黑椒牛柳粒 + 蠔油菜心苗 ( 19-APR-2022 )

( 19-APR-2022  TUE )

好感恩一覺瞓天光呀   因為我次次放假之後第一日番工   會好有壓力瞓唔到㗎 ~

今朝落毛毛雨   所以覺得又涼咗咁呢 ~

早餐都係奶醬多   家姐話我真係好鍾意食   哈哈 ~

菇場勁凍   但其實今日都涼咗啦   唔明點解仲開咁大冷氣   好在忙咋   唔係齋坐更加凍呢 ~

貼咗撒隆巴斯都係痛   里奧大人就會夜晚幫我搽一條筋再按摩   希望快啲好番啦

Lunch Time 一到   居然無同事行出去呀   所以我即刻睇群組資料有無改食飯時間   之後再同 8 卦講話無人出去嘅 ?!   連 8 卦都話係啦   搞到佢都唔敢去 Pantry 拎 Lunch Box   哈哈 ~

差唔多 11 點 48 分就有同事出去喇   咁我都出 lu ~

諗住行遠啲   但覺得條街好凍呀   所以行咗個大圈就買魚片頭米番菇場喇 ~

經過食店   小說無啦啦話我瘦咗   小 A 話係減肥啦   我話唔減肥都唔得啦   就嚟夏天   無可能着件外套遮肥肉嘛 ~

番到菇場   阿齋見我咁早番覺得好出奇   我話出面好凍   咁今朝又無着外套   想快啲番嚟唔想凍病   哈哈 ~

仍然忙呀   但今日焗北芪當參又狂飲水   所以成日要去洗手間   我行去洗手間   離遠聽到 Pantry 有聲咁   點知突然肥仔豪喺男廁行出嚟   真係嚇到我話 "嚇鬼死我呀"   佢係咁講唔好意思   仲話聽到腳步聲   已經慢慢先開門驚嚇親我   但估唔到最後都嚇親我   哈哈 ~

今日正常時間放工喇   個個都話唔習慣 ~

番到屋企即沖涼   之後見到里奧大人話上咗車   我都要即預備晚餐喇   今晚 7 點幾先開餐 ~

左手好鬼痛   我全程用右手咋   真係拎起個煲都唔得   今日喺菇場拎水杯飲水   隻手直頭痛到爆添呀   所以希望唔好到右手勞損   哈哈哈哈 ~

是日晚餐 - 黑椒牛柳粒 + 蠔油菜心苗

黑椒牛柳粒 - 之前買咗 1 包急凍一口牛柳粒   估唔到幾好味喎   煮出來唔韌   我只係煮咗半包   所以加芝士丸同腸仔   因為想清埋佢哋呀 ~

蠔油菜心苗 - 兩斤菜分 3 餐食   依家菜價正常   可以逐斤咁買   不過因為連放 4 日   我先買兩斤呢 ~

洗埋碗又抖下啦   今晚 9 點先開始跳舞 ~

抖陣就即刻沖埋涼   之後就睇電視   今晚 11 點唔夠都瞓 lu ~