噃   唔好睇少兩碗咁普通嘅傳統糖水   原來好貴囉   成 $30 ~

因為里奧大人要幫同事睇手機   所以喺商場行一陣先番屋企   經過 Boutique 見到一個啱啱好心儀嘅袋   但要做正經事先   而我直覺又覺得里奧大人唔會彩我   所以唔講住   睇完哂手機就借啲易講話啱啱見到個袋好靚   你送比我吖   點知里奧大人居然倍我番轉頭去睇呀   真係估佢唔到   我次次買袋嘅時候   里奧大人必然會問買嚟做咩  而我嘅答案永遠都係話用黎襯衫同無呢個款嘅袋   點知里奧大人串串共話次次買親袋妳就話要買嚟襯衫   買親衫就話要買嚟襯袋   有個揀緊衫嘅女人即刻話女人係咁㗎啦   里奧大人當堂眼突突兼鴉雀無聲   咁里奧大人見我咁鍾意   同埋陪得我睇就必然會送比我嘅   所以又用左 $199 私己買咗個袋比我喇   多謝里奧大人 ~

拎住個新袋番屋企零舍開心   所以無耐我就好主動咁整咗杯鮮奶粟米片比里奧大人嘆下   佢不知幾開心幾滿足呢 ~

~~~~

唔知點解冬天真係少咗人搭車   所以呢排都好早番到公司   有 15 分鐘比我嘆早餐   又食芝蛋治烘底 + 熱朱古力 ($15)   飽到吖 ~

番到公司好忙又好攰   個人真係唔係咁願郁   水都飲少咗呀   正想酙水時   見到 A/C Dept 幾個同事入去 Pantry.好耐都未出嚟   我都費事斟水喇   一陣以為我偷聽佢哋講嘢呀   佢哋成日都喺Pantry 好細聲咁鬼鬼祟祟傾公事   成鬼日阻住哂人哋斟水   咁鍾意傾就成個 Dept 閂門喺房傾啦   都唔知做咩鬼成日要喺 Pantry 傾   麻鬼煩 ~

晏晝食期待已久嘅豬扒通菜米線 ($13)   真係好好味呀 ~

今晚要番學...番埋下個星期就完成咗個 course 喇...太好喇 ~

柱候煎雞翼 + 西芹炒墨魚丸 + 鵝掌翼 (外賣) ( DEC-2007 )

尋晚遲咗少少放工   所以心急到唔記得拎電話   要再番轉頭拎番   嘥哂啲時間 ~

一落車就衝入街市買西芹 ($8) + 墨魚丸 ($4) + 鵝掌翼 ($18)   之後就好快咁飛奔番屋企煲藥同煮飯 ~

是日晚餐 - 柱候煎雞翼 + 西芹炒墨魚丸 + 鵝掌翼 (外賣)

柱候煎雞翼 - 前日用大量柱候醬嚟醃...慢慢火煎...煎起嚟好香呀...今次終於食到有柱候味嘅雞翼喇 ~

西芹炒墨魚丸 - 煮西芹都幾麻煩   因為里奧大人鍾意食林嘅西芹   所以我不斷加水又蓋住嚟煮腍佢   之後再加墨魚丸炒兩炒就埋茨 lu ~

鵝掌翼 (外賣) - 因為好想食   但原來咁鬼貴嘅 ~

好在今餐煮嘅餸都唔錯   因為我覺得都幾花時間去煮   如果唔好食就咩心機都會無㗎喇   尋晚里奧大人又主動熨衫呀   但如果摺埋衫同埋將所有嘢放回原位就更好喇   知係咪啲餸鹹得滯   所以勁口渴同埋好想食甜嘢   最後食咗條朱古力雪條   肥死咯 ~

~~~~

太好喇   .因為可以一覺瞓天光   唔通臨瞓前食甜嘢真係令人好瞓啲   因為我試過 3 次臨瞓前食雪條之後都好好瞓   但咁唔掂喎   好肥啫   點好呀 ~

里奧大人又北上   所有以今朝又得我孤零零坐車   今朝有時間   所以去 KFC 嘆牛角包 + 咖啡 ($12)   番到公司忙到飛起 ~

晏晝帶飯   食完就上網睇下報紙咁   就算唔做嘢都要對住電腦睇嘢   對眼點會唔攰吖 ~

近 期 快 餐 店 加 價 一 覽
‧ 大 快 活 　   平 均 加 幅 ： 6%
‧ 肯 德 基 家 鄉 雞 　 平 均 加 幅 ： 5.7%
‧ 太 興 燒 味 　     平 均 加 幅 ： 3-4%
‧ 大 家 樂 　   平 均 加 幅 ： 2-3%
‧ 麥 當 勞 　   平 均 加 幅 ： 1%

依家除咗人工唔加之外   就咩都加啦

樣衰豬扒飯 + 菜心 ( DEC-2007 )

做咗年幾   終於嘗試到忙嘅滋味   日日都係咁就好喇   人生真係變得好有意義呀 ~

有嘢做啲時間真係過得快   眨眼就到 5 點半放工   尋日即走喇   因為對眼真係好攰   後去咗 Panash 買條芝士包 ($13.5) 就搭車番屋企 lu ~

尋晚咩都唔駛買   因為一早買好咗   所以可以即刻番屋企   番到屋企就煲藥同開始預備煮飯喇 ~

是日晚餐 - 焗豬扒飯 + 菜心

焗豬扒飯 - 煎香豬扒   爆香洋蔥同番茄   然後再加半罐茄膏同一罐燜番茄一齊兜勻   之後用 3 隻

蛋炒飯   搞掂就將飯 + 豬扒 + 洋蔥番茄 + 芝士放入焗爐盆再放入焗爐   焗到芝士溶為止 ~

菜心 - 一定拻 "衣"   唔想食起嚟有渣 ~

南瓜粟米栗子豬展湯 - 係隔夜   因為我係事業型女性   無咩時間煲湯   所以一煲湯就會煲兩日嘅 ~

當里奧大人一入門口就話做咩有 "酸叔" 味嘅   唔係嘛   唔好嚇我呀   我嗰刻真係驚係咪啲豬扒醃咗兩日就發霉呀 ~

之後我拎碟巨型豬扒飯出嚟時   里奧大人就化驚為喜   話好香好正咁噃   但我覺得豬扒飯個樣好衰   啲芝士焗到燶哂   激死 ~

當我洗緊碗嘅時候   里奧大人居然話熨衫   我真係以為自己聽錯   原來里奧大人真係去熨衫呀   仲要係熨哂兩機嘅衫添呀   真係好感動呀   唔知下次仲會唔會唔駛我叫先做呢   不過都應該會嘅   因為凡事要向好嗰邊諗 ~

~~~~

今朝里奧大人北上   細心嘅   尋晚已經買定芝士包比里奧大人做早餐   而我都係食芝士包 + 細包朱古力奶   因為一條切開有 8 件   唔 Share 就會食到人都顛 ~

番到公司係咁不停做做做   晏晝又係帶飯   好悶 ~

又開始飲中藥了 ( DEC-2007 )

中藥   今朝又要開始每朝同你見瞼喇 ~

真係好攰   喺車度好想瞓   但因為我要喺臨落車前兩個站飲咗啲中藥   所以唔敢瞓 ~

今朝要買早餐番公司食喇   因為遲到呀   買咗魚肉燒賣 + 粉果 ($10)   再自己沖咖啡   但都係好攰   好在多嘢做   唔係仲死 ~

晏晝食齋啲   食白粥 + 炒米粉 ($13)   但都好飽   食完行下行下買咗兩個萬用盒 $30   其實係咪真係無事出街少破財呢 ~

由今個月起   我會積極減肥   如無意外應該係會隔日食即沖麥皮   唔飽就加幾條手指餅   期望一個月內減 7 磅   為咗加強我嘅原動力   當我減肥成功時就會安排里奧大人買禮物獎勵下我   咁做大家都會好開心~

其實真係要下決心減肥   其一身體唔好   其二係尋日執衣櫃發覺真係好多衫   但因為肥咗唔啱要買過新嘅   咁樣好似唔係好掂噃   為已為人都係減下肥好啲喇 ~

呢排公司真係好忙   忙到都唔可以喺 Office Hour 寫 Blog 睇報紙   人生變得好乏味   再加上朋友 CC 休息中無得 MSN   所以就更加無哂人生樂趣   唯有用另一面睇   就係可以專心工作囉 ~

我真係好感謝神嘅保守   因為我覺得自己好好彩   我做親啲工都唔錯   特別係依家呢一份   因為旺季番五日半   淡季就星期六有長短週同 11 日假期   朝 9 晚 5 點半   唔駛打卡唔駛 OT   阿 Head 又超勁好   佢知我依家星期六要北上睇中醫   所以我 Partner 一請假就會話我知   因為唔想成個 Dept 無人   但咁啱 15/12 大家都要請假   而佢又比我 Apply 喎   仲笑笑口話叫啲名同事 14/12 好比哂啲急嘢我哋搞   真係搞到我都唔好意思添 ~

煲仔飯 + 南瓜粟米栗子豬𦟌湯 ( DEC-2007 )

原本鬧鐘係校 10 點起身嘅   但同里奧大人不約而同咁 9 點 15 分已經起咗身   之後就即刻梳洗沖涼   里奧大人話去椰林閣食早餐   因為應該無咩人喎   去度真係無咩人   所以即刻 Order 炸魚柳 + 鮮果沙律 + 多士配熱朱古力   而里奧大人就 Order 腿蛋治 + 牛奶麥皮配熱檸茶   總共 $42   椰林閣早餐啲份量真係好多   但最討厭係要等好耐先有得食   最快要 20 分鐘   試過有次等咗 30 分鐘   真係等到火滾成身慶呀   諗住早咗起身早啲食早餐早啲番教會   點知都係同平時 10 點起身嘅時間一樣   激死 ~

食完早餐慢慢行番去教會   熱到嗌救命   但去到教會又越坐越涷   真係遲早病呀   今次只係聽完道就走 lu   .因為里奧大人要去圖書館借書   而我又可以借到 3 本整蛋糕嘅書   太好喇   講真   我唔係咁捨得買啲甜品書   因為好貴   同埋一本得幾款啱自已係幼稚園班級數整嘅   所以都係借嘅好 ~

之後去街市入面嘅熟食中心食馳名撈麵   我食蝦子雲吞撈麵 ($26)   里奧大人食豬油撈麵 ($15)   再加碗淨魚蛋水餃 ($15) 同隔離食檔嘅涷胚芽珍珠奶茶 ($12) + 炸兩 ($8)   好飽呀 ~

之後同里奧大人去買嘢   買咗一個我突然好鍾意嘅小天使裝飾品   再去街市買半個南瓜 ($7) + 3 支粟米 ($9) + 半磅栗子 ($5)   就番屋企 lu ~

番到屋企各有各忙   我就忙煲湯 + 煲藥 + 執衫   里奧大人忙就做功課   話希望聖誕節前做完可以夠我行街買嘢喎 ~

雖然星期日   但都忙到天昏地暗   本來諗好煮飯   但里奧大人想同奶奶 2 姑奶佢哋食煲仔飯   所以就出去食喇   去苑記食臘腸雞飯 + 窩蛋牛肉飯 + 菜心   真係希望越大失望越大   個煲仔飯一啲都唔好食   好似就咁將煮好嘅飯放落煲仔度咁嘅   啲飯又腍又無飯焦   失望失望   好在飲咗好味又超甜嘅南瓜湯潤下咋 ~

又 12 點先瞓喇   仲要聽日係星期一添 ~