Riso Café @ 九龍灣 ( 16-apr-2012 0.5 A/L )

莓子雜薈

法蘭克福香蜜腸

蘑菇粟米火腿腸蕃茄汁意大利粉

西班牙辣肉腸意式燴飯

( 16-apr-2012 mon )

今日星期一   加上好好瞓   真係好唔願意起身番工 ~

早餐食奶醬多 + 咖啡   好耐無食   覺得好好味   我次次食奶醬多 or 奶油多就覺得好開心   因為以前同媽咪 家姐 朱仔食早餐   多數都食奶油多   同里奧大人食 tea   佢又多數食奶醬多   所以會令我覺得食早餐無咁孤單咁呢 ~

好快手做完嘢   所以可以好 hea 咁過喇 ~ 

今日家姐照腸 & 胃   所以我請半日假啦   佢 1-2 pm 先照   咁姐夫又陪佢   所以我同媽咪飲完茶就探家姐喇   飲到 2 點 15 分家姐話照完   又話唔攰唔暈唔眼瞓   咁我都覺得佢好勁架   話哂麻醉全身喎   係咪先 ~  

羅漢齋粉包

荔芋鴨腳扎

山竹牛肉

燒肉燒鴨飯

糖不甩

其實家姐話要照腸時   又唔知姐夫請唔請到假   咁又話要全身麻醉   咁我自己都試過麻醉後個人會溫溫 dun dun 嘛   所以驚佢無人喺身邊   我咪請假囉   我呃佢話自己要覆診所以請假   唔係佢實唔比我黎架 ~

同媽咪飲完茶都 3 點   之後家姐 send sms 問我係咪覆診   我話唔係   無理由 3 點覆診 3 點先走嘛   無計啦   唯有講真話佢聽囉 ~

咁我打比佢問路嘛   之後佢話原來打嘅唔係麻醉藥   係鎮定劑咋   佢話之前姐夫都照過腸   話打完支針就瞓着咗   咁我地咪話係因為佢眼瞓囉   唉   我話家姐自己要問醫生照腸情況家嘛   咩都唔知都有嘅   仲衰過我   雖然我未必記得   但都會問嘢丫 ~

去南記買咗兩碗鴛鴦河粉比佢地食   之後姐夫無耐就走   我就陪家姐到 7 點   一齊挨喺床度傾計   又睇下餐牌   好鬼貴啦   早餐要 $50-$70 呀   晚餐一個星洲炒米都要 $70   食水好深啦   可能知道好多人住私家醫院有得 claim 啩   但都唔好咁離譜嘛 ~

走嘅時候又落雨   又黑媽媽   完全唔記得自己邊個方向黎呀   最後都問咗個後生仔   佢話佢都係去 Sogo   佢教咗我點行   叫我跟住佢   不過我行得快過佢   因為佢同朋友一路行一路傾   差唔多到 Sogo   佢又行得快過我   佢向後望一望我   話我知 Sogo 喺前面   我覺得佢好好人呀 ~  

我真係超唔鍾意搭地鐵   所以堅持搭巴士  咁問家姐除咗 619   仲有咩車到九龍灣   佢話仲有架 671   咁好啦   等咗 20 分鐘   有架 619   有車就上啦   好在都有位企   之後 send sms 比家姐   話佢知我搭咗 619   但後面有架 601   不過睇唔到有無位   所以都係搭 619   之後家姐話 " 601 唔啱   都話 671 咯 "   用得 " 都話 xx 咯 "   即係講過啦   好在無搭 601 咋   如果唔係我就會話家姐教錯 ~

我 8 點上車嘅時候   里奧大人又咁啱放工   所以去 Riso Café 等喇   其實呢間嘢食真係麻麻   但勝在近   又唔駛過馬路   我好鍾意食完行兩步就番屋企嘅感覺架 ~