蘿蔔糕拚芋頭糕 + 腐皮卷 + 素餃 + 酸齋拚齋鴨腎 (外賣) @ 屋企 ( 11-APR-2022 )

( 11-APR-2022  MON )

感恩一覺瞓天光呀   仲要鬧鐘未響都醒咗   感覺係自然醒   哈哈 ~

早餐食奶醬多   今次好好味呀 ~

菇場忙咗陣   所以好想快啲到 Lunch Time ~

一到 Lunch Time 即去 6ixty8ight 睇睡裙   如果仲係 $99/條 就買   估唔到仲做緊特價   因為由 $159 減到 $99 真係好抵   我之前最平都要 $139 呀   其實我想買 4 條㗎   可惜佢得 2 條   但都照殺 ~

買完就去一田買齋同豆腐   之後買雞骨草比里奧大人  最後買埋魚片頭米就即番菇場開餐   因為已經 12 點 40 分喇   無諗過今日行咁耐 ~

菇場仍然唔忙   但傾下 Skype 又好快到 4 點半   哈哈 ~

放工即走   依家仍然係番到屋企即沖涼   希望遲啲唔駛啦 ~

我同里奧大人講話今日已經回復心情   佢諗咗陣係咩   之後反白眼仲喺度笑   哈哈 ~

5 點半開始預備晚餐   諗住 6 點都有得食   但 6 點 20 分先搞掂   因為始終之前放喺雪柜   如果唔係唔需要焗咁耐   就咁焗腐皮卷都焗咗 20 分鐘 ~

是日懶餐 - 蘿蔔糕拚芋頭糕 + 腐皮卷 + 素餃 + 酸齋拚齋鴨腎

蘿蔔糕拚芋頭糕 - 突然間好想食糕   所以買喇 ~ 

腐皮卷 - 完全無食過   依家後悔買咁多喇   哈哈 ~

素餃 - 呢個真係好正   我會蘸辣豆板醬一齊食㗎 ~

酸齋拚齋鴨腎 - 一定喺呢兩款   我唔係咁鍾意食咖哩齋同齋叉燒呢 ~ 

洗埋碗就開機洗衫   8 點鬆啲同里奧大人開始跳舞   今晚又爆汗   可能今日比較熱 ~

沖完涼都要抖喇   睇睇下電視   我錫里奧大人一啖   佢話做咩錫佢 ?!   我話錫啖都要理由 ?!  之後係咁錫佢   佢話叫唔好錫就係咁錫   但叫錫就點都唔錫   真係衰衰格格喎   哈哈 ~

今晚 11 點 20 分瞓覺   我居然覺得早添 ~