香草瑞士汁燜冬菇雞膇 + 瑤柱節瓜甫 + 蒜粒炒飯 ( 14-aug-2012 )

( 14-aug-2012 tue )

唔知點解成日覺得今日係星期三   可能想快 d 到星期六 off 啦 ~

早餐食奶醬多   最緊要夠快呀 ~

菇場靜呀   忙咗陣就等 lunch time 喇 ~

今日食 lunch box   我有個男同事個 lunch box 係超級清架   次次都係菜  豆腐   蕃茄同飯咁架咋   有次女同事見到   話好似人地 d 減肥餐咁   因為樣樣都好似烚咁   所以見到佢飯盒有肉係好出奇嘅事囉 ~

放工去 citibank   因為佢講番我份保單嘅嘢   之後就 sell 儲錢計劃   傾完之後就傾閒計   問我係咪喺醫院做嘢   我問佢點解   佢話我好大陣消毒藥水味   覺得我好乾淨   但我真係咩味都聞唔到喎   可能我聞慣咗滴露味   所以唔覺啦 ~

同家姐傾電話   傾開有條路   所以企喺屋企樓下繼續傾   傾咗 15 分鐘先番屋企   原來已經 7 點喇 ~

好在尋晚燜定雞膇   今晚就咁蒸節瓜同炒飯就搞掂   里奧大人差唔多 8 點半番到屋企   咁就等埋佢一齊開飯呢 ~

是日懶餐 - 香草瑞士汁燜冬菇雞膇 + 瑤柱節瓜甫 + 蒜粒炒飯

香草瑞士汁燜冬菇雞膇 - 冬菇入哂味   超正呀   連里奧大人唔鍾意食冬菇都話好味   其實我都幾鍾意用呢個香草瑞士汁   又唔駛自己調味夠方便呀 ~

瑤柱節瓜甫 - 尋晚浸定瑤柱   慳番唔小時間呢   整呢個餸又係好方便呀 ~ 

蒜粒炒飯 - 加咗蒜粒同蛋去炒   其實好似同煲嘅無咩分別   搞嘢 ~
洗完碗沖埋涼都 9 點半喇   今晚真係比自己休息   有衫都唔熨住呀   睇下電視同雜誌   11 點就瞓呢 ~   ~