鴛鴦腸蒸飯 + 青紅蘿蔔乾螺頭湯 + 自家制麵包 ( 16-MAY-2021 )

( 16-MAY-2021  SUN)

今朝 8 點唔夠都醒醒哋   之後都唔想再瞓   所以梳洗完再浸乾螺頭就去徑步 lu ~

可能叫做瞓多一個鐘   所以都好精神咁徑步   輕輕鬆鬆咁徑咗半個鐘   之後就大清潔屋企   再拖埋地就沖涼呢 ~

搞掂哂原來都已經 10 點 20 分   換好衫就要出發喇 ~

真係無諗過今朝做到咁多嘢   所以好鬼開心呢 ~

食埋早餐就番教會   家姐話我星期一至五都已經食奶醬多   我話今朝趕時間呀   唔想食熱狗   因為唔想咬咁耐 ~

今日聽道真係好有得着   人生當中真係要有休止符嘅出現   停一停諗一諗   而我真係相信神嘅恩典夠我用   盼望蒙神祝福去祝福別人 ~

崇拜完畢就出去買金羅漢果   之後去里奧大人公司等佢放工 ~

同阿妹傾偈傾到 1 點半   咁啱里奧大人都差唔多放工   本來諗住試新嘢   但全場爆滿   所以番屋企先食下午茶喇 ~

夾扁易入口好多

食完就去買青紅蘿蔔同粟米   叫里奧大人快啲番屋企   開定冷氣等我   哈哈 ~

煲好湯就沖涼   依家暖水再凍水   咁先可以降溫   諗起後生真係朝早都沖凍水涼㗎   依家肯定無可能   哈哈 ~

里奧大人 5 點左右瞓覺   我就睇 Youtube ~

突然醒起雪櫃有車厘茄   咁食咗 1 粒   之後個胃即刻勁痛呀   唔知係咪凍得滯 ?!   好在痛咗 20 分鐘左右就無事咋 ~

6 點開始預備晚餐   不過都要 7 點先食得 ~

是日懶餐 - 鴛鴦腸蒸飯 + 青紅蘿蔔乾螺頭湯 + 自家制麵包

鴛鴦腸蒸飯 - 本身醃咗雞扒   但個人唔係咁舒服   所以即刻轉蒸臘腸同潤腸   白飯係星期五食剩   今晚一定要清埋去 ~

青紅蘿蔔乾螺頭湯 - 好想飲老火湯   同埋想快啲清哂包乾螺頭   成日放喺冰格   好易唔記得佢存在架 ~

自家制麵包 - 今次係芝士包   我就鍾意食喇   哈哈 ~

洗埋碗就開機洗衫   個肚仍然有啲扯住住   所以沖埋涼就休息   里奧大人自己去徑步呢 ~

終於試咗包豬肉乾   味道都唔錯   同埋我覺得 $110 其實唔算貴   因為我喺廣良興買半磅都要 $40

睇 Youtube 睇到 11 點幾   但今晚唔眼瞓   不過都要瞓囉 ~