齋滷味 & 香煎腐皮卷 & 田園蔬菜餃 (外賣) + 自家制麵包 ( 10-JUL-2022 )

甜匠陽光香印青提   都皮脆爽甜喎

( 10-JUL-2022  SUN )

今朝 9 點半自然醒   梳洗之後就整早餐喇 ~

家姐以為我食 2 個甜餐包   我話剪開一半易焗熱嘛 ~

食完就拖地   沖埋涼就出發番教會喇 ~

崇拜完就等里奧大人放工   但里奧大人要幫公司買手機   所以食埋午餐先去九龍灣呢 ~

我本身食滷水雞翼拚魷魚   但佢地比錯豬紅豬皮同喇沙湯底   咁我都唔會再去換喇   因為呢 3 樣嘢都想試   哈哈   里奧大人唔食豬紅豬皮架   所以無得同佢 Share 就唔會叫囉   喇沙湯底就想試好耐   但我怕多奶   估唔到又好味喎   今次真係錯有錯着   哈哈

食完就去德福買嘢   之後再去 Market Place 買酸齋同生果   咁里奧大人可以幫我拎 ~

買完去自助比錢   我買咗 $90 左右   但見到買滿 $100 可以 $45 (原價 $69) 換購香印青提   咁再翻轉頭睇下有咩生果買啦   再去比錢嗰陣   離遠見到好似阿 Jack   之後我見里奧大人飛上前   原來佢見到 Ivy   仲喺佢哋後面話叫佢哋排隊唔好打尖   嚇死佢哋啦   佢哋見隔離無人先行過去另一條隊嘛   哈哈 ~

佢哋又係買甜酸齋   之後一路行一路傾   喺德福傾下傾下   原來已經傾咗 45 分鐘呀   里奧大人話佢企到腳痛   咁我又 OK 喎   可能耐無傾偈   好多嘢想傾 ~

同佢哋兩公婆真係好有緣   以前住九龍灣都間唔中撞到   仲要唔係平時正常嘅時間   即係好日唔出街   一番屋企就撞到佢咁呢   同埋今次係整定咁   本身今日都無打算去德福   之後又特登番轉頭買生果先見到佢地呢 ~

本來上年約咗 1 次見面   但 Ivy 唔得閒   之後疫情又大爆   所以真係特登約反而唔成事   哈哈 ~ 

4 點幾番到屋企   放低哂嘢都即沖涼喇 ~

6 點左右預備晚餐   同時間又燜定冬菇   咁聽晚就咁淥菜就搞掂 ~

是日懶餐 - 齋滷味 & 香煎腐皮卷 & 田園蔬菜餃 (外賣) + 自家制麵包

齋滷味 & 香煎腐皮卷 & 田園蔬菜餃 (外賣) - 實在唔想煮   所以又買呢啲喇 ~

自家制麵包 - 好在有呢兩片包   我就唔駛再煮飯   用嚟夾豬肉乾都幾好味㗎 ~  

 

洗埋碗就小清潔廚房   之後開機洗衫同大清潔廁所   搞掂即沖涼   我想快啲休息呀   哈哈 ~

睇下 Youtube   今晚 11 點半先瞓   算夜啦   話哂聽日要番工嘛 ~