春卷辛辣麵 + 炸魚皮 (外賣) + 菜心苗 ( 12-APR-2017 )

( 12-APR-2017  WED )

今朝又凍番喎   我覺得比尋日低咗起碼 5 度   因為尋晚係勁焗熱囉 ~

早餐去另一間食   8 卦成日都要我去食新嘢   但其實好多都試哂啦   係得兩三間叫做好食   我話最緊要杯奶茶夠熱囉   食物真係其次   我多數食三文治   斷估唔會有好大分別囉 ~



菇場忙呀   所以今朝充實到不得了 ~   

Lunch Time 去買車仔麵   因為好想飲凍鴛鴦呀 ~

仍然忙呀   4 點幾有人請食下午茶   可以抖下   不過食完又要繼續做啦 ~

放工搭地鐵出旺角   一去到已經有車   咁即入車廂   再望清楚原來係去官塘方向   即飛番出廂   勁樣衰 ~

咁我去旺角係唔駛轉車   但見好多人喺太子轉車   我又差啲跟埋佢哋出   好在又定一定神睇睇指不燈咋   真係好驚搭地鐵   因為自己太論盡了 ~

去到銀城都 6 點 15 分喇   咁我搭扶手電梯嘅時候   有對男女想上去又唔想上咁   我又讓來讓去 3 次   麻鬼煩   最後佢都讓我上   諗住以為佢地咁好   頂   聽到佢話有阿強呀   唔怪得比我上先啦   之後我都拿拿聲行去地面   嗚嗚 ~

6 點半搞掂   好感恩幫我換咗底板   新 Mon 同插頭位   完全係新機咁   勁開心 ~

去南記買春卷   我話明買生嘅春卷   但佢居然問我拎走定堂食 ?!   咁可能佢啲春卷係已經熟咗   喺度食都唔出奇啩   同埋佢哋習慣口吻問人拎走定堂食   試過喺茶餐廳   個客話要紅豆冰    侍應問佢凍定熱呀   哈哈 ~

買完見到有巴士   即急步去巴士站   感恩仲有位坐呢 ~

番到屋企即拖地   搞掂哂就抖陣   里奧大人 7 點 45 分放工   我都差唔多要預備喇 ~

頭先食到好飽   今晚我只係食菜同 2 條春卷   再加埋一大碗桑寄生   真係夠哂飽 lu ~

是日懶餐 - 春卷辛辣麵 + 炸魚皮 (外賣) + 菜心苗

春卷辛辣麵 - 上次去旺角見到有南記   咁今晚又嚟旺角   所以買春卷煮麵啦   夠哂方便   里奧大人又最鍾意   南記啲菜肉雲吞仲抵   $24/12 隻   不過我太飽   唔係都想買嚟試下 ~   

炸魚皮 (外賣) - 喺香港仔魚蛋粉買㗎   唔好食囉   有啲硬同埋好鹹 ~

菜心苗 - 前晚浸咗   今晚一定要食啦   唔係都唔想煮   哈哈哈哈 ~

我哋食飯會開電視   但我講明唔想睇新聞   好驚見到血林林嘅嘢   同埋聽到啲唔開心嘅嘢   咁有時我會一路食一路傾偈   衰奧就會繼續睇電視   我要問佢有無聽我講嘢 ?!   佢今晚更搞笑   一路聽   見住佢對眼一路 "射呢眼" 咁 ~

搞掂哂都接近 9 點   即刻沖涼喇 ~

今晚成個人好似好熱氣咁   可能今日唔係辣就係炸嘢呀   唉   不過望個鐘已經 11 點 40 分   唔瞓唔得囉 ~