茄汁蜆肉扁意粉 + 辣菜甫唐生菜 ( 15-JAN-2019 )

( 15-JAN-2019  TUE )

呢半年身體弱咗   所以個身體無以前咁熱   里奧大人成日話我係暖爐   佢明明冚緊被   但我一上床瞓呢   佢直頭話我成個火爐咁呀   令佢有啲熱添呀 ~

但尋晚佢都諗住我瞓落床會無咁凍   點知我個身同腳其實凍過佢   調番轉頭我要痴住佢   等我自己無咁凍   所以佢都話無諗過係咁   哈哈 ~

無咩胃口   早餐食奶醬多 ~

菇場唔忙呀   繼續清啲煩嘢 ~

Lunch Time 都唔餓   咁出去買菜   之後再買嘢食番場慢慢食 ~

食剩 4 粒燒賣 + 1 隻粉果   之得唔買燒賣啦   哈哈

仍然唔太忙   但個肚有輕微扯住痛   唔係咁舒服囉 ~

3 點幾食埋啲燒賣粉果   又做下嘢   所以好快又放工 ~   

放工即走   里奧大人話今晚要 OT   咁我番到屋企都預備晚餐   再拖埋地   可以抖到 7 點半先煮呢 ~

我煮完都 8 點   即放入暖壺   里奧大人 8 點 20 分左右番到屋企   我順便淥埋啲菜   估唔到又一齊開餐   因為我頭先仲未餓   煮完都唔想食住囉 ~

是日晚餐 - 茄汁蜆肉扁意粉 + 辣菜甫唐生菜

茄汁蜆肉扁意粉 - 唔想食飯   又醒起冰格仲有包急凍蜆肉   所以即煮喇   最開心里奧大人話好味道   因為我依家煮嘢唔會試味   求求其其咁呢 ~          

辣菜甫唐生菜 - 淥唐生菜最方便   真係淥兩淥就搞掂   哈哈 ~      

洗埋碗就即開機洗衫   之後沖涼   食埋生果就熨 2 機衫   攰呀 ~

今晚要再食藥   因為又好似咳咳哋   好怕唔斷尾   但又唔想請病假   如果盡情瞓一日   應該會好快好番   哈哈 ~

其實呢排真係瞓得唔好   成日諗起蔡弟兄   唉 ~

睇多陣電視又打下機   本來 11 點想瞓   但無啦啦好反胃咁   所以抖到差唔多 11 點 45 分先瞓 ~