肉絲炒麵 + 茶樹菇螺片湯 ( 9-APR-2017 )

( 9-APR-2017  SUN )

今朝 9 點半起身   沖埋涼就去食早餐喇 ~



我哋坐卡位要搭枱   咁對面兩母女話天氣熱   之後個媽話學啲人買頂帽   遮埋條頸   個女話 Ling 姐   我以為話似一個人叫 Ling 姐嘅人   原來佢話 "拎遮"   咁佢阿媽話拎遮好煩   又要拎多樣嘢拎   我先知係講緊拎把遮咋 ~

等如上次我去搭地鐵   有個女人同另一個女人講你條頸靚   咁我即刻望個女人條頸   睇下係咪無咩頸紋   之後佢再話佢就唔知邊個站落車   咁我先知佢講緊係 "調景嶺"   同音字有時都幾搞笑 ~

早咗食早餐   所以早咗番教會   咁都唔錯   可以安靜一下 ~

今次聽道   講到每個人都有生命嘅難關   但我好感恩   因為耶穌係我生命之主   我可以誇軟弱   得剛強 ~

呢兩次番崇拜都有令自己得着嘅地方   希望自己在當中好好學習呢 ~

崇拜完畢就去街市買嘢   我叫里奧大人番屋企先   唔係佢又催催共 ~

一係唔買   一買就買咗十幾袋   袋袋都滿哂咁滯   最衰自己唔記得拎環保袋啦   唔係可以一次放哂入去   我其實好驚拎膠袋   有時太重   我會箍住喺手   之後隻手就會無血到咁痺哂 ~

番到屋企即放低嘢呀   隻手真係無哂力呀   慘 ~

枇杷果 1 磅 ($22) / 蟠桃 1 磅 ($20)  依家買生果都好貴下



搞掂哂真係要抖下喇   抖到 3 點食下午茶    因為又係好想食厚多士   哈哈 ~

今次好鹹呀 





食完都番屋企喇   抖都唔抖就要即煲湯呢 ~



諗住 6 點開始煮嘢   點知大食打嚟傾偈   傾咗半個鐘   之後我話要煮飯唔傾喇 ~

是日懶餐 - 肉絲炒麵 + 茶樹菇螺片湯

肉絲炒麵 - 其實我想買西施骨   但最後都係買豬展   咁可以用嚟炒麵   唔好嘥嘢 ~ 

茶樹菇螺片湯 - 清埋最後一包湯包   我真係好耐無煲湯咁喇   覺得勁好飲呀   今次加咗 1 條紅蘿蔔   2 條粟米同 $26 豬展   其實我想要 $20   不過買開就算啦   所以同里奧大人講   第時買豬肉呢啲   你想買 $20 就話 $15 就得㗎喇   佢一定一定會切多比你呢   哈哈 ~

搞掂哂就沖涼   之後休息 lu ~

今晚有 d 攰   11 點都瞓覺喇 ~