元綠壽司 @ 大埔 ( JAN-2008 )

尋晚要去抽血驗 FT4 同 Body Check   所以已經諗好咗晚餐係簡單炒飯   但去到化驗所度要等等等   搞掂要成七點幾   打比里奧大人又未放工   條街又寒又涷又落雨   真係唔願行去 Jusco 買燒雞翼   所以都係唔煮飯出街食喇 ~

里奧大人 8 點 45 分先番到屋企附近   我又想食拉麵   但里奧大人強調首要條件係唔可以距離屋企太遠   所以唯一選擇嘅就係元綠壽司 ~

食咗中華沙律 + 拖羅手卷 + 炸天婦羅蟹柳卷 + 太卷 + 海蝦天婦羅卷 + 原味日式叉燒拉麵   $125 找數   天寒地涷食壽司都係第一次 ~

聽聞尋晚新界區得 5 度   加上又落雨   真係一路行一路涷到想嘔呀...真係未試過咁涷   所以番到屋企第一件事係叫里奧大人枱個暖爐出嚟   開咗真係差好遠呀   記得幾年前用暖爐   開得耐都會覺得熱   但尋晚真係覺得開極都唔係好暖咁   但都好過唔開囉 ~

尋晚終於可以 11 點瞓喇   其實上床瞓覺係好爭扎㗎   因為張床同張被係超級涷   而里奧大人又未咁早瞓   所以都幾攞妳命 ~

~~~~

唔知係咪開咗暖爐無咁涷嘅關係   所以都幾好瞓 ~

今朝食吞拿魚治烘底 + 朱朱力 (15)   居然唔係咁飽 ~

番到公司都幾忙   但都係唔多想做嘢 ~

晏晝全公司同同事去仿膳食  Farewell Lunch   公司比錢   仲要食到 2 點幾   太好喇   今次食套餐   有賽磅蟹 小籠包 素菜包 炸膳 雞絲粉皮 雲吞雞 五柳魚 雪菜毛豆等等   最開心係有我最鍾意嘅片皮鴨   食咗 2 片   但已經好滿足喇 ~

今晚仲開心   因為提早同媽咪去食團年飯呀 ~

大家樂 @ 大埔 ( JAN-2008 )

尋日為咗煲失敗芝麻糊耿耿於懷   整日嘅心情都好似趺落谷底咁   再加上 CC 又忙到唔得閒 MSN   無得講我啲傷心事   又無得問點解佢話佢媽咪煮得好好食   而我煮嘅就難食 ~

因為濕疹   所以我抓到手指啲關節位損哂   一彎曲損咗嘅傷口就會裂開   痛到死   但唔想成日貼膠布無空氣比佢抖抖   所以到我抖抖唔煮飯喇 ~

同里奧大人講好想飲咖啡   佢 Say No   再話想食越南菜   點知佢又 Say No   係都要去大家樂   我話做咩鬼成日要去大家樂呀 ?!   佢話近屋企   想快啲食完快啲番屋企做公司嘢喎   咁唯有去大家樂食晚飯啦 ~

唔食得咁多牛   所以退而求其次食豬仔骨鐵扳餐   再加一個我想食好耐嘅海南雞飯   豬仔骨好唔掂   啲牛肉好腍   口感相當恐怖   海南雞 OK   但碟豉油好苦   同埋啲飯好硬   不過算啦   對快餐店唔可以有咁多要求 ~

食到好飽   所以圍繞商場一週   經過 Jumpingym   真係好想入去玩番轉   但講過要戒   所以睇人玩下便算   諗起 Jumpingym 就諗起以前同里奧大人真係玩到顛...特別係推錢機   食完早餐就玩   玩完食 Lunch   番屋企抖下又去玩   玩到食晚飯就停喇   初初用積分玩到嘅只係啲文具仔   後尾玩到泥足深陷到可以用積分換百佳現金卷 熨斗 調味樽 百醒牌電子探熱針 暖爐 米奇嘅茶杯茶壺套 相架 Remote Control 架 信架等等等等   個個星期都玩千幾蚊咁好唔掂   所以就戒玩喇 ~

我最感動係有一次我唔舒服   里奧大人就話去 Jumpingym 玩   又主動兌換埋 $500 Token 比我玩   話見我唔舒服等我開心下喎   依稀記得玩咗無耐就走   因為實在唔舒服要番屋企休息喇   換轉依家呢   入去睇下人玩佢都先下手為強話要戒   唔可以再玩   再講呢   就會用極沉重嘅語氣話 :嘥錢   又話儲錢   咩 Mood 都無哂啦 ~

番到屋企做下家務   之後就翻熱埋剩餘嘅芝麻糊   由於我將芝麻糊過篩   所以今次好滑又無渣   好好食   勁開心呀 ~

~~~~

今朝食炸菜肉絲芝士腸出前一丁 + 熱奶茶  ($18)   勁飽   所以晏晝同同事食粉   食豬手米粉 + 菜心   食完落雨   又無帶遮 ~

冬菇臘腸蒸雞翼 + 大碌菜心 + 畢生難忘芝麻糊 ( JAN-2008 )

   

好早已經想整芝麻糊   仍都問埋朋友媽咪點煮   但平時又要煲藥又要滾湯   咁多嘢搞所以唔想整   但又驚唔整唔整就以後唔想再整   所以尋晚下次決心要整芝麻糊做睡前甜品呀 ~

其實之前已買咗一包仔黑芝麻   但唔知幾多份量   因為朋友媽咪提供嘅係以 "兩" 做單位   所以要再買半兩嚟校份量   半兩 $16   檔口啲人話依家黑芝麻好貴   唔好買咁多   但我無辦法啦   因為我要跟 Recipe 嘛 ~

番到屋企第一件用電子磅磅下一兩有幾千完   之後就續份咁分開   都幾麻煩 ~

是日懶餐 : 冬菇臘腸蒸雞翼 + 大碌菜心 + 畢生難忘芝麻糊

冬菇臘腸蒸雞翼 - 雞翼用雞粉醃一晚   臘腸 2 條 + 10 幾隻細冬菇   由於浸冬菇時間唔夠耐   蒸極都蒸唔腍   所以索性掉咗唔腍嘅冬菇   可惜 ~

大碌菜心 - 1 斤菜心   唔知點解咁大碌   但好甜喎 ~

畢生難忘芝麻糊 - 以為好簡單   點知同里奧大人食後感就係 "出去食好過" 囉 ~

跟足朋友媽咪 Recipe   係我朋友講得唔清楚   佢無煮嘢天份嘛   定係我理解能力有問題呢 ?!   應該大家都有問題   哈哈 ~

(5 人份量)

材料 - 

4 兩黑芝麻 + 1 杯米 + 2 湯碗水

做法 - 

(1) 將米加 1 湯碗水用攪拌機攪勻...待用

(2) 白鑊炒香黑芝麻   再加 1 湯碗水連同 (1) 一齊搞勻

(3) 放落煲煮滾   加片糖 (按自己口味)   最緊要一路煲要一路攪 (因為好易黐底)   佢有講過 "過篩"   但無講過係邊個 Step 做   而我又無問係邊個 Step 做   淨係懶醒話佢知呢樣嘢係叫 "過篩"

第 1 次整結果係衰咗   因為唔知要攪幾耐   淨係叫里奧大人開機攪   我以為米係因為要有口感   所以攪咗 2-3 分鐘就停   個心好期待會煮得好好味   點知一路煮一路攪再試味   天呀   口感係食緊生米同原粒黑芝麻   點食呀   嚇到我成煲掉哂   心都痛埋 ~

第 2 次結果係好好多   今次里奧大人主動研究點整   所以就稍為改動一下 Recipe 啲份量   又好好多噃   總之里奧大人話一覺得杰就加水   所以我就一路攪佢就一路加水   之後再落 3 條片糖就攪掂   雖然都有啲一劈劈   但都叫做食得落口   仲可以留番啲第晚食添 ~

煲芝麻糊令到我心力交瘁   不過我仲有黑芝麻   所以我會搜尋大量芝麻糊食譜   務求整到佢最好 ~

~~~~

今朝里奧大人北上   一個人搭車壓力好大   因為想瞓而唔敢瞓 ~

今朝想食甜嘢   所以食咗芝腿菠蘿包 + 涷奶茶 ($15)   個包硬個我個頭   難食到爆 ~

突然好忙   所以非常開心   但公司廁所麻鬼煩   成鬼日都爆咸水   要成日行過隔離公司放水    我公司係子母公司   有個吉單位喺隔離   好在我唔係懶人 XX 多咋   天寒地涷   經過條走廊真係絕對攞妳命三千 ~

晏晝帶飯   食完又出去行陣   唔想成日坐喺度唔郁呀 ~

黑椒炒金菇肥牛 + 隔夜湯 ( JAN-2008 )

尋朝真係好唔願起身   但都要起身   因為要番祟拜 ~

同里奧大人食燒賣腸粉做早餐   之後就打的去教會   祟拜完又係到街市熟食中心食嘢   食魚蛋粉 + 魚蛋麵 + 油醬多 + 珍珠奶茶 + 可樂...埋單 $56...又係好滿足咁捧住個肚走   之後再去街市   因為係有冷氣嘅街市   所以好乾淨   我好鍾意   行都行得開心啲   最緊要係唔駛自己拎嘢嘛   尋日最大收穫係買咗 2 盒藍草梅 ($30/2 盒)   又大粒又甜   真係好難得   之後又買下呢樣買下嗰樣就走咗   行到半路先記得其實去街市最主要目的係買豬肉同菜   因為嗰度比較新鮮 ~

番到屋企又係要大掃除   今次主要清潔係廳 鞋櫃 洗手間 雪櫃   Non-stop 又洗又抹又執   時間唔經唔覺已經到咗 7 點   又要煮飯喇 ~

是日懶餐 - 黑椒炒金菇肥牛 + 隔夜湯

黑椒炒金菇肥牛 - 本來想整金菇肥牛卷   但洗牛肉時比我整散哂包唔到金菇   所以索性求其炒就算   但出奇地好味   再配埋珍珠米   真係好味到頂點 ~

做完嗮嘢   諗住 "灘" 喺梳化睇報紙嘆下   點知隻右手酸痛到不得了   搞到咩心機都無哂 ~

~~~~

 
今朝又係超涷呀   早餐要食飽啲   食咗鹹牛治烘底 + 熱啡 ($15)   做埋少少手尾又開始發霉喇 ~

晏晝帶飯   食到好飽   所以出去 Shiseido 買保濕用品 .唇膏 .指甲油   又用咗 $890   我覺得好貴   但女人唔護膚唔扮靚又唔得 ~

次次經過投注站都諗起自己買六合彩啲低能白痴嘢   第一係家姐叫我買六合彩   我居然答話都唔仲嘅   唔買   家姐聽完 O 哂咀   講完我都覺白痴   第二就係有次感冒   食藥食到暈陀陀   拎住自己寫嘅號碼嗰張紙 (我多數係寫低號碼嚟買)   咁對電腦飛   仲好細細聲口震震咁拉住我朋友隻手講我仲咗六合彩頭獎   我朋友叫我冷靜啲先   佢好清醒咁問我對嗰張紙係咪自己寫號碼嗰張呀 ?!   我如夢初醒咁話係喎   真係白痴到爆   不過以為自己仲咗六合彩嗰下感覺真係有啲不能承受   原來係好驚㗎 ~

火腿絲炒米粉 + 麵辣豉蒸鯇魚 + 青紅蘿蔔海底椰豬骨湯 ( JAN-2008 )

做咁大陣仗嘅家務   所以會煮啲比較簡易嘅餸 ~

是日晚餐 - 火腿絲炒米粉 + 辣麵豉蒸鯇魚 + 青紅蘿蔔海底椰豬骨湯

火腿絲炒米粉  - 火腿切絲   唔知點解次次炒出黎嘅新竹米粉都好怪咁   已經剪碎咗   但炒起嚟都係一嚿嚿   唔似廣東米粉咁樣   所以里奧大人次次食都話古古怪怪   好在今次係最後嗰包啫 ~

辣麵豉蒸鯇魚 - 一心諗住用甜麵醬   以為屋企果樽係甜麵醬   點知原來係辣麵醬   落得多又驚   所以只用兩湯匙   一啲都唔辣嘅   我已經用大量羌絲舖底   但都覺得好腥   我真係開始好怕整魚喇 ~

青紅蘿蔔海底椰豬骨湯 - 2 條紅蘿蔔 +  1 條青蘿蔔 + 半磅栗子 + 4 條粟米 + 海底椰 + 蜜棗 + 南北杏 + 豬骨   一定清甜啦 ~

沙爹炒豬肉 + 腐乳唐生菜 + 蕃茄薯仔大眼雞魚湯 ( JAN-2008 )

尋日里奧大人特登強調話同事話佢臉色差咗又瘦咗喎   所以咪煮餐住家飯比佢嘆下囉   始終成日出街食都唔係咁好嘅 ~

去街市買咗 4 個蕃茄 + 1 個細薯仔 ($5) 同 2 條細嘅大眼雞魚 ($12)   又要趕住煮晚餐 lu ~

是日懶餐  - 蕃茄薯仔粟米大眼雞魚湯 + 沙爹炒豬肉 + 腐乳唐生菜

蕃茄薯仔粟米大眼雞魚湯 - 諗住用 4 個蕃茄 + 1 條粟米 + 2 條大眼雞魚嚟煲湯實會好甜   所以加多咗水   點知無味嘅   我估應該係啲蕃茄唔靚   激死 ~

沙爹炒豬肉 - 呢個餸係跟通少整嘅沙爹豬肉炒芥蘭嘅走芥蘭版   用九龍城泰國雜貨舖買嘅沙爹醬嚟炒   真係好正   最緊要係超級方便嘛 ~

腐乳唐生菜 - 超簡單無難度   又好食 ~

呢排嘅零食係食花生 開心果 焗咗嘅黑豆   因為比薯片有益   又可以止口癢 ~

平時星期五多數 12 點先捨得瞓   因為第日番半日   眼瞓都唔駛驚   但呢排實在太攰   所以頂唔順 11 點半就瞓喇 ~

~~~~

今朝同里奧大人去 Can-teen 食早餐    我食魚柳煎蛋拚厚多士配熱朱朱力   里奧大人食牛扒煎蛋拚厚多士配熱奶茶 ($44)   好耐無食魚柳   所以覺得好好味呀 ~

打邊爐 @ 屋企 ( JAN-2008 )

尋晚又寒又涷   一諗起出門口咁涷   真係唔想放工住   人生第一次有咁嘅諗法   好在去到巴士站即刻有車   而且車廂內好暖   所以一出車就會涷死 ~

本來一早諗好煮沙爹芥蘭炒豬肉   而豬肉一早已醃好   仍問埋 Blog 友通少點煮芥蘭   但實在寒流太襲港喇   所以好想打邊爐   去街市買咗肥牛 + 雜丸 + 芝士腸 + 鮮腐竹 + 雲吞 + 生根 + 粟米 + 唐生菜 + 金菇菜 + 芫茜 + 皮蛋 + 老李沙爹火鍋醬   啱啱一百蚊   本來仲想再買豆腐卜 + 魷魚 + 鯪魚肉 + 芋絲   但好驚食唔哂所以唔買   天氣一涷就好多人買嘢打邊爐...我買雜丸都要等好耐   啲人好似搶咁   好鬼恐怖 ~

其實打邊爐方便得嚟都幾麻煩   因為要洗要切   又要用邊爐鍋同 Gas 爐   真係洗到死㗎 ~

今次打邊爐係鴛鴦湯底   老李沙爹火鍋湯底 + 自家芫茜皮蛋   我覺得今次食完之後唔覺燥   因為老李沙爹湯底無味   同埋唔知係咪用咗大量芫茜皮蛋做湯底無咁熱氣呢 ~

次次打完自家邊爐之後嗰幾日都會食番打邊爐嘅嘢   今次食剩一半唐生菜 (留番整腐乳唐生菜)   一半肥牛及一包金菇菜 (留番整金菇牛肉卷)   少量雜丸同芝士腸 (留番煮麵用)   大量粟米 (番番煲湯用)   街市無啦啦 5 蚊 5 支粟米   所以即刻買   預咗未必條條咁靚   但估唔到條條都好靚喎...一米幾用   真係好正 ~

食埋洗埋沖埋涼已經 10 點半   基本上喺無可能 11 點瞓   因為食飽就瞓頂住胃好難瞓到   所以唯有睇電視   咁啱講 "平安鐘"   見到有啲獨居長者真係好慘   有咩事都無人知   有個 Case 係講對伯伯同婆婆   伯伯為咗怕婆婆無人照顧而唔敢做手術   好感人呀   睇到我個心好噏呀   所以決定每月捐 $100 去平安鐘機構幫獨居老人   等佢哋可以有機會用到平安鐘   幫己幫人  睇到 12 點   終於要瞓覺喇 ~

~~~~

今朝又涷又落雨   所以早餐食咗令人飽暖嘅糯米雞 + 奇異果汁 ($18)   呢隻糯米雞啱哂我   因為超多糯米   無咩肉又無臘腸   不過食完真係幾滯   連水都飲唔落 ~

番到公司無嘢做   超悶 ~

晏晝食車仔麵   豬扒 + 豬腸 + 豆卜米線 ($18)   食完好暖呀 ~

元綠壽司 ( JAN-2008 )

尋日無咩精神   唔想煮飯   見早前 Blog 友傻媽 MuiMuimui 鬼妹紅紅不約而同食日本菜   搞到我都好想食日本菜   為好嘅一間好多人等位   新開間壽司店又要等 6 張枱   食飯時間實係有排等   所以最後同里奧大人都係去番元綠壽司   我好想食魚生飯呀 ~

同里奧大人都好攰   所以食得唔多   只係食咗三文魚手卷 + 冷辣辣麵 + 天婦羅蟹柳 / 天婦羅軟殼蟹 / 北海道帆立貝壽司 + 元綠燒雞 Pizza   埋單 $94 咋   由於元綠對面啱啱開咗間壽司店   而食滿 $100 送碟海膽   個個都湧哂去   我都想去食㗎   但等幾張枱先放棄咋   不過有競爭先有進步   元綠啲效率快到吖   真係想叫唔好咁快添呀   有利仍有弊   就係迴轉 Bar 無咩新鮮整出嚟   來來去去都係果幾碟   以前係成條 Bar 都係  依家只係零碎幾碟係咁轉   見到都唔開胃   但又唔怪得佢噃   因為好多人已經過檔嘛   最搞笑係去元綠食咁耐   走嘅時候居然見成條迴轉 Bar 枱約 15-18 人係無人坐㗎   當時係 8 點幾咋   如果以後都係咁就慘喇 ~

番到屋企要拿拿聲沖涼同 Upload 相   因為趕住睇 "秀才愛上兵"   因為劇情仲未發展到感情線   所以先好睇   一講到感情線我就唔會追㗎喇   無線拍所有戲嘅感情線   不論古裝同時裝都係一樣悶到爆   估到哂嘅   所以唔好睇 ~

下面嘅梘液樽係送比家姐嘅   佢超級鍾意   所以我超開心   一唧梘液就會開眼同舉高手㗎 ~

~~~~

尋晚覺得自己黐黐哋   明明睇完套劇   10 點半已經好眼瞓   但唔知點解無意識番房瞓喎   係咁坐喺廳到聽電視聽到 11 點先冷去瞓 ~

今朝市區落咗雨   氣溫得 14 度咋   新界仲要再低   我又唔記得星期尾會涷無着褸   一出大堂門口已經涷到想死   之後一路等車啲風一路吹埋嚟   里奧大人又見客   得我一個人等車   無人幫我擋風呀   好在有免費報紙派   可以 "灘" 開份報紙擋風咋 ~

今朝食芝腿菠蘿包 + 涷啡 ($15)   食完精神爽利 ~

晏晝出去食紫菜三寶米 ($18)   三寶係菜肉餃 + 雲吞 + 水餃   我仲以為係魚皮餃同兩款丸添 ~

住家飯 @ 媽咪屋企 ( JAN-2008 )

里奧大人要北上開會   本來要過夜   但第二朝要見客所以唔駛過夜 lu  ~

9 點幾開完會就可以番香港   但我好早同媽咪講咗會喺媽咪屋企食飯瞓覺同食早餐   所以我都無番到屋企   照喺媽咪屋企度瞓 lu ~

尋晚放工要幫媽咪去九龍城 "么鳳" 買啫喱糖同瓜子   難得出九龍城   所以都要買番啲嘢比自己   瓜子要 $72/斤   我唔識睇靚唔靚   咁無買到   但就咁買咗啫喱糖 + 芋蝦 + 蛋散 + 日式米通 + 甜合桃 + 開心果 + 黑豆 + 雪花梅 + 正冬薑 + 甘草檸檬   埋單 $340   我覺得有啲食物都幾貴   有啲就好在可以買一兩試下   好食先再買   之後就行去搭車番媽咪屋企食飯喇 ~

去到媽咪屋企仲未開飯   家姐又肚餓   所以急不及待開包蛋散試下   唔係賣廣告   真係好食到不得了   又脆又香南乳味   $20 一包絕對係物超所值   同埋我覺得好似無薯片咁熱氣   但一路食媽咪一路依依哦哦   話會食到好滯同食唔到飯喎 ~

尋晚有花膠魚唇清保涼豬展湯 + 芹菜蝦乾燜白蘿蔔 + 蒜蓉蝦乾炒椰菜 + 一雞兩味 (蠔油花膠魚唇燜雞 + 白切雞) + 煎九肚魚   我飲中藥食唔到白蘿蔔   我又唔鍾意食九肚魚   滑潺潺咁好核突   所以又係食雞   帶飯又係雞   之前我仲好有 Mood 想煮番餐雞翼   依家唔喇 ~

食完飯就一齊食生果   睇電視又傾偈   好開心呀   我發覺結婚之後加上人年紀越嚟越大   就想好成日見到媽咪 家姐同朱朱   又可以咩都傾一餐   又唔駛就住就住   所以次次去親媽咪屋企食飯我就最開心   咩悶氣怨氣都可以比我散下   等我舒服啲 ~

家姐同工人 9 點幾就番屋企 lu   之後我攬住朱朱同媽咪一齊睇電視   好爽呀 ~

誓估唔到 "秀才愛上兵" 又幾好笑噃   尋晚馬俊偉做得好搞笑   笑到我死   如果之後都係咁搞笑就好喇   瞓都瞓得好啲啦   睇完電視又睇埋報紙就瞓喇 ~

~~~

尋晚瞓到半夜比隻貓貓 "Meow" 咗一聲   嚇到我死   朱朱吠就聽得多   慣哂嘛   但突然聽到 "Meow" 真係嚇到心臟病   妳知貓貓嗰下 "Meow" 係好長   唔似狗咁 "WOW" 一聲好快咁家嘛   所以真係幾嚇人   講下隻貓貓身細先   佢係街貓嚟嘅   媽咪已經餵咗貓貓 4 年   之前趺咗落坑渠   由 SPCA 用咗 3 日 3 夜救番佢出嚟嘅   SPCA 仲幫貓貓消毒   提供貓沙同貓籠   所以媽咪就將隻貓貓暫時寄居喺屋企   因為始終係街貓   長期困住喺籠可能唔開心同唔習慣   但屋企又有朱朱   一狗一貓驚打交呀   貓貓 4 歲   朱朱 14 歲   實比貓貓蝦啦   所以媽咪依家都唔知點好   又想養又想放   今勻真係母親的抉擇呀 ~

今朝早起身同媽咪 家姐 朱朱去餐廳食早餐   食火腿絲麵 + 奶油多 + 熱啡   媽咪同家姐又係食麵餐   好搞笑   好似無其他嘢食咁   我覺得有屋企人陪食早餐嘅 Morning 先係 Good Morning   所以今朝我係非常非常之開心開心 ~

晏晝雖然係帶飯   但今次食得非常之開心 ~

同事 3B 有帶飯   但就成日用放喺公司嘅木筷子   我話咁唔環保㗎   佢就話唔想洗嘛   之後我忍唔住話妳個飯盒都要洗啦   之後就一齊走開喇   一啲環保意識都無   都唔知有無搞錯 ~

豉油雞 (外賣) + 三色炒米粉 ( FEB-2008 )

尋日超攰   唔知煮咩好   連想食咩都諗唔到   攰到人都顛呀 ~

想快啲番屋企   見到巴士就即上   下層近落車位都照坐喇   其實唔想坐㗎   因為瞓唔到覺   但真係唔想等車   所以都係上車喇   雖然極度眼瞓   但我唔可以一上車就瞓   差啲瞓着嗰陣時   架車左搖右擺又狂響銨仲打燈停埋   之後司機就開窗用不雅嘅言語鬧人   然後又喺度依依哦哦   話架巴士黐 X 線   喺咁挨埋嚟   真係估唔到行家都會咁做   但真係比佢嚇死囉   好在無炒車咋 ~ 

番到屋企突然間好想好想食豉油雞同埋炒米粉   所以即刻買豉油雞半隻 ($30) + 芹蒜 ($3) 就番屋企預備晚餐喇 ~

是日懶餐 - 豉油雞 (外賣) + 三色炒米粉

我用新東陽出嘅新竹米粉   好幼身好好食   1 包有兩餅米粉   浸 1 餅嘅時候覺得好少   所以再浸多 1 餅   點知炒 1 餅原來係好多   另一餅要留番遲啲食   一路炒啲米粉都唔散嘅   但我又唔想剪到 "碎濕濕"   所以食起上嚟都幾麻煩 ~

星期一真係做咩都無心機   又特別攰   所以 11 點就即刻瞓覺喇 ~

~~~~

今朝里奧大人北上   得我一個人坐車   個天又陰陰暗暗咁   搞到個人超級無厘精神 ~

今朝食芝蛋治烘底 + 熱啡 ($15)   唔記得話要熟蛋   我好怕食生蛋嘅感覺   同埋覺得好漏咁   最慘係一路食都有好多蛋汁 "必" 出嚟   好麻煩呢 ~

番到公司忙一陣   蛇一陣   時間總算快過 ~

晏晝帶飯   開始好怕食雞囉 ~

相聚一刻 @ 將軍澳 ( JAN-2008 )

尋朝要早啲起身   因為番自己教會   去咗茶餐廳食早餐   Share 食咗炸菜肉絲米 + 煎蛋 + 奶醬多 + 奶茶 ($24)   之後拿拿聲番教會   因為已經遲大到喇 ~

崇拜完就同里奧大人去將軍澳小草屋同奶奶 水姑等飲茶   不過食完嘢無耐都食唔落嘢呀   食完就同里奧大人上水姑屋企傾偈   傾完又到食飯時間   所以一齊去相聚一刻度食晚飯   5 個人食咗瑤柱金菇扒豆苗 + 冰梅骨 + 薑蔥霸王雞 (半隻) + 豆腐斑腩 + 金銀蛋菠菜   又有送嘅西米露   又幾好噃   可以潤下   埋單 2 百幾都 OK   但我覺得唔夠鑊氣囉 ~

食完就番屋企喇   我發覺全日都係坐同食咁   肥死人咯 ~

~~~~

今朝塞車呀   所以要買早餐番公司食   好唔開心呢   今朝食燒賣粉果 + 熱啡 ($17)   勁飽   所以晏晝食清淡水餃米線 ($13) ~

星期一真係好無 Mood 做嘢   唔知係咪所有人都係咁嘅呢 ?!

香港仔魚蛋粉 @ 旺角 ( JAN-2008 )

尋日開心到爆呀   因為同 CC 行街買嘢 ~

由於行程緊密   絕無可能一齊坐低慢慢食 Lunch   而 CC 命令我只可以買包食   所以我買咗個藍梅芝士撻包 ($7.5) 醫肚   啲口感都好得意   由於一入地鐵閘口已經唔可以食嘢   我係企喺閘口附近食   一路食一路幾驚有同事望經過呀   快速食完就去月台 Join CC 一齊去買嘢   人生第一次係為咗 Shopping 而企喺度咬包當午餐 ~

第一站去香工   因為係批發   多人到不得了   擠迫程度簡直同行年宵一樣   行咗陣已經好頭痛   根本無心機行   所以即轉場去葵芳   好在同 CC 一樣有收穫 ~

行到 5 點幾實在有啲攰   所以食 Tea 喇   Share 西多士+蒜香雞襞沙律+紅豆冰   食完充滿力量再出去旺角掃貨   去到旺角出口時   比我見到隻大強   嚇到我好驚咁又捉住 CC   咁 CC 比我嚇到大叫咗出嚟   又嚇到後面啲人又係度叫   笑死   我真係好驚好驚大強   見到對腳會軟哂   如果識飛就仲死   飛落我度我真係會顛㗎 ~

太好喇   同 CC 又有收穫勁開心   最後我帶嘅環保袋比我裝到盤滿砵滿   但拎到我死囉   所以已經同 CC 商量過   下次買嘢就會拖細喼   唔駛拎到咁辛苦呀 ~

行到 9 點已經有啲接近虛脫   所以就到附近嘅香港仔魚蛋粉醫肚   食咗牛雜河+墨丸米+菜心+白菊蜜   食完勁飽   之後就各自歸家 lu ~

黑仔到爆   等咗半個鐘頭先有車   到屋企附近時   架巴士突然埋站停好耐   之後司機就叫我哋落車   坐下層最後   以為又係車尾出煙   好驚走唔切嘛   但係又唔覺有煙出   之後聽到司機話有人暈咗   已經報咗警   所以個個都要落車囉   暈咗嘅女人原來係坐喺下層接近車尾位置   啲人話焗得滯所以暈咗喎   我見到佢係乸塊瞼坐喺度囉   希望佢無事啦   里奧大人本來喺屋企附近巴士站接我   但我一袋二袋   唔理咁多就有車即上   因為我有幾架巴士可以番到屋企   但幾架巴士都係唔同站落車   都唔知點叫里奧大人等好   所以我叫里奧大人打道回府等我好過喇 ~

番到屋企沖埋涼就即刻瞓喇   真係前所未有咁攰呀 ~

打邊爐 @ 好味王 ( JAN-2008 )

尋日好好好好好好好好開心   因為夜晚會同媽咪 家姐 里奧大人一齊打邊爐   所以搞到我無心機做嘢   好想快啲放工見深愛嘅屋企人   如果朱朱可以一齊嚟就好啦 ~

由於方便大家   所以就去官塘嘅好味王打邊爐   最正係有卡位   因為可以睇電視嘛 ~

我哋叫咗順德釀魚肉豆卜 + 蟹子龍蝦丸 + 三星級肥牛 + 粟米+ 魚蓉麵 + 炸魚皮 + 油麥菜 + 蟹子鴛鴦滑 + 澳洲桂花蚌 + 水餃 + 三文魚刺身 (普通) + 鴛鴦湯底 ~

服務態度真係九十萬個差   拎筷子要叫 3 次   比豉油又要叫 3 次   最奇怪係當時係我同另一張枱有人咋噃   最頂癮係個鴛鴦鍋兩邊都無水   家姐叫侍應加水   點知個侍應淨係加一邊就即轉頭走   之後家姐再話唔該唔該佢先再行番嚟   家姐忍唔住就話: 唔該加埋呢邊啦   因為叫你哋幾次先會有人應   侍應尷尷尬尬話唔好意思   因為多人   顛啦   頭先無人咪有係咁   成班同喺度遊魂 ~

食物水準其實 OK 但比預期中失望   因為個個都話好食又抵咁 ~

食咗差唔多 2 個鐘   埋單 $470   我覺得唔係想像中咁抵 ~

送比家姐嘅八哥禮物 (家姐勁鍾意)

~~~~

今朝同里奧大人去赤丸食早餐   里奧大人同我都係食腸蛋蛋湯烏冬 + 咖啡  ($36)   我食到一半呆咗   因為好頂胃   里奧大人就喺度笑   話妳突然間停咗又眼定定咁無反應會嚇死人喎   但嗰下真係好飽嘛 ~

之後再行陣 Supermarket 先番公司   因為星期六要做啲星期一至五唔會做嘅嘢 ~

番到公司多嘢做到死   但個心唔喺公司   因為飛咗去 Shopping 度   因為晏晝會同 CC Shopping 呀 ~

失望的酸辣米線 + 菜心 ( JAN-2008 )

尋晚放工同里奧大人一齊去表妹度剪髮   所以做咗一件里奧大人好開心嘅事   就係去官塘接里奧大人放工一齊搭小巴去表妹度 ~

我放 5 點半係一件好事   但當你要等埋人一齊去街就係一件苦事   里奧大人放 6 點   我去到官塘仲有時間周圍行   驚一陣要剪好耐會肚餓   所以買咗兩包冷冷撈 ($20) 打底   再買定半磅南乳花生以備不時之需 ~

喺觀塘搭亡命小巴去荃灣   真係顛㗎   快到吖   司機好似上身咁見車過車   坐第二排嘅我真係幾驚下 ~

話咁快就去到表妹度   最正係唔駛等就可以即刻埋位洗頭剪髮   8 點幾就可以走人   之後同里奧大人食米線   去番上次食嗰間   我食小鍋米線 (肉碎 + 酸菜 + 芽菜 + 腐竹)   里奧大人就食腩肉 + 魚肉春卷   再加碟菜心同忌廉   我碗都 OK   但都係無咩味   里奧大人就慘啲   因為佢用難食嚟形容   我覺得最難頂係碟菜心   啲蠔油一陣味   搞到我連菜都唔想食   埋單 $66 唔係貴   上次好好味㗎   點解今次咁嘅 ~

剪完食完諗住搭車番屋企之際   里奧大人見到心儀嘅星矢   所以就花咗我 $120 買一套 (12 個)   買完就走好開心咁走喇   坐車無嘢做   所以食南乳花生   又幾好味噃   里奧大人話花生係長壽果喎   所以我依家就會博命食   因為我想條命長啲   一路食里奧大人就話花生好難消化要咬碎   難度我會當藥丸吞的嗎 ?!

里奧大人最唔想我食花生   因為佢唔想我咁長命   仲衰到前排發夢我死咗添呀   人哋話發夢係日有所思   夜有所想先發夢   好發唔發   發夢我死   仲話我走得好安詳   佢仲好安心咁微笑目送我喎 ~

番到屋企沖埋涼就同里奧大人一齊睇 Medium   好 Relax 呢   所以又想食花生   但里奧大人又話唔好食咁多   好難消化喎   我話好 Relax   所以要食花生   之後佢仲沖杯菊花蜜糖一齊飲   正到爆呀 ~

食咁多嘢   當然要做下少少運動   心理上會好過啲   .點知做完好想嘔   個胃又突然痛到飛起   所以即刻要瞓覺   我痛到死   但里奧大人好開心咁噃   仲串串共話: 妳話 Relax 要食花生嘛   當飯咁食又難消化   抵死   好在我無食啫   佢真係好想我死咁噃 ~

~~~

今朝個胃仲有少少舒服   無哂心機   里奧大人又要見客   搞到我一個人搭車唔敢瞓覺 ~

今朝食咗吞拿魚治烘底 + 熱央 ($15)   好在無頂胃啫 ~

番到公司少忙   所以可以抖下做下咁 ~

晏晝同同事 3B 食粉   我食咗豬手米粉 ($15)   之後去買咗個八哥電話座及 1 隻八哥公仔 ($118) 比家姐   因為今晚會同媽咪 家姐同里奧大人打邊爐   所以今日我超開心呀 ~

日式照燒雞翼 + 蜜汁豬肋骨 + 豬腳薑醋 + 粒粒皆辛苦粟米 + 三色炒飯 ( JAN-2008 )

經過兩晚嚴重嘅打擊   所以決定買外賣餸   要待我心情平伏先至可以再煮愛心飯喇 ~

無菜又唔得   所以點都要去街市買 3 條粟米 ($5)   呢期唔食粟米唔得   因為又平又甜   而我又超級鍾意食   所以係非買不可嘅   之後再去 Jusco 買咗 2 隻日式燒雞翼 + 1 條蜜汁豬肋骨 + 1 碗豬腳薑   咁都要 $57   之得出去食其他平嘢好過 ~

番到屋企即刻洗手開工喇   就係齋拻粟米粒   都拻咗 25 分鐘   我估今晚餐飯都唔駛煮 25 分鐘咁耐呀 ~

是日懶餐 - 日式照燒雞翼 + 蜜汁豬肋骨 + 豬腳薑醋 + 粒粒皆辛苦粟米 + 三色炒飯

日式照燒雞翼 + 蜜汁豬肋骨 - 整得唔錯   下次有機會會再買嚟食 ~

豬腳薑醋 - 整得一般   醋 OK 豬手 OK 蛋 OK   薑就絕對唔掂   啲味超怪 ~

粒粒皆辛苦粟米 - 齋用鹽炒   之後加啲香草就好好味   因為係賣飛佛 ~

三色炒飯 - 用微細嘅羌粒 + 蔥粒 + 豉油嚟炒   有三種顏色   所以叫三色炒飯   非常好味 ~

唔知點解咁黑仔   次次睇 Monk 都係有血腥鏡頭   但得里奧大人一個人睇嗰時又無㗎噃   奇怪奇怪 ~

~~~~

今朝好鬼涷   真係好唔願意起身   但要搵錢   所以點涷都要起身番工   沖完熱水涼就精神啲   但沖到鬼咁熱   所以一出街就涷到死 ~

今朝又食咗芝腿菠蘿包 + 熱啡 ($15)   我好鍾意食係又甜又鹹嘅嘢   但啲人話會好易生痱滋喎   唔知有咩根據呢 ?!    講開生痱滋   試過同朋友講話自己好少會生痱滋   點知第日即生   仲要生正喺喉嚨附近   痛到飲水都飲唔到   真係邪到爆呀 ~

晏晝帶飯   可能樣樣都鍾意食   所以覺得好好味 ~

干煎雞扒 + 魚香齋茄子 + 腐竹湯丸糖水 ( JAN-2008 )

尋晚都好他條   因為晚餐一早預備哂   醃好雞扒又買埋茄子   所以可以逛超市買吓嘢   又出事喇   成日想整沙爹咩咩   所以就買咗樽沙爹醬同其他嘢   番到屋企突然醒起好似之前買咗沙爹醬   但真係唔想 Check 係咪真係有   因為好驚真係有...抖咗陣之後終於鼓起勇氣 Check下  點知原來已經有 2 樽喺度呀   加埋頭先又買咗   有成 3 樽呀   食死咩   救命呀   頭先應該唔好買住   番屋企 Check 咗先   橫掂又未會整沙爹...做咩咁衝動喎 ~

是日晚餐 - 干煎雞扒 + 魚香齋茄子 + 腐竹湯丸糖水

干煎雞扒 - 用韓國醃肉醬醃一晚   方便又簡單   最緊要係好味嘛 ~

魚香齋茄子 - 用老李嘅魚香茄子醬   又係方便又簡單   但經過人上人一役後   我對瓜有啲恐懼   所以我一路煮一路加水   務求令到快啲熟   但最後點解食落去都仲有啲生勾勾嘅感覺嘅 ?!   天呀   我熱愛煮飯   求你唔好再比任何打擊嚟打倒我啦   問里奧大人係咪唔多 Like   佢口窒窒話啲茄子肥喎   我即刻話唔係嘛   出面食嗰啲魚香茄子仲肥啦   你又食咁多 ?!   之後佢當然無出聲啦   我講事實嘛   我知齋瓜無味又生   又無肉碎   又無鹹魚香嘛   知啦 ~

腐竹湯丸糖水 - 其一係天氣太乾燥   其二係啲腐竹埋咗當眼處好耐   再唔用驚發霉   倒不如潤下   但就咁腐竹糖水太單調   又唔想食蛋   所以加咗利川花生湯丸   飽到顛呀 ~

~~~~

今朝又涷咗   所以幾正   因為我覺得冬天啲衫好睇啲   可以遮肥肉 ~

天氣涷   所以好肚餓   食咗磨菇香腸蛋治烘底 + 8 oz 奇異果汁 ($15)   明明呢個餐係配橙汁家嘛   點知又無   飲完杯奇異果汁個喉嚨痕到呢   下次都係飲咖啡好過喇 ~

番到公司整呢樣嗰樣   成 10 點先有少少 Mood 做嘢   唔知係咪天氣涷   成日覺得瞓極都唔夠咁嘅   依家仲有啲頭痛添   煩死人 ~

晏晝帶飯   悶極 ~

干炒千年午餐肉烏冬 + 超級人上人苦瓜 ( JAN-2008 )

我煮飯一定要有菜   但成日都係菜心呀 芥蘭呀 生菜呀 油麥菜咁   真係幾悶下   尋日諗爆頭   終於比我諗到煮咩菜   就係人上人苦瓜   去到街市剩番 3 條苦瓜咋   想買 2 條   但驚煮得唔好食   所有買 1 條 ($3) 就算喇 ~

是日晚餐 - 干炒千年午餐肉烏冬 + 超級人上人苦瓜 ~

干炒千年午餐肉烏冬 - 午餐肉係用放喺寶柜好耐嘅   好上成嘅千年貨色   食落非常香口   而烏冬就咁用蠔油 + 生抽 + 老抽炒到熟為止就上碟   再排上午餐肉   簡直係完美嘅組合 ~

超級人上人苦瓜 - 用鹽醃 15 分鐘再出水   之後用磨豉醬同乾蔥齊炒   以為好快熟   點知食落口生勾勾咁   又苦到嗌救命   所以再炒   一路炒一路加水炒煮熟去   但里奧大人都話仲係有啲生   而事實上真係咁   所以里奧大人點都唔肯食埋餘下嗰 10 幾條...咁唯有比我帶飯囉   原來做人上人係咁可怕㗎 ~

~~~~

今朝好涷   最慘係臨落車先落雨   唔開遮唔得   本身揹個大袋又要拎個飯袋   又要開遮   真係好鬼煩 ~

今朝想食甜中帶鹹嘅早餐   所以食咗芝腿菠蘿包 + 涷央 ($15) 飽哂 ~

番到公司幾忙   但無咩 Mood 做   因為掛住 MSN ~

晏晝帶飯   好唔願意食呀   因為諗起食番啲苦瓜就有頭暈感覺   呢幾日都係咁食啲熱氣嘢   到牙肉痛   條脷又痛   所以一食苦瓜就好乸   又苦又乸   辛苦到頂點呀   頂唔順要飲包檸檬茶甜下呀...

灌湯包 + 粟米 + 米粉 ( JAN-2008 )

可能太耐無行街   所以都幾攰 ~

又未肚餓   又要諗定食咩   都幾懊惱下 ~

真係諗唔到食 Mood   所以就去街市買定 3 條粟米 ($6)   再諗下食 Mood 好   比我諗到放咗喺雪櫃千年嘅灌湯包   所以是日晚餐係灌湯包 + 粟米 + 米粉   呢餐真係易煮到不得了 ~

里奧大人終於完成功課喇   所以可以好 Relax 睇 DVD   如果唔睇就無得睇㗎喇   因為下星期里奧大人又要開始番學做功課喇 ~

睇到 12 點   超眼瞓 ~

~~~~

又係 10 點起身   又係要趕頭趕命打的去教會附近食早餐   又係去茶餐廳   食丁麵拚芝士腸太陽蛋配華田 + 占醬多 ($27)   呢餐一定要係飽與唔飽之間   因為要留肚   喺祟拜後食其他嘢 ~

祟拜後就去熟食中心食馳名魚蛋河   魚蛋魚片魚皮都好好食   但個湯底就差咗啲   無味嘅   之後再加多杯涷珍珠奶茶同可樂   再驚死唔飽   整多個炸兩   終於令到我食唔哂啲粉   哈哈   晏晝用 $58 食到咁飽   真係好滿足 ~

之後同里奧大人喺街市買埋芥蘭 ($8) + 豬𦟌 ($20) + 腩排 ($10) 就歸家喇 ~

酸梅甜麵醬蒸排骨 + 芥蘭 + 紅蘿蔔豬展花膠湯 ( JAN-2008 )

尋日好有 Mood 做家庭主婦   所以一番到屋企就好忙   因為想先做家務   洗埋衫   熨埋衫然後煲湯   但真係好攰囉 ~

是日晚餐 - 酸梅甜麵醬蒸排骨 + 芥蘭 + 紅蘿蔔豬展花膠湯

酸梅甜麵醬蒸排骨 - 原來 $10 腩排係好少   但對我同里奧大人嚟講就係超足夠   因為我哋唔係咁好食肉   用 2 湯匙甜麵醬 + 2 粒酸梅再用糖撈勻   咁嘅份量蒸出嚟原來好好食㗎 ~

芥蘭 - 清甜 ~

紅蘿蔔豬展花膠湯 - 又係好清甜 ~

本來諗住跑步   但地下濕濕咁   所以唔跑 lu   費事一陣一路跑一路落雨仲煩 ~

~~~~

今朝里奧大人北上   得我一個人搭車   天陰陰又涷   一路行啲風係咁打埋嚟好攞命   所以一有車就上   唔理好唔好位喇 ~

今朝食咗吞拿魚治烘底 + 熱啡 ($15) ~

晏晝同媽咪美心皇宮飲茶   食咗臘腸卷 + 煎堆仔 + 馬拉糕 + 星洲炒米 + 紫米露 ($169)   咁涷媽咪都同我食晏   當然由我請客啦 ~

執二灘嘅西餐 ( JAN-2008 )

尋日里奧大人 4 點幾見客   又唔知幾時先番到屋企   而我又好攰   又諗唔到煮咩好   所以都係決定出街食喇 ~

番到屋企一路煲藥一路 "灘" 喺梳化睇報紙   一路等里奧大人電話   終於里奧大人打電話嚟話 8 點可以番到屋企喇 ~

一心諗住去食雲南粉麵   啲粉煙煙韌韌   個湯底又酸酸辣辣好鬼正   但美中不足係好少選擇   其實我之前食親都會話遲早執   其一地方幾隔涉   其二太少選擇   食幾次已經可以食完餐牌上嘅嘢   又無變化   唔執先奇   本來我想放工睇下有無執到先去食   但個人太攰無去睇   點知真係執咗 ~

已經變咗一間環境昏暗嘅餐廳喇   昏暗 Feel 啱哂我   又有二人餐   里奧大人又話嚟到就試下囉   所以盡地一試 ~

一入到去就坐正個電視位   之後 Order 二人餐   有餐湯 (甘筍忌廉湯兩客) + 串燒牛 / 雞肉 (6串) + 三文魚 Pizza + 肉醬千層麵 + Cheese Cake (1 件) + 餐飲 (2 杯)   埋單 $110 真係好抵   因為係飽到食唔哂   不過下次唔會再去食   .因為啲嘢食好鹹   唔多掂 ~

~~~~

今朝 6 點 45 分起身喇   要北上睇中醫呀   又涷又攰   真係難為了家嫂 ~

8 點去到仲未開門   好驚呀   唔好嚇我呀   好在等咗 10 分鐘就有人開門   又係做第一   所以連埋執藥 9 點 45 分就走得 ~

公司依家係一個月一日星期六 Off   今次係請假   下個星期就到我 Off   本來想再下個星期六請假嚟睇   但一個月連續 3 個星期六唔見人唔係咁好   所以唯有月尾星期六再睇   又要執 20 劑藥   埋單又要 $2,700   真係好貴   所以我真係要好好錫身體   唔好再食咁多煎 炸 辣 海鮮   如果唔係真係賣身都唔掂呀   仲要比里奧大人哦死添呀 ~

之後打的去丹桂軒飲茶   食咗皮蛋瘦肉粥 + 風味油條腸粉 + 竹笙上素餃 + 潮州粉果 + 雞汁鮮竹卷 + 蒜蓉蒸排骨   埋單 $122   真係又抵又好味呀   今次仲用手機影相   又無人話我噃   可能係我動作唔大啦 ~

麥當勞 + 上海雜食 ( JAN-2008 )

尋晚里奧大人朋友媚媚去我屋企傾考試題目   我可以唔駛煮飯   所以放工好想行街   一落車就標去吉之島超市逛下   一逛就逛咗半個鐘   開心到爆呀 ~

買咗皮蛋 (無鉛) + 味千拉麵 + 樂家杏仁糖 + 老李醬料包就收手   因為里奧大人差唔多番到屋企 ~

里奧大人話媚媚要成 8 點幾先到   所以就去麥當勞食少少嘢   食辣雞腿包 + Shake 薯條 + 可樂   想食 Shake 薯條好耐㗎喇   因為次次里奧大人都唔準食   話食緊中藥要戒口喎   所以食到真係好開心   人生第一次覺得麥當勞好食添呀 ~

之後上屋企一陣就收到媚媚電話   又要去開餐喇   Share 食豬紅 + 豬腸 + 生菜 + 蘿蔔 +  炸釀豆腐 + 淨韭菜雲吞 + 酸辣雲吞米線 + 豆漿   小食大家都勉強食哂   但啲雲吞就食唔哂 ~

上到屋企佢哋就傾考試題目   而我就煲藥   因為無得睇電視   所以被迫玩 NDS ~

~~~~

今朝 Off...但我都同里奧大人一齊搭車   因為要比煲媽咪   所以順便同埋媽咪同朱朱食早餐   食火腿麵餐 + 華田   飽到頂點   之後上媽咪屋企 "灘" 抖下   因為晏晝會同里奧大人行街   灘到 12 點又要落街陪媽咪 朱朱食嘢   我唔係咁肚餓   所以媽咪就話叫碟腩排   我覺得 $50 兩條腩排都幾貴   不過又幾鬼好味   啲皮脆卜卜   之後家姐又到埋一齊食嘢   佢哋就叫粉   我就唔叫喇   因為我要陪里奧大人食嘛 ~

食完就即刻走去陪里奧大人食第二餐喇   又係食粉   今次我真係餓喇   所以 Share 食咗魚蛋粉 + 牛腩粉 + 菜心 + 可樂 ($57)   可能一路食粉一路飲可樂   所以幾脹胃   幾辛苦下 ~

同里奧大人出旺角   因為中咗國美電器嘅第 9 獎 ($50 Cash Coupon)   中咗 2 張   雖然唔係咩咩大獎   但都真係好開心   錢嚟喎 ~

之後再出尖沙咀行街   目的係要買遮瑕膏 ($190) + Make Up Brush ($35)   依家有得消費嘅地方就有自由行   仲要係豪到不得了嗰隻   我表妹做某牌子嘅 Sales 都話鍾意做大陸客   因為一買就一色幾件咁   啲 錢多到咁   其實我最想見識下佢哋用紅白藍拎一袋錢嚟買樓   如果我係地產 Sales 肯定嚇呆呀   咁大疊錢噃 ~

同里奧大人行 City'super   都幾攰   所以求其買咗盒餅乾條同糖就走 lu ~

好攰又有啲餓   所以同里奧大人去 Triple's O 食 BC Burger Combo   食到我同里奧大人飽到上心口   又要行一陣消化下先搭車番屋企呀 ~

每月一次 - 元綠壽司 ( JAN-2008 )

尋日喺公司做嘢做到頭暈眼花   可能太集中精神望電腦   所以搞到對眼超濛   最慘係條腰骨痛到嗌救命   真係苦不堪言 ~

由於唔係作戰狀態   所以係唔會煮飯嘅   同埋突然又好想食壽司   所以就同里奧大人去元祿食壽司喇 ~

食咗三文魚 / 吞拿魚 / 素魚翅海蜇 / 帆立貝 / 天婦羅蟹柳壽司 + 吉列炸蝦卷 + 三文魚手卷 + 冷辣辣麵 + 中華沙律 + 蘆薈青蘋果蜜 + 蘆薈水蜜桃茶   個人唔太舒服   所以食完涷又好想食熱   但又太飽   無可能再 Order 任何食物   眼見隔離枱碗拉麵   真係好想叫佢哋比啖我食呀   今次埋單 $155 都 OK 啦   因為有 88 折先會去食 ~

之後同里奧大人去 Mannings + Watson's 買日用品   都叫做行街啦   所以我都好滿足㗎喇 ~

番到屋企里奧大人第一時間焗杯杞子蜜糖比我   真係好 Warm   仲諗住里奧大人唔記得我講過話眼濛濛呢   所以真係超超超超感動   估唔到又會咁細心 ~

~~~~

今朝好趕但好肚餓   所以食埋早餐先番工   食芝蛋治烘底 + 熱啡 ($15)   飽到呢   不過食完好精神呀 ~

番到公司拚命做嘢   因為聽日 Off 嘛 ~

晏晝想食嘢但又唔想食咁飽   所以食車仔餸   韭菜 + 生菜 + 豬腸 + 豆卜 ($14)   好好好好味呀   居然越食越肚餓呀   好後悔做咩唔叫多個米線呀 ~

大事不妙   一路食粒朱古力   隻牙一路冤住痛   我估我都係蛀蛀牙喇   死啦   我最怕補牙   因為比牙醫撩啲牙嗰陣時真係痛到入心入肺   好驚呀 ~

太興 @ 大埔 ( JAN-2008 )

 

尋晚好鬼肚餓   所以買碗街頭小食韭菜豬腸 ($10) 番屋企嘆下   好耐無食過喇   所以好味到爆呀 ~

突然好想食乳豬燻蹄飯   所以就約里奧大人去太興食晚飯   好景不常   去到無乳豬   唯有轉呔食燒肉油雞飯套餐   因為我發夢食油雞 + 花生醬厚多士   其一唔想叫多個飯   其二係想試下厚多士係咪真係外脆內軟   真係有驚喜噃   因為好多醬同真係外脆內軟   好好味   埋單 $57   真係飽到上心口 ~

同里奧大人等食飯時   里奧大人送咗個 Stitch (史迪仔) 3D Puzzle 比我   又幾好噃   因為呢期好鍾意佢嘛   不過 $100 就貴咗啲囉   最慘係唔知又要迫我鍾意 Stitch 幾多年呢 ?!   呢期里奧大人好興送親咩都好   都要講明要鍾意嘅限期   好大壓力呀 ~

番到屋企好有心機咁跟住 Number 係咁砌   但砌出嚟簡直唔知似咩   所以要比里奧大人搞掂佢   佢終於用咗 1 小時 45 分鐘完成呢件創舉   完成時個樣仲沾沾自喜添呀 ~

~~~~

今朝仲係有啲反胃   所以無咩心機   求其買咗粉果 + 熱央 ($10) 番公司食   之後就忙到死喇~

晏晝仲係胃脹脹   咁求其買咗腸仔麵 ($11) 就算喇   但食唔哂呀   嘥哂啲嘢 ~

身體不適 ( JAN-2008 )

每月一到搞到我無覺好瞓   所以尋日要請病假喺屋企休息 ~

無食過嘢   只係飲中藥   但又不停咁嘔   白泡都嘔埋   真係比死梗難受 ~

~~~

今朝又要番工   里奧大人要聽講座   所以我自己搭車   又唔敢瞓   驚瞓過籠 ~

終於捱到公司附近嘅 7-11 買咗支薑味維他奶 ($5.5)   太好喇   個人又想嘔   飲薑味嘅嘢就最好喇 ~

番到公司即刻食粒止嘔藥   食完眼瞓到爆   所以一到 Lunch Time 即瞓   好在瞓完就好好多   可以繼續做嘢 ~

蕃茄蟹柳炒蛋 + 灼芥蘭 + 薑蓉 + 隔夜湯 ( JAN-2008 )

尋日唔知點解好有 Mood 煮飯   所以就預備多啲時間比自己慢慢煮好啲餸 ~

是日晚餐 : 蕃茄蟹柳炒蛋 + 灼芥蘭 + 薑蓉 + 隔夜湯

原來炒碟好食嘅蛋係好難   所以我要再努力學習 ~

洗埋碗又到自己護膚時間   一路敷 Mask 一路上網   敷咗成 20 分鐘   嚇到我死 ~

個人唔覺好攰   所以 12 點先上床瞓覺 ~

~~~~

今朝好攰呀   好在無咁涷   起身都比較易啲 ~

今朝要迴避下   所以去咗 KFC 食牛角包配咖啡 ($12) ~

番到公司又忙   但又想瞓   所以做嘢慢到不得了 ~

晏晝帶飯   今次好折墮   因為每月一到無咩胃口   食剩 3/4   .掉嗰陣時都真係有啲心痛 ~

青紅蘿蔔豬骨粟米栗子湯 + 生麵 ( JAN-2008 )

番到屋企附近就即刻去超市買西施骨 ($35)   但原來係好多肉無咩骨嘅   咁之得買豬筒骨啦   激死 ~

里奧大人休息一陣就要番學 lu   所以大家都係食麵包做 Lunch   里奧大人要坐車食   而我就好啲   可以喺屋企慢慢食   送完里奧大人搭車就去街市買湯料   又係煲紅蘿蔔清潤湯   所以買咗 2 條紅蘿蔔 + 1 條青蘿蔔 + 3 條粟米 + 半磅栗子 ($23)   之後就番屋企喇 ~ 

一路睇報紙一路咬包 (芝士條 + 墨西哥包)   .飽呀   之後就即刻熨衫 + 執屋   就嚟新年喇   所以就要開始陰啲陰啲咁執屋   如果一次過做哂   肯定做到我過唔到年呀 ~

本來 Plan 好啲時間   可以他他條條咁用   但突然間啲兒甥女 3 姐弟上我屋企放低嘢   坐低傾下僋又用咗成 45 分鐘   所以佢哋走咗之後我要即刻預備湯   又要煲菊花茶比里奧大人清熱氣   好趕呀 ~

好在里奧大人 5 點幾番到屋企   可以幫我煲中藥   因為我其實都好攰下   因為太早起身喇 ~

懶人晚餐 - 青紅蘿蔔豬骨粟米栗子湯 + 生麵

實在太想飲湯   實在唔想出街食   所以求其湯渣做餸   再加多個生麵就算喇 ~

~~~~

今朝 10 點起身   所以同里奧大人梳洗後就去教會附近食早餐   Share 食火腿通粉拚餐肉芝士腸 + 熱檸蜜...醬占多 + 熱好立完 ($42)   番到教會聽道嘅時候越坐越涷   諗住天氣唔涷無着厚褸 ~

崇拜後同里奧大人又去熟食中心食 Lunch   食咗炸兩 + 炒米粉 + 排骨飯 + 燒賣 + 涷珍珠奶茶 + 熱胚牙珍珠奶茶 ($52)   食到好飽好飽好飽...所以順便行埋街市買 1 斤芥蘭 + 3 個蕃茄 ($16)   之後再行精品店   又買咗 Ppoon + Fork + 家庭用品   好開心呀   因為實在太想行街 ~

番到屋企成 4 點...其實都行咗好耐下...搞到里奧大人又要趕快做功課添 ~

我仲衰   番到屋企個頭有啲頭痛   可能頭先涷一涷再加埋飲涷嘢   里奧大人話瞓番半個鐘差好遠喎   係都要我瞓   我當然唔瞓啦   驚一陣瞓多咗夜晚會失眠㗎 ~

中韓文化鍋 ( JAN-2008 )

尋日都比較忙   所以無時間蛇王 ~

但尋日唔知做咩鬼   好有好有 Mood 想煮飯   因為 CC 話佢公司阿姐煮魚蛋粉絲脆肉瓜好好食   所以好想去煮   煮下啲新餸無咁悶嘛~

同里奧大人差唔多時間番到屋企附近   所以我一路去超市買喇嘢一路等里奧大人   買咗沙薑鹽焗雞粉 + 4 包粉絲...時間啱啱好   一買完就見到里奧大人   之後一齊去街市買餸   里奧大人專攻木瓜 ($10)   而我就買牛丸 + 魚蛋 ($6) + 3條翠肉瓜 ($5) 就番屋企喇 ~

是日晚餐 : 中韓文化鍋

呢鍋真係好易煮   材料係 10 幾粒丸 + 2 包粉絲 + 10 幾條韓國年糕 + 3 條脆肉瓜 + 1 盒細嘅史雲生清雞湯   滾到所以嘢熟哂就搞掂 ~

本來想用個砂鍋嚟盛載嘅   但太細個裝唔哂   所以求其用過大盆裝   里奧大人見我倒出嚟嘅時候就喺度瓜瓜叫   係咁話點解無湯嘅點解無湯嘅   我一路倒一路啲煙 "供" 上嚟熱到死   仲喺度呱呱叫   真係好想兜巴星佢嘆下呀   所以我都費事彩佢 ~

唔知係啲料多得滯   定係啲湯少得滯   我同里奧大人都覺得無咩味   所以即刻整碟豉油辣麻油   咁樣好食好多   之後我再用威脅性嘅態度問里奧大人好唔好食   佢都係話無咩味   又話點解會有年糕嘅 ?!   煮得鍋就梗係咩嘢都落㗎啦   都唔知問嚟做咩   仲有呢啲叫做清清哋  唔係無味   又唔知自己年紀日漸老邁   食咁鹹做咩啫   所以我冷笑話你想有味嘅話   等我下次落啲味精先...里奧大人就係度傻笑..話喺屋企都要食味精咁慘 ?!   等你彈得咁過癮吖嗱 ~

尋晚唔知係咪用盡畢生嘅精力煮煲文化鍋   所以好攰   11 點就即刻瞓着咗喇 ~

~~~~

今朝早咗起身   反而仲遲咗出門口   因為成日心諗早咗喎   唔駛咁急   做所有嘢都變咗慢動作   所以仲搞到遲咗出門口 ~

依家一諗起食早餐就有啲驚   因為上次我見到老細坐咗喺我去開間餐廳   嚇到我即刻走   所以我依家係裝下間餐廳先行入去食早餐   今朝好彩見唔到老細   當時已經係 9 點   呢段時間好少人食早餐   所以我可以將個袋放喺隔離位   Order 完芝蛋治烘底 + 熱啡 ($15)   之後以為有電話響   所以諗住開個袋搵電話   點知一望就望到我老細兩公婆   咁四目交投   唔打招呼唔得啦   搞到我唔可以慢慢嘆份早餐   食完又當然要 Say Bye 啦   老細都好 Nice 話食完喇 ?!   而我又低低能能咁答係呀 Bye Bye   已經 9 點 15 分喇   仲唔走咩 ~

番到公司忙咗陣   之後就到 Lunch Time   又係帶飯 ~

香格里拉自助餐 ( FEB-2008 )

尋日都有啲嘢做   所以時間都過得幾快 ~

放工就特登約埋里奧大人一齊坐車到香格里拉食 Buffe   太好喇   因為好似好耐無同里奧大人出到咁遠食晚餐呀 ~

由於要睇實個袋關係   所以同里奧大人一出一入咁拎嘢食   食食下覺得唔對路   好似自己一個人係度食嘢咁   所以就命令里奧大人唔好食住   等我番嚟先準食   而我又細細碟咁拎   行成 10 次   有啲攰 ~

其實幾年前同媽咪.家姐去過香格里拉   水準都係低㗎喇   但今次有 Cash Coupon   所以先再去一次   但食物水準一如以往都係低   不過好在有我最鍾意食嘅串燒牛/雞肉   可以狂蘸沙爹醬   但啲醬就甜咗啲   之後再試下肉桂雪糕都有驚喜   因為有好濃嘅肉桂味   其他真係無咩好食   可惜可惜 ~

食食下有單嘢幾攪笑   係隔離枱對情侶   個女見到我影相佢又拎部相機出嚟叫個男幫佢影   男嘅影完比個女睇   個女話唔靚嘅   影多次   男嘅再影   又比過女睇下   個女話咩咁樣衰㗎 ?!   而個男就比較激動話係妳樣衰所以先影到樣衰之嘛   個女無出聲   簡直樣衰到呀   好在後尾佢哋都有講有笑   唔係我仲尷尬 ~

埋單 $809   不過今次有 $450 Cash Coupon   所以尾數都係 $359   係抵但唔好食呢 ~

本來想同里奧大人逛下尖沙咀   但趕住煲中藥   所以喺迫於無奈情況下要擱置我嘅 Shopping 大計   激死 ~

番到屋企里奧大人好樂意咁幫我煲中藥   又幾好噃   又 mark 低食咗幾多劑   又幾細心噃 ~

年紀漸漸老邁   所以 11 點要瞓覺 ~

~~~~

里奧大人又要北上  我又要一個人戇居居搭車 ~

今朝突然唔想咁遲番公司   所以買燒賣粉果 ($10) 番公司食   再加杯即沖華田   又開始過慢長嘅一日 lu ~

晏晝同 3B 食白粥 + 炸兩 + 炒米粉 ($13) 一個人   真係抵到爆呀 ~

煎鯪魚餅 + 節瓜紅衫魚湯 ( JAN-2008 )

尋日番到屋企   我同里奧大人各行各路   我無 Mood 再做家務   所以就睇電視   咁啱有線做旅遊特輯   所以就好難得咁他條 "灘" 喺梳化度睇電視   而里奧大人就繼續趕功課 ~

再睇埋小長今   睇咗 3 次都一樣係喊到九彩   小長今真係好識做戲   同埋我覺得佢個樣好得意   得意得嚟又好可憐咁   所以果期我勁鍾意佢   但一大個咗就唔鍾意 lu   之後懷着低落嘅心情預備晚餐 ~

是日晚餐 - 煎鯪魚餅 + 節瓜紅衫魚湯

煎鯪魚餅 - 買現成鯪魚肉   我好怕腥   所以會大量胡椒粉同冬菇粒 + 臘腸粒撈埋一堆   再蘸泰式甜酸醬   好好食㗎 ~

節瓜紅衫魚湯 - 唔想買菜   所以就滾呢個湯 ~

唔知係咪早食飯   所以覺得啲時間好好用   勁開心呢 ~

~~~

今朝本來去一間餐廳食早餐   點知一入到去搵位時   見到老細兩公婆   嚇到即刻掉頭走去另一間食早餐   好在老細無見到我   因為已經 9 點   無可能仲大模斯樣咁食嘛   不過我都係堂食腿蛋治 + 熱啡 ($14)   今朝份腿蛋治涷冰冰   難食到爆呀 ~

番到公司幾忙下   所以覺得幾充實 ~

晏晝帶飯   好飽呀 ~