( 17-dec-2012 mon )
尋晚半夜三更發惡夢呀 大叫咗兩下 嚇醒里奧大人 但其實我喺夢中係大叫咗好耐呢 最怕發呢 d 鬼怪夢 明明 7 點半起身 不過想瞓多陣 所以瞓到 8 點先起身 瞓多半個鐘真係精神好多呢 ~
今朝坐快 van 其實真係好快 5 分鐘到菇場附近 不過我覺得貴 所以無咩必要都係搭番地鐵 慳得一蚊得一蚊 最緊要係比到我有時間食早餐呢 ~
番到菇場忙忙地 搞掂又 hea 過 ~
今日有 lunch box 因為之前食剩咗好多黑椒汁 所以唔好嘥 尋日用黎煮扁意粉 咁就成為今日嘅黑椒腸仔扁意粉喇 ~
食完去 Bank 整嘢同入票 感恩無咩人 好快就搞掂 不過都唔周圍行喇 好驚自己又亂咁買嘢 ~
里奧大人今日上咗大陸 不過我話煮飯 佢又話可以番到黎食 實在太好呢 所以我放工即番屋企做嘢喇 ~
番到屋企即開機洗衫同拖地 之後食埋尋晚嘅飯同餸 抖陣就煮埋晚餐 今晚自己食先 食完之後又要熨兩機衫喇 里奧大人差唔多 9 點就番到屋企 我都啱啱熨完衫呢 好鬼攰呀 ~
是日懶餐 - 蕃茄煙肉扁意粉
蕃茄煙肉扁意粉 - 唔想里奧大人成日出街食 我又想清埋包煙肉 所以就整蕃茄煙肉扁意粉 不過今次無用蕃茄蓉 懶到就咁用茄汁整咋 我都無食到 但見里奧大人食得都幾滋味 應該唔差啩 ~
沒有留言:
發佈留言