肉絲炒麵 + 節瓜鹹蛋肉片湯 ( 22-apr-2012 )

( 22-apr-2012 sun )

今朝居然 11 點15 分先醒   番唔到教會喇   我問里奧大人點解唔教鬧鐘   佢話平時多數瞓到 10 點幾就自然醒   所以無教鬧鐘   估唔到會瞓到咁晏 ~

咁晏都無早餐食   所以我煮麵喇   好耐無煮   間唔中喺屋企煮早餐真係唔錯   感覺唔駛咁趕   食幾耐都得 ~

洗完碗又做下家務啦   反正里奧大人做公司嘢   我做完就 hea 下喇   每月一到呀   所以都唔比自己咁攰喇 ~

里奧大人個肚有 d 唔舒服   所以去大快活食 tea   本來佢話陪我買餸   好似好耐無陪我咁喎   不過我話唔好喇   一陣肚痛仲煩   叫佢快快番屋企呢 ~

差唔多 6 點佢就去跑步   我就預備晚餐喇 ~

是日懶餐 - 肉絲炒麵 + 節瓜鹹蛋肉片湯

肉絲炒麵 - 今次醒喇   買一個麵餅算喇   $3.5 一個麵餅真係幾抵食   再加埋滾湯嘅肉片黎炒   咁就有碟肉絲炒麵   平靚正又方便   最緊要唔好浪費嘛 ~ 

節瓜鹹蛋肉片湯 - 我覺得自己真係好耐無滾湯咁呀   里奧大人又成日咁夜番   都唔會飲湯嘅   我都懶得滾   好在媽咪屋企有煲湯   唔係真係好 dry 都似   我覺得湯水好緊要   因為我做女時晚晚有湯水飲   結婚初期就唔識滾湯煲湯   又懶去媽咪屋企飲湯   所以係完全無湯水   楂 lift 阿姐話我塊臉好黃好乾呀   嚇得我即刻請教同事點滾湯   好記得一生人第一個滾湯就係節瓜鹹蛋肉片湯   因為夠簡單 ~